One-Stop Digital Gateway ନୂଆଓଡ଼ିଶା’ ପରେ ଏବେ ‘ମାଇଭାରତ’: ସବୁ କଲେଜ ଛାତ୍ରଛାତ୍ରୀଙ୍କ ପାଇଁ ପଞ୍ଜିକରଣ ବାଧ୍ୟତାମୂଳକ, ୱାନଷ୍ଟପ୍ ଡିଜିଟାଲ ଗେଟୱେ

ବିଜେଡି ସରକାରର ‘ନୂଆ ଓଡ଼ିଶା’ ଯୋଜନାକୁ ବନ୍ଦ କରିଥିବା ମୋହନ ମାଝୀଙ୍କ ସରକାର ଏବେ କେନ୍ଦ୍ରୀୟ ଯୋଜନା ମାଧ୍ୟମରେ ରାଜ୍ୟର ଯୁବପିଢ଼ି ବିଶେଷକରି କଲେଜ ଛାତ୍ରଛାତ୍ରୀଙ୍କୁ ସଶକ୍ତ କରିବାକୁ ପଦକ୍ଷେପ ନେଇଛନ୍ତି । ଭାରତ ସରକାରଙ୍କ ‘ମାଇ ଭାରତ’ ପୋର୍ଟାଲକୁ ରାଜ୍ୟଣ ସମସ୍ତ ଡିଗ୍ରୀ କଲେଜ ଓ ବିଶ୍ୱବିଦ୍ୟାଳୟରେ କାର୍ଯ୍ୟକାରୀ କରିବା ନିମନ୍ତେ ରାଜ୍ୟ ଉଚ୍ଚଶିକ୍ଷା ବିଭାଗ ନିଷ୍ପତ୍ତି ନେଇଛି ।

 ରାଜ୍ୟର ସମସ୍ତ ସ୍ନାତକ ଓ ସ୍ନାତକୋତ୍ତର ଛାତ୍ରଛାତ୍ରୀଙ୍କୁ ‘ମାଇଭାରତ’ ପୋର୍ଟାଲରେ ବାଧ୍ୟତାମୂଳକ ଭାବେ ପଞ୍ଜିକୃତ ହେବାକୁ ପଡ଼ିବ । ଏହା କେବଳ ଏକ ପଞ୍ଜିକରଣ ନୁହେଁ ବରଂ ରାଜ୍ୟର ଯୁବଶକ୍ତିଙ୍କୁ ସିଧାସଳଖ ଭାରତ ସରକାରଙ୍କ ବିଭିନ୍ନ ବିକାଶମୂଳକ ଓ ଦକ୍ଷତା ବୃଦ୍ଧି କାର୍ଯ୍ୟକ୍ରମ ସହ ଯୋଡ଼ିବ, ଯାହାକି ଓଡ଼ିଶାର ଛାତ୍ରଛାତ୍ରୀଙ୍କ ପାଇଁ ଜାତୀୟସ୍ତରର ମଂଚ ସାଜିବ ।

ପଞ୍ଜିକୃତ ଛାତ୍ରଛାତ୍ରୀଙ୍କ ପାଇଁ ହେବ ‘ୱାନଷ୍ଟପ୍ ଡିଜିଟାଲ ଗେଟୱେ’

‘ମାଇଭାରତ’ ବା ‘ମେରା ଯୁବ ଭାରତ’ ପୋର୍ଟାଲଟି ଛାତ୍ରଛାତ୍ରୀମାନଙ୍କ ପାଇଁ ‘ ୱାନଷ୍ଟପ୍ ଡିଜିଟାଲ୍ ଗେଟୱେ’ ଭାବେ କାର୍ଯ୍ୟ କରିବ । ଏଥିରେ ପଞ୍ଜିକରଣ କରିବା ପରେ ଛାତ୍ରଛାତ୍ରୀମାନେ  ବିଭିନ୍ନ ସରକାରୀ ଯୋଜନା, ଜାତୀୟ ଯୁବ ମହୋତ୍ସବ, ଦକ୍ଷତା ବିକାଶ ଶିବିର ଓ ଜାତୀୟସ୍ତରର ପ୍ରତିଯୋଗିତାରେ ସହଜରେ ଭାଗ ନେଇପାରିବେ । ବିଶେଷ କରି ସରକାରଙ୍କ ଦ୍ୱାରା ପ୍ରଦତ୍ତ ବିଭିନ୍ନ ଇଣ୍ଟର୍ଣ୍ଣସିପ୍ ଓ କ୍ଷେତ୍ର ପରିଦର୍ଶନ ସୁଯୋଗ ଛାତ୍ରଛାତ୍ରୀମାନଙ୍କ ବାସ୍ତବ ଜ୍ଞାନ ବୃଦ୍ଧିରେ ସହାୟକ ହେବ । ଛାତ୍ରଛାତ୍ରୀଙ୍କ ମଧ୍ୟରେ ନେତୃତ୍ୱ ନେବା, ଦଳଗତ କାର୍ଯ୍ୟ, ଯୋଗାଯୋଗ ଦକ୍ଷତା ଓ ଡିଜିଟାଲ ଜ୍ଞାନକୌଶଳ ବୃଦ୍ଧି କରିବା ଉପରେ ଏହି ପୋର୍ଟାଲ ଗୁରୁତ୍ୱ ଦେଇଥାଏ । ଏହା ସେମାନଙ୍କୁ କେବଳ ପାଠ୍ୟପୁସ୍ତକ ମଧ୍ୟରେ ସୀମିତ ନରଖି ଦୁନିଆର ନୂଆ ନୂଆ ଜ୍ଞାନକୌଶଳ ସହ ପରିଚିତ କରାଇବ ।

ଭାରତ ସରକାରଙ୍କ ଯୁବ ବ୍ୟାପାର ଓ କ୍ରୀଡ଼ା ମନ୍ତ୍ରଣାଳୟ ଦ୍ୱାରା ଆରମ୍ଭ କରାଯାଇଥିବା ‘ମାଇଭାରତ' (ମେରା ଯୁବା ଭାରତ) ପୋର୍ଟାଲରେ ରାଜ୍ୟର ସମସ୍ତ ସ୍ନାତକ ଓ ସ୍ନାତକୋତ୍ତର ଛାତ୍ରଛାତ୍ରୀଙ୍କୁ ପଞ୍ଜିକୃତ କରିବା ପାଇଁ ଉଚ୍ଚଶିକ୍ଷା ନିର୍ଦ୍ଦେଶକ କାଳୀପ୍ରସନ୍ନ ମହାପାତ୍ର ଗୁରୁବାର ସମସ୍ତ ବିଶ୍ୱବିଦ୍ୟାଳୟର ରେଜିଷ୍ଟ୍ରାର ଓ ଡିଗ୍ରୀ କଲେଜର ଅଧ୍ୟକ୍ଷମାନଙ୍କୁ ଚିଠି ଲେଖି ଶତପ୍ରତିଶତ ପଞ୍ଜୀକରଣ ନିଶ୍ଚିତ କରିବାକୁ କହିଛନ୍ତି ।

ମିଳିବ ଡିଜିଟାଲ୍ ସାର୍ଟିଫିକେଟ୍ ଓ କ୍ୟାରିୟରରେ ସ୍ୱୀକୃତି

ଏହି ପୋର୍ଟାଲରେ ପଞ୍ଜିକୃତ ଛାତ୍ରଛାତ୍ରୀଙ୍କୁ ସରକାରୀ ‘ସ୍ୱୀକୃତି ଓ ପ୍ରମାଣପତ୍ର’ ମିଳିବ । କୌଣସି ସ୍ୱେଚ୍ଛାସେବୀ କାର୍ଯ୍ୟ, ସାମାଜିକ ଅଭିଯାନ କିମ୍ବା କାର୍ଯ୍ୟକ୍ରମରେ ଛାତ୍ରଛାତ୍ରୀମାନେ ନିଜକୁ ନିୟୋଜିତ କଲେ ସରକାରଙ୍କ ପକ୍ଷରୁ ସେମାନଙ୍କୁ ମନ୍ତଣାଳୟ ପକ୍ଷରୁ ଡିଜିଟାଲ ସାର୍ଟିଫିକେଟ ପ୍ରଦାନ କରାଯିବ । ଆଉ ଏହି ସାର୍ଟିଫିକେଟ୍ ଛାତ୍ରଛାତ୍ରୀଙ୍କୁ ଭବିଷ୍ୟତରେ ଚାକିରି କ୍ଷେତ୍ରରେ ସେମାନଙ୍କ ବାୟୋଡାଟାକୁ ଅନ୍ୟମାନଙ୍କ ତୁଳନାରେ ଅଧିକ ପ୍ରଭାବଶାଳୀ କରାଇବ ତଥା ନିଯୁକ୍ତି ସୁଯୋଗ ବୃଦ୍ଧି ସହ ସେମାନଙ୍କର ଭବିଷ୍ୟତ କ୍ୟାରିୟରକୁ ଅଧିକ ସମୃଦ୍ଧ କରିବ ।

କଲେଜଗୁଡ଼ିକୁ ଶତପ୍ରତିଶତ ପଞ୍ଜିକରଣ ଓ ଅନୁପାଳନ ପାଇଁ କଡ଼ା ନିର୍ଦ୍ଦେଶ

ସ୍ନାତକ ଓ ସ୍ନାତକୋତ୍ତର ପଢ଼ୁଥିବା ସମସ୍ତ ବର୍ଷର ଛାତ୍ରଛାତ୍ରୀଙ୍କ ଶତପ୍ରତିଶତ ପଞ୍ଜିକରଣ ନିଶ୍ଚିତ କରିବା ଶିକ୍ଷାନୁଷ୍ଠାନର ଦାୟିତ୍ୱ ବୋଲି ଉଚ୍ଚଶିକ୍ଷା ବିଭାଗ ପକ୍ଷରୁ ସ୍ପଷ୍ଟ କରାଯାଇଛି । ଏଥିପାଇଁ କଲେଜଗୁଡ଼ିକ ଏକ ସ୍ୱତନ୍ତ୍ର ପଞ୍ଜିକା ପ୍ରସ୍ତୁତ କରିବେ ଯେଉଁଥିରେ ପ୍ରତି ଛାତ୍ରଙ୍କ ‘ମାଇଭାରତ ଆଇଡି’ ନମ୍ବର ଉଲ୍ଲେଖ ରହିବ । ଏହି ସମଗ୍ର ପ୍ରକ୍ରିୟାର ସଠିକ୍ ପରିଚାଳନା ପାଇଁ ଏନଏସଏସ, ରେଡକ୍ରସ୍ ଓ ରୋଭର୍ସ ଆଣ୍ଡ ରେର୍ଞ୍ଜସଙ୍କୁ ଅନୁପାଳନ ରିପୋର୍ଟ ପ୍ରଦାନ କରିବାର ଦାୟିତ୍ୱ ମଧ୍ୟ ବିଭାଗ ପକ୍ଷରୁ ନ୍ୟସ୍ତ କରାଯାଇଛି । ସରକାରଙ୍କ ଏହି ନୂଆ ପଦକ୍ଷେପ ଯୁବପିଢ଼ିଙ୍କୁ ଏକ ଦାୟିତ୍ୱସମ୍ପନ୍ନ ନାଗରିକ ଭାବେ ଗଢ଼ିତୋଳିବା ସହ ଦେଶ ଗଠନ ପ୍ରକ୍ରିୟାରେ ସେମାନଙ୍କର ସକ୍ରିୟ ଅଂଶଗ୍ରହଣ ସୁନିଶ୍ଚିତ କରାଇବ ।

 ଛାତ୍ରଛାତ୍ରୀମାନେ କେବଳ ପାଠପଢ଼ା ନୁହେଁ, ବରଂ ସ୍ୱଚ୍ଛତା ଅଭିଯାନ, ଡିଜିଟାଲ ସାକ୍ଷରତା ଓ ସ୍ୱାସ୍ଥ୍ୟ ସଚେତନତା ଭଳି ଗୋଷ୍ଠୀ ବିକାଶମୂଳକ କାର୍ଯ୍ୟକ୍ରମରେ ସିଧାସଳଖ ଜଡ଼ିତ ହୋଇ ଦେଶ ଗଠନରେ ନିଜର ଯୋଗଦାନ ଦେଇପାରିବେ । ଛାତ୍ରଛାତ୍ରୀଙ୍କ ସର୍ବାଙ୍ଗୀନ ଉନ୍ନତି ଏବଂ ସେମାନଙ୍କୁ ଏକ ଦାୟିତ୍ୱସଂପନ୍ନ ନାଗରିକ ଭାବେ ଗଢ଼ିତୋଳିବା ପାଇଁ ଏହି ଅଭିଯାନକୁ ସଫଳ କରିବାକୁ ବିଭାଗ ପକ୍ଷରୁ ସମସ୍ତ କଲେଜ ପ୍ରିନ୍ସିପାଲମାନଙ୍କୁ କୁହାଯାଇଛି ।

ସୂଚନାଯୋଗ୍ୟ, ୨୦୨୪ ସାଧାରଣ ନିର୍ବାଚନ ପୂର୍ବରୁ ତତ୍କାଳୀନ ବିଜେଡି ସରକାର ଯୁବ ଭୋଟରଙ୍କୁ ଆକୃଷ୍ଟ କରିବା ପାଇଁ କଲେଜଗୁଡ଼ିକରେ ‘ନୂଆ ଓଡ଼ିଶା’ ଯୋଜନା ଆରମ୍ଭ କରିଥିଲେ, ଯେଉଁଥିରେ କଲେଜ ଛାତ୍ରଛାତ୍ରୀଙ୍କୁ ଆର୍ଥିକ ସହାୟତା ଓ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ମାଧ୍ୟମରେ ଯୋଡ଼ା ଯାଇଥିଲା । କିନ୍ତୁ ରାଜ୍ୟରେ ବିଜେପି ସରକାର ଆସିବା ପରେ ଏହି ଯୋଜନାକୁ ବନ୍ଦ କରିଦେଇଥିଲେ ।