ଚିହ୍ନିଲେ ଦେଖି ଇଏ କିଏ ? ‘ଓଡ଼ିଶା ରିପୋର୍ଟର’ ନ୍ୟୁଜ୍ ଡେସ୍କରେ ଅମିତାଭ ବଚ୍ଚନ !

ଭୁବନେଶ୍ୱର (ଓଡିଶା ରିପୋର୍ଟର): କିଛି ଲୋକଙ୍କ ଇଚ୍ଛା ଥାଏ ବଡ଼ କଳାକାର ହେବେ। ଅଭିନୟର ଦକ୍ଷତା ଦେଖାଇ ଲୋକମାନଙ୍କର ମନୋରଞ୍ଜନ କରିବେ ଓ ପ୍ରଂଶସା ସାଉଁଟିବେ। ଆଉ କିଛି ଲୋକଙ୍କର ଇଚ୍ଛା ଥାଏ ତାଙ୍କ ପସନ୍ଦର କଳାକରଙ୍କ ପରି ଦେଖାଯିବେ। ତେଣୁ ସେମାନେ ନିଜ ପ୍ରିୟ କଳାକାରଙ୍କୁ ଅନୁସରଣ କରନ୍ତି। କଥାବାର୍ତ୍ତାଠାରୁ ଆରମ୍ଭ କରି ଚାଲିଚଳଣ ଓ ଲୁକ୍‌ ପର୍ଯ୍ୟନ୍ତ ସବୁକୁ ସେ ଖୁସିର ସହ ଅନୁସରଣ କରିବାକୁ ଚେଷ୍ଟା କରନ୍ତି।

ଏମିତି ଜଣେ ବ୍ୟକ୍ତି ହେଲେ ଭୁବନେଶ୍ଵରର ମନୁ ପଟ୍ଟନାୟକ। ଯିଏ ବିଗ୍‌-ବି ଅମିତାଭ ବଚ୍ଚନଙ୍କର ଜଣେ ବହୁତ ବଡ଼ ଫ୍ୟାନ୍ ବା ପ୍ରଶଂସକ। ସେ କେବଳ ଜଣେ ସାଧାରଣ ଫ୍ୟାନ୍ ନୁହଁନ୍ତି, ନିଜକୁ ସଂପୂର୍ଣ୍ଣ ଭାବେ ସେ ବଚ୍ଚନଙ୍କ ଲୁକ୍ ବି ଦେଇଛନ୍ତି। ତାଙ୍କୁ ଦେଖିଲେ ପ୍ରଥମ ଲୁକ୍‌ରେ ଆପଣ ଘାବରେଇ ଯିବା ନିଶ୍ଚିତ। ତାଙ୍କ ଶରୀର, ହେୟାର ଷ୍ଟାଇଲ୍, ଦାଢ଼ି, କଥାବାର୍ତ୍ତା ଶୈଳୀ, ଉଚ୍ଚତା, ସବୁକିଛି ଅମିତାଭ ବଚ୍ଚନଙ୍କ ପରି। ସେ ବଚ୍ଚନଙ୍କର ସବୁ ଚରିତ୍ରକୁ ବି ଫଲୋ କରନ୍ତି, ତାଙ୍କ ଫିଲ୍ମ ଦେଖନ୍ତି।

ତେବେ ଏଥିପାଇଁ ତାଙ୍କୁ କମ୍ କଷ୍ଟ କରିବାକୁ ପଡ଼ିନି। ନିଜକୁ ବଚ୍ଚନଙ୍କ ପରି ରଖିବାକୁ ଟଙ୍କା ତ ଖର୍ଚ୍ଚ କରୁଛନ୍ତି, ଗୁଡ଼ାଏ ସମୟ ମଧ୍ୟ ଦେବାକୁ ପଡୁଛି। ଯୁଆଡ଼େ ଗଲେ ତାଙ୍କୁ ପ୍ରଶଂସା ମିଳୁଛି। ଭୁବନେଶ୍ୱର ଓଲଡ ଟାଉନରେ ରୁହୁଥିବା ମନୁ ପଟ୍ଟନାୟକ ପେସାରେ ଜଣେ କଳାକାର। ବିଭିନ୍ନ ପ୍ରକାର ବିଜ୍ଞାପନରେ ସେ ସଚେତନତା ବାର୍ତ୍ତାକୁ ନିଜ ଅଭିନୟ ମାଧ୍ୟମରେ ପହଞ୍ଚାଇଥାନ୍ତି। ସକାଳୁ ଉଠିବା ମାତ୍ରେ ତାଙ୍କର ପ୍ରଥମ କାମ ଥାଏ ଅମିତାଭଙ୍କ ପରି ସଜ ହେବା। ଏହାକୁ ଦେଖି ତାଙ୍କ ସ୍ତ୍ରୀ ଟିକିଏ ମନ ଊଣା କରନ୍ତି, ତଥାପି ମନୁ ଅମିତାଭଙ୍କ ପରି ସଜ ହେବା ବନ୍ଦ କରନ୍ତି ନାହିଁ।

୨୦୦୩ରେ କଟକ ପୂଜା କମିଟିର କିଛି ଲୋକ ତାଙ୍କୁ କହିଥିଲେ ଯେ ସେ ସଂପୂର୍ଣ୍ଣ ଅମିତାଭ ବଚ୍ଚନଙ୍କ ପରି ଦେଖାଯାଆନ୍ତି। ସେବେଠୁ ସେ ଅମିତାଭଙ୍କ ବେଶରେ ବିଭିନ୍ନ ବିଜ୍ଞାପନରେ ଅଭିନୟ ଆରମ୍ଭ କରିଛନ୍ତି। ଯେତେ ଦୁଃଖରେ ଥାଆନ୍ତୁ ନା କାହିଁକି ଯେତେବେଳେ ସେ ରାସ୍ତା ଉପରକୁ ଚାଲିଯାଆନ୍ତି, ଲୋକେ ତାଙ୍କୁ ଦେଖି ଯେଉଁ ଖୁସି ହୁଅନ୍ତି ସେଇଟା ତାଙ୍କୁ ପ୍ରକୃତ ଆନନ୍ଦ ଦେଉଛି ବୋଲି ସେ କହିଛନ୍ତି।

ନିକଟରେ ସେ ପହଞ୍ଚିଥିଲେ ‘ଓଡ଼ିଶା ରିପୋର୍ଟର’ ନ୍ୟୁଜ୍‌ ଡେସ୍କରେ। ଏଠି ଆମ ସହକର୍ମୀଙ୍କ ସହ ସେୟାର କରିଥିଲେ ନିଜର ସବୁ ଇଚ୍ଛା। କାହିଁକି ସେ ବିଗ୍-ବିଙ୍କ ପରି ନିଜକୁ ସଜେଇବାକୁ ଚାହିଁଲେ ଓ ଏଥିପାଇଁ କଣ ସବୁ କରିବାକୁ ପଡୁଛି ତାହା ସେ ଖୋଲି କରି କହିଥିଲେ। ଦେଖନ୍ତୁ ଭିଡିଓ।