ସ୍ୱାମୀଙ୍କ ମୃତ୍ୟୁ ପରେ ପ୍ରେମିକଙ୍କ ସହ ଅନୈତିକ ସମ୍ପର୍କ ରଖିଥିଲେ ମହିଳା। ଗାଁ ଲୋକେ ଜାଣିପାରି ଉଭୟଙ୍କୁ ଅସଞ୍ଜତ ଅବସ୍ଥାରେ ଘରୁ ଉଦ୍ଧାର କରିଥିଲେ। ପରେ ଉଭୟଙ୍କୁ ରଶିରେ ବାନ୍ଧି ଗାଁ ଦାଣ୍ଡରେ ବୁଲାଇଥିଲେ। ଯାହାର ଭିଡିଓ ଏବେ ସୋଶାଲ ମିଡ଼ିଆରେ ଭାଇରାଲ୍ ହେଉଛି। ଏପରି ଚିତ୍ର ଅନୁଗୋଳ ଜିଲ୍ଲାରୁ ଆସିଛି। ମାତ୍ର ଏନେଇ ଥାନାରେ କୌଣସି ଅଭିଯୋଗ ହୋଇନାହିଁ।
ଦୁଇ ବର୍ଷ ତଳେ ତାଳଚେର ଥାନା ଅଞ୍ଚଳର ରେବୀ(ଛଦ୍ମନାମ)ଙ୍କ ସ୍ୱାମୀଙ୍କ ମୃତ୍ୟୁ ଘଟିଥିଲା। ସ୍ଵାମୀଙ୍କ ମୃତ୍ୟୁ ପରେ ସେ ଶାଶୂ ଘରେ ରହୁଥିଲେ। ଆଉ ଏକ ଘରୋଇ କମ୍ପାନୀରେ ଅସ୍ଥାୟୀ ସୁରକ୍ଷା କର୍ମୀ ଭାବେ କାମ କରୁଥିଲେ। ତେବେ ଏହାରି ଭିତରେ ତାଙ୍କର ସୋଶାଲ ମିଡ଼ିଆ ଫେସ୍ବୁକରେ ଜଣଙ୍କ ସହିତ ବନ୍ଧୁତା ସ୍ଥାପନ ହୋଇଥିଲା। ପରବର୍ତ୍ତୀ ସମୟରେ ବନ୍ଧୁତା ପ୍ରେମର ରୂପ ନେଇଥିଲା।
Also Read
ଆଜି ଘରେ ଶାଶୂ ଘର ଲୋକ କେହି ନଥିଲେ। ଏହାର ସୁଯୋଗ ନେଇ ରେବୀ ତାଙ୍କ ପ୍ରେମିକଙ୍କୁ ନିଜ ଘରକୁ ଡାକିଥିଲେ। ପ୍ରେମିକ ପ୍ରବର ଘର ଭିତରକୁ ଯାଉଥିବା ଦେଖି ଗାଁ ଲୋକେ କବାଟରେ ତାଲା ପକାଇ ଦେଇଥିଲେ। ପରେ ଏ ସମ୍ପର୍କରେ ଗାଁ ଲୋକେ ରେବୀ ଶାଶୂ ଘର ଲୋକଙ୍କୁ ଖବର ଦେଇଥିଲେ। ପରିବାର ଲୋକଙ୍କ ଉପସ୍ଥିତିରେ ଗାଁ ଲୋକେ କବାଟ ଖୋଲି ରେବୀ ଓ ତାଙ୍କ ପ୍ରେମିକଙ୍କୁ ଅସଞ୍ଜତ ଅବସ୍ଥାରେ ଉଦ୍ଧାର କରିଥିଲେ। ପରେ ଉଭୟଙ୍କୁ ଏକ ରଶିରେ ବାନ୍ଧି ଦେଇ ଗାଁ ଦାଣ୍ଡରେ ବୁଲାଇ ଥିଲେ। ତା’ପରେ ଗାଁ ମଝିରେ ଏକ ଖୁଣ୍ଟରେ ବାନ୍ଧି ପକାଇ ଥିଲେ। ସେହି ସମୟରେ ଗାଁ ଲୋକେ ଅଶ୍ଲିଳ ଭାଷାରେ ଗାଳି ଦେଇଥିଲେ ଓ ଭିଡିଓ ଉତ୍ତୋଳନ କରୁଥିଲେ। ସବୁଠାରୁ ଦୁଃଖଦ କଥା, ରେବୀଙ୍କୁ ମହିଳାମାନେ ଘରୁ ବାହାର କରି ରଶିରେ ବାନ୍ଧି ଗାଁ ଦାଣ୍ଡ ବୁଲାଉଥିଲେ।
ଯାହାର ଭିଡିଓ ଏବେ ସୋଶାଲ ମିଡ଼ିଆରେ ଭାଇରାଲ୍ ହେଉଛି। ମୋବାଇରୁ ମୋବାଇଲ ଘୂରି ବୁଲୁଛି। ପରବର୍ତ୍ତୀ ସମୟରେ ରେବୀଙ୍କୁ ଗାଁ ଛାଡ଼ି ପଳାଇଯିବାକୁ କୁହାଯାଇଥିଲା। ଗାଁ ସଭାପତି ଏପରି କହୁଥିବା ଭାଇରାଲ୍ ହେଉଥିବା ଭିଡିଓରେ ଦେଖିବାକୁ ମିଳୁଛି। ତେବେ ଏନେଇ ଗାଁ ସଭାପତିଙ୍କ ପ୍ରତିକ୍ରିୟା ନେବା ପାଇଁ ଚେଷ୍ଟା କରାଯାଇଥିଲା। ମାତ୍ର ତାଙ୍କର ପ୍ରତିକ୍ରିୟା ମିଳିପାରି ନାହିଁ। ଅନ୍ୟପକ୍ଷରେ ଏନେଇ ତାଳଚେର ଥାନାରେ କୌଣସି ଲିଖିତ ଅଭିଯୋଗ ହୋଇନଥିବା ଥାନା ଅଧିକାରୀ ଶ୍ରୀନିବାସ ସେଠୀ କହିଛନ୍ତି।
ସୁପ୍ରିମକୋର୍ଟଙ୍କ ନିର୍ଦ୍ଦେଶ ଅନୁସାରେ ସହମତି ଭିତ୍ତିରେ ପରକ୍ରିୟା ପ୍ରୀତି କୌଣସି ଅପରାଧ ହୋଇନଥିବା ବେଳେ ଗ୍ରାମବାସୀଙ୍କ କଙ୍ଗାରୁ କୋର୍ଟ ମାନବ ଅଧିକାର କ୍ଷୁଣ୍ଣ ହୋଇଥିବା ଏହି ଘଟଣା ରୁ ସ୍ପଷ୍ଟ ଜଣାପଡୁଛି।
ରିପୋର୍ଟ-ମାନିଲ୍ ମହାରଣା
TAGS
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
