କାମାକ୍ଷାନଗର(ବିଦ୍ୟାଧର ବରାଳ): ପୂର୍ବ ଶତ୍ରୁତା ନେଲା ରକ୍ତାକ୍ତ ସଂଘର୍ଷର ରୂପ । ମାମୁଁ ଘରେ ଥିବା ପୁତୁରାକୁ ଧରି ଘରକୁ ଫେରିବା ପରେ ଅତର୍କିତ ଆକ୍ରମଣର ଶିକାର ହେଲେ ଗୋଟିଏ ପରିବାରର ୩ ସଦସ୍ୟ । ପ୍ରାୟ ୨୦ରୁ ଊର୍ଦ୍ଧ୍ୱ ପ୍ରତିପକ୍ଷ ସେମାନଙ୍କୁ ଅତର୍କିତ ଭାବେ ଠେଙ୍ଗାରେ ପିଟିବା ସହ ଖଣ୍ଡାରେ ହାଣିଥିବାରୁ ୩ ଜଣଙ୍କ ଅବସ୍ଥା ସଙ୍କଟାପନ୍ନ ଅଛି। ଢେଙ୍କାନାଳ ଜିଲ୍ଲା ଭୁବନ ସୁରପ୍ରତାପପୁରରେ ଘଟିଛି ଏହି ଅଘଟଣ ।
ଏହି ଆକ୍ରମଣରେ ଉଭୟ ପକ୍ଷର ୫ ଜଣ ଆହତ ହୋଇଛନ୍ତି । ସେମାନଙ୍କ ମଧ୍ୟରୁ ଗୋଟିଏ ପରିବାରର ୩ ଜଣଙ୍କ ଅବସ୍ଥା ଗୁରୁତର ଥିବା ଜଣାପଡିଛି । ସେମାନେ ହେଲେ ଜୟପ୍ରକାଶ ରାଉତ, ଜିତେନ୍ଦ୍ର ରାଉତ ଓ ଶୁଭଙ୍କର ପ୍ରିୟଦର୍ଶୀ ରାଉତ ।
ଆହତ ଜିତେନ୍ଦ୍ର ରାଉତଙ୍କ ସୂଚନା ଅନୁଯାୟୀ, ପୁତୁରା ତା’ ମାମୁଁ ଘରେ ଥିବା ବେଳେ ତାକୁ ଧରି ଗାଁକୁ ଆସୁଥିଲୁ। ପଞ୍ଚାୟତ ଅଫିସ ନିକଟରେ ସରପଞ୍ଚଙ୍କ ସ୍ୱାମୀ ଜମନ ସାମଲ, ଦିଅର ଓ ପ୍ରାୟ ୨୦ରୁ ଊର୍ଦ୍ଧ୍ୱ ଦଳୀୟ ଲୋକ ରାସ୍ତାରେ ବାଉଁଶ ପକାଇ ଅଟକାଇଲେ। ଏହାପରେ ସେମାନେ ଅତର୍କିତ ଭାବେ ଆମମାନଙ୍କୁ ଠେଙ୍ଗାରେ ପିଟିବା ସହ ଖଣ୍ଡାରେ ହାଣି ଦେଲେ । ସେମାନେ ବୋମା ମାଡ଼ ସହ ଫାୟାରିଂ ବି କରିଥିଲେ। ସେମାନଙ୍କ ଆକ୍ରମଣରେ ସାନ ଭାଇର ହାତ, ମୁଣ୍ଡ ହାଣିଥିବା ବେଳେ ଠେଙ୍ଗା ମାଡ଼ରେ ପୁତୁରା ମୁଣ୍ଡ ଫାଟିଛି। ମୋ ଗୋଡ଼ ଭାଙ୍ଗିଛି।
ପ୍ରତିପକ୍ଷର ଆକ୍ରମଣରେ ଭଜମନ ଓ ତାଙ୍କର ଜଣେ ସମର୍ଥକ ଚିତ୍ରସେନ ସାହୁ ଗୁରୁତର ହୋଇ ଭୁବନ ମେଡିକାଲରେ ଚିକିତ୍ସିତ ହେଉଛନ୍ତି । ପୁଲିସ୍ ଘଟଣାର ତଦନ୍ତ ଆରମ୍ଭ କରିଥିବା ବେଳେ ପୂର୍ବ ଶତ୍ରୁତାରୁ ଏପରି କାଣ୍ଡ ଘଟିଥିବା ଅନୁମାନ କରିଛି। ଏହି ଘଟଣାରେ କାହାକୁ ଗିରଫ କରାଯାଇନି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
