ଗୋଳାବାରୁଦ କାରଖାନାରେ ବିସ୍ଫୋରଣ, ୨ ବରିଷ୍ଠ ଟେକ୍ନିସିଆନ ଗୁରୁତର

ବଲାଙ୍ଗିର ଜିଲ୍ଲା ବଡ଼ମାଳ ଗୋଳାବାରୁଦ କାରଖାନାରେ ବିସ୍ଫୋରଣ ହୋଇଛି। ବୋମା ତିଆରି ସମୟରେ ବିସ୍ପୋରଣ ଘଟି ଦୁଇ କର୍ମଚାରୀ ଗୁରୁତର ଆହତ ହୋଇଛନ୍ତି। ଆହତ ଦ୍ୱୟ କାରଖାନାର ୨ ବରିଷ୍ଠ ଟେକ୍ନିସିଆନ ବୋଲି ଜଣାପଡ଼ିଛି। ସେମାନଙ୍କୁ ରାଉରକେଲା ସ୍ଥାନାନ୍ତର କରାଯାଇଛି। ସେମାନେ ହେଲେ ଡି. ବି.ଡ଼ବ୍ଲୁ ଗୌତମ ମହାନନ୍ଦ ଏବଂ ଜଏଣ୍ଟ ୱାର୍କ ମ୍ୟାନେଜର ସରୋଜ କୁମାର ପଣ୍ଡା।

ମିଳିଥିବା ସୂଚନା ଅନୁସାରେ, ଆଜି ୟୁନିଟ -3 ରେ ଥିବାଗୋଳାବାରୁଦ କାରଖାନାରେ  ବୋମା ତିଆରି ପାଇଁ କେମିକାଲ ମିଶ୍ରଣ କରାଯାଉଥିଲା। ସେହି ସମୟରେ କୌଣସି କାରଣରୁ ହଠାତ ବିସ୍ଫୋରଣ ହୋଇଥିଲା। ଏଥିରେ ଗୌତମ ମହାନନ୍ଦ ଓ ସରୋଜ କୁମାର ପଣ୍ଡା ଗୁରୁତର ହୋଇଥିଲେ। ସେମାନଙ୍କୁ ପ୍ରଥମେ ବଡ଼ମାଳର ଆୟୁଧ ନିର୍ମାଣ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ଉଭୟଙ୍କ ଅବସ୍ଥା ଗୁରୁତର ହେବାରୁ ରାଉରକେଲା ସ୍ଥାନାନ୍ତର କରାଯାଇଛି।

ଗୌତମଙ୍କର ୨ଆଖି ଓ ଗୋଟିଏ ହାତରେ ଆଘାତ ଲାଗିଥିବା ବେଳେ ସରୋଜଙ୍କର ଗୋଟିଏ ଆଖି ଓ  ଦୁଇଟି ହାତରେ  ଆଘାତ ଲାଗିଛି।  ବିସ୍ଫୋରଣରେ ଉଭୟଙ୍କ ଶରୀର ୮୦ ପ୍ରତିଶତ ପୋଡ଼ିଯାଇଛି।