OR 
ଅତି ଅମାନବୀୟ ଭାବେ ପ୍ରାୟ ୬୦ଟି ଗାଈଙ୍କୁ ରାଜ୍ୟ ବାହାରକୁ ଏକ ଟ୍ରକ୍ରେ ଚାଲାଣ ହେଉଥିଲା। ଏହି ଗାଈ ବୋଝେଇ ଗାଡ଼ି ଦୁର୍ଘଟଣା ହେବା ପରେ ଉକ୍ତ ଅମାନବୀୟ ଘଟଣା ସମସ୍ତଙ୍କ ସାମ୍ନାକୁ ଆସିଛି। ବାଲେଶ୍ୱର ଜିଲ୍ଲା ଜଳେଶ୍ୱର-ଆମ୍ବଳିଅଠା ୧୬ ନମ୍ବର ଜାତୀୟ ରାଜପଥର ନନ୍ଦୀକା ନିକଟରେ ଆଜି ସକାଳେ ଏହି ଗୋରୁ ଗାଡ଼ି ଦୁର୍ଘଟଣା ଘଟିଛି। ସୂଚନା ପାଇବା ପରେ ଜଳେଶ୍ୱର ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ପଶ୍ଚିମବଙ୍ଗ ରେଜିଷ୍ଟେଶନ ଥିବା ଟ୍ରକ୍ରେ ଏହି ଗୋ-ଚାଲାଣ ହେଉଥିଲା।
ଏହି ଗୋରୁ ବୋଝେଇ ଗାଡ଼ି ଭଦ୍ରକରୁ ପଶ୍ଚିମବଙ୍ଗକୁ ଯାଉଥିଲା। ଟ୍ରକ୍ଟି ଭାରସ୍ୟାମ ହରାଇ ଏକ ଡମ୍ପରକୁ ଧକ୍କା ଦେଇଥିଲା। ପରେ ଗୋରୁ ବୋଝେଇ ଗାଡ଼ିର ଡ୍ରାଇଭର ଓ ହେଲପର ଫେରାର ହୋଇଯାଇଛନ୍ତି। ଜଳେଶ୍ୱର ପୁଲିସ ଗାଡ଼ିକୁ ଜବତ କରିଛି।
Also Read
ସେପଟେ ବାଲେଶ୍ୱର ଦେଇ ଥମି ବାର ନାଁ ନେଉନି ବେଆଇନ୍ ଗୋ-ଚାଲାଣ। ପୁଲିସ ଓ ମାଫିଆମାନଙ୍କ ମଧୁଚନ୍ଦ୍ରିକାରେ ପଶ୍ଚିମବଙ୍ଗକୁ ଗୋ-ଚାଲାଣ ହେଉଥିବା ଅଭିଯୋଗ ହୋଇଛି। ଯାହା ଅସନ୍ତୋଷର କାରଣ ହୋଇଛି। ଭଦ୍ରକ ଜିଲ୍ଲା ପାର ହେବା ପରେ ବାଲେଶ୍ୱର ଶେରଗଡ଼ ଟୋଲ ଗେଟ୍, ବସ୍ତା, ଜଳେଶ୍ୱର ପ୍ରଭୃତି ବିଭିନ୍ନ ଚେକ୍ ଗେଟ୍ ଦେଇ ପଶ୍ଚିମବଙ୍ଗକୁ ବେଆଇନ ଭାବେ ଗୋରୁ ଚାଲାଣ ହେଉଥିବା ଓ ଗୋ-ମାତାଙ୍କ ଉପରେ ନିର୍ମମ ଅତ୍ୟାଚାର କରାଯାଉଥିବା ବେଳେ ପୁଲିସ ଯାଞ୍ଚ ମୂଲ୍ୟହୀନ ହୋଇଥିବା ଗୋ-ସେବକମାନେ ଅଭିଯୋଗ କରିଛନ୍ତି। ତୁରନ୍ତ ବେଆଇନ ଗୋ-ଚାଲାଣକାରୀଙ୍କ ଉପରେ କଠୋର କାର୍ଯ୍ୟାନୁଷ୍ଠାନ ନେବାକୁ ଦାବି ହୋଇଛି।
ସେହିପରି ଢେଙ୍କାନାଳ ଜିଲ୍ଲା ତୁମୁସିଙ୍ଗା ଥାନା କାମାକ୍ଷାନଗର-ଢେଙ୍କାନାଳ ମୁଖ୍ୟ ରାସ୍ତାର ଗୋଦରବିଲି ଗାଁ ନିକଟରୁ ୨ଟି ବେଆଇନ୍ ଗୋରୁ ବୋଝେଇ ପିକଅପ ସହିତ ଗୋଟିଏ କାରକୁ ଜବତ କରିଛି ତୁମୁସିଙ୍ଗା ପୁଲିସ। କାର୍ ଓ ପିକ୍ଅପରେ ଥିବା ୫ ଜଣ ଗୋରୁ ଚୋରାଚାଲାଣକାରୀଙ୍କୁ ପୁଲିସ ଅଟକ ରଖିଛି। ଏହି ଦୁର୍ବୃତ୍ତମାନେ ଦୁଇଟି ପିକଅପରେ କାମାକ୍ଷାନଗରରୁ କଟକ ଅଞ୍ଚଳକୁ ବେଆଇନ ଗୋଚାଲାଣ କରୁଥିଲେ। ଦୀର୍ଘଦିନ ହେବ ଗୋ-ଚାଲାଣରେ ସକ୍ରିୟ ଥିଲେ ଏହି ଦୁର୍ବୃତ୍ତ ଗ୍ୟାଙ୍ଗ। ତୁମୁସିଙ୍ଗା ପୁଲିସ ଘଟଣାର ଅଧିକ ତଦନ୍ତ ଜାରି ରଖିଛି।
ରିପୋର୍ଟ- ଜଳେଶ୍ୱରରୁ ଅଜିତ କୁମାର ଦାସ ଓ କାମାକ୍ଷାନଗରରୁ ବିଦ୍ୟାଧର ବରାଳ
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
