ବାଲେଶ୍ୱର ଜିଲ୍ଲାର ବାହାନଗାଠାରେ ଭୟାବହ ଟ୍ରେନ ଦୁର୍ଘଟଣାର ତଦନ୍ତ ରିପୋର୍ଟକୁ ରେଳବାଇ ସାର୍ବଜନୀନ କରିବ ନାହିଁ । ରେଳବାଇ ନିରାପତ୍ତା କମିଶନ ଗତକାଲି ନିଜର ତଦନ୍ତ ରିପୋର୍ଟକୁ ରେଳବାଇ କୋର୍ଡଙ୍କ ନିକଟରେ ଦାଖଲ କରିଥିଲେ ମଧ୍ୟ ସିବିଆଇ ତଦନ୍ତ ଜାରି ରହିଥିବାରୁ ଏହି ରିପୋର୍ଟକୁ ସାର୍ବଜନୀନ କରାଯିବ ନାହିଁ ବୋଲି ରେଳବାଇ ସୂତ୍ରରୁ ଜଣାପଡ଼ିଛି । ତେବେ ଦାୟିତ୍ୱରେ ଥିବା ଅଧିକାରୀଙ୍କ ଅବହେଳା ଯୋଗୁ ବାହାନଗା ଦୁର୍ଘଟଣା ଘଟିଲା ବୋଲି ନିରାପତ୍ତା କମିଶନର ତାଙ୍କ ରିପୋର୍ଟରେ ଦର୍ଶାଇଥିବା ଅସମର୍ଥିତ ସୂତ୍ରରୁ ସୂଚନା ମିଳିଛି । ତେବେ ରେଳବାଇ ଏନେଇ କୌଣସି ସୂଚନା ଦେବାକୁ ମନା କରିଦେଇଛି ।
ଜାତୀୟ ଗଣମାଧ୍ୟମରେ ପ୍ରକାଶିତ ରିପୋର୍ଟ ଅନୁସାରେ, ବାହାନଗା ଟ୍ରେନ ଦୁର୍ଘଟଣାର ତଦନ୍ତ ଏବେ ସିବିଆଇ ଜାରି ରଖିଥିବାରୁ ରେଳବାଇ ନିରାପତ୍ତା କମିଶନଙ୍କ ତଦନ୍ତ ରିପୋର୍ଟ ଉଜାଗର ହେଲେ ତାହା ସିବିଆଇ ତଦନ୍ତକୁ ପ୍ରଭାବିତ କରିବ । ମାନବଜନିତ ତ୍ରୁଟି ଯୋଗୁ ଏହି ଦୁର୍ଘଟଣା ହୋଇଥିବା ତଥା ସିଗନାଲ, ଟେଲିକମ୍ ଓ ଟ୍ରାଫିକ ବିଭାଗ ଦାୟିତ୍ୱରେ ଥିବା କାର୍ଯ୍ୟରତ ଅଫିସରଙ୍କ ତ୍ରୁଟି ଯୋଗୁ ଦୁର୍ଘଟଣା ହେଲା ବୋଲି ରେଳବାଇ ନିରାପତ୍ତା କମିଶନ ତାଙ୍କ ରିପୋର୍ଟରେ ଦର୍ଶାଇଥିବା ଚର୍ଚ୍ଚା ହେଉଛି । ଏପରିକି ଟ୍ରେନ ଚଳାଚଳ ପାଇଁ ଷ୍ଟାଣ୍ଡାର୍ଡ ଅପରେସନ୍ ପ୍ରୋସିଜିଓର(ଏସଓପି) ମଧ୍ୟ ପାଳନ କରିବାରେ ଅଫିସରମାନେ ବିଫଳ ହୋଇଥିବା ଜଣାପଡ଼ିଛି ।
Also Read
ରେଳବାଇର ଜଣେ ବରିଷ୍ଠ ଅଧିକାରୀଙ୍କ ସୂତ୍ରକୁ ଉଦ୍ଧାର କରି ଜାତୀୟ ଗଣମାଧ୍ୟମ କହିଛି ଯେ, ସିବିଆଇ ତଦନ୍ତ ଜାରି ଥିବାରୁ ରେଳବାଇ ନିରାପତ୍ତା କମିଶନରଙ୍କ ତଦନ୍ତ ରିପୋର୍ଟକୁ ଉଜାଗର କରାଯିବ ନାହିଁ । ଏହି ରିପୋର୍ଟ ଆସିଲେ ସିବିଆଇ ତଦନ୍ତ ପ୍ରଭାବିତ ହେବାର ଆଶଙ୍କା ରହିଛି । ସିବିଆଇର ତଦନ୍ତ ରିପୋର୍ଟ ଆସିସାରିବା ପରେ ଉଭୟ ତଦନ୍ତ ରିପୋର୍ଟକୁ ତର୍ଜମା କରି ରେଳବାଇ ଆବଶ୍ୟକ ପଦକ୍ଷେପ ନେବ । ଦକ୍ଷିଣ ପୂର୍ବ ଜୋନର ରେଳବାଇ ନିରାପତ୍ତା କମିଶନର ଭାବେ ଏଏମ ଚୌଧୁରୀ ଏହି ଦୁର୍ଘଟଣାର ତଦନ୍ତ କରି ଗତକାଲି ରେଳବାଇ ବୋର୍ଡକୁ ପ୍ରଦାନ କରିଛନ୍ତି । ଶୁକ୍ରବାର ଏହି ରିପୋର୍ଟ ଉପରେ କୌଣସି ସୂଚନା ଦେବାକୁ ରେଳବାଇ ବୋର୍ଡର ଶୀର୍ଷ ଅଧିକାରୀମାନେ ମନା କରିଦେଇଛନ୍ତି ।
ଅନ୍ୟପକ୍ଷରେ, ଦୁର୍ଘଟଣାରେ ପ୍ରାଣ ହରାଇ ଏମ୍ସ ହସ୍ପିଟାଲର ଶବାଗାରରେ ଥିବା ପ୍ରାୟ ୮୧ଜଣ ମୃତ ଯାତ୍ରୀଙ୍କ ମଧ୍ୟରୁ ୨୯ଜଣଙ୍କ ଡିଏନଏ ରିପୋର୍ଟ ଆସିଛି । ଏହି ୨୯ଜଣଙ୍କ ସମ୍ପର୍କୀୟଙ୍କ ସହ ଯୋଗାଯୋଗ କରାଯାଇ ସେମାନଙ୍କୁ ଶବ ହସ୍ତାନ୍ତର କରିବା ପାଇଁ ଆଜି ସକାଳୁ ପ୍ରକ୍ରିୟା ଆରମ୍ଭ ହୋଇଛି। ରାଜ୍ୟ ସରକାର ନିଜ ଖର୍ଚ୍ଚରେ ମୃତ ଯାତ୍ରୀଙ୍କ ଶବକୁ ସେମାନଙ୍କର ଘରକୁ ପଠାଇବେ ଓ ଏଥିପାଇଁ ଭୁବନେଶ୍ୱର ମହାନଗର ନିଗମକୁ ଦାୟିତ୍ୱ ଦିଆଯାଇଛି ବୋଲି ବିଏମସ ପକ୍ଷରୁ ସୂଚନା ଦିଆଯାଇଛି ।
ସୂଚନାଯୋଗ୍ୟ, ଜୁନ୍ ୨ ତାରିଖରେ ବାହାନଗା ଷ୍ଟେସନ ବଜାରଠାରେ ଭୟାବହ ଟ୍ରେନ ଦୁର୍ଘଟଣାରେ ୧ହଜାରରୁ ଅଧିକ ଲୋକ ଆହତ ହୋଇଥିବାବେଳେ ଏପର୍ଯ୍ୟନ୍ତ ୨୯୩ଜଣଙ୍କ ମୃତ୍ୟୁ ହୋଇଛି ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
