ବାଲେଶ୍ୱର (ଓଡ଼ିଶା ରିପୋର୍ଟର): ବାଲେଶ୍ୱର ଡାକ୍ତରଖାନାରେ ୧୫ ଦିନ ଧରି ଶବ ପକାଇ ରଖାଯିବା ଖବର ପ୍ରସାରଣ ପରେ ଚେତିଛି ପ୍ରଶାସନ। ଶବ ବ୍ୟବଚ୍ଛେଦ ଘରେ ପଡିଥିବା ୫ଟି ମୃତେଦହ ମଧ୍ୟରୁ ୪ଟିକୁ ମ୍ୟୁନିସପାଲଟି ପକ୍ଷରୁ ସତ୍କାର ପାଇଁ ନିଆଯାଇଛି । ଆଉ ଗୋଟିଏ ମୃତଦେହର ମଧ୍ୟ ଶୀଘ୍ର ଅନ୍ତିମ ସଂସ୍କାର କରାଯିବ ବୋଲି ସୂଚନା ମିଳିଛି।
ଆଜି ସକାଳୁ ବାଲେଶ୍ୱର ଡାକ୍ତରଖାନାରେ ଅଭାବନୀୟ ଦୃଶ୍ୟ ଦେଖିବାକୁ ମିଳିଥିଲା । ଅଚିହ୍ନା ରୋଗୀଙ୍କ ମୃତ୍ୟୁ ପରେ ପାଞ୍ଚଟି ମୃତଦେହ ଗୁଡିକ ଗଦା କରି ରଖାଯାଇଥିଲା । ଶବ ସଂରକ୍ଷଣ କେନ୍ଦ୍ରରେ ମୃତଦେହ ରଖିବାକୁ ଜାଗା ନଥିବାରୁ ବ୍ୟବଚ୍ଛେଦ ଗୃହର ପାଖ କୋଠରୀରେ ରଖାଯାଇଥିଲା ମୃତଦେହ ।
ଜିଲ୍ଲା ମୁଖ୍ୟ ଡାକ୍ତରଖାନାରେ ଶବ ଉପରେ ଶବ ପକାଇ ରଖିବା ଘଟଣାକୁ ନେଇ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା । ମୃତଦେହର ଦାହ ସଂସ୍କାର ନକରି ପକାଇ ରଖିବା ଉପରେ ମେଡିକାଲ କର୍ତ୍ତୃପକ୍ଷ କହିଥିଲେ, ଅଚିହ୍ନା ଶବ ଦାହ ଦାୟିତ୍ୱ ପୁଲିସର । ସେପଟେ ପୌରପାଳିକାର ଟଙ୍କା ବାକିଥିବାରୁ ଶବ ଦାହ ହୋଇପାରୁନଥିବା କହିଥିଲା ପୁଲିସ।