ମେଲଣ ଦେଖି ଘରକୁ ଫେରିବା ବେଳେ ଏକ ଡିଜି ତଳେ ଚାପି ହୋଇ ଚାଲିଗଲା ଜଣେ ମହିଳାଙ୍କ ଜୀବନ। ବାଲେଶ୍ୱର ଜିଲ୍ଲା ସୋର ଥାନା କାନପୁର ଛକରେ ମଙ୍ଗଳବାର ଘଟିଛି ଏହି ଦୁର୍ଘଟଣା।
ମୃତ ମହିଳାଙ୍କ ନାଁ ଉର୍ମିଳା ଦାସ। ତାଙ୍କ ଘର କାନପୁର ଗାଁରେ। ସେ ଆଉ ଦୁଇ ଜଣଙ୍କ ସହିତ ମେଲଣି ଦେଖି ଘରକୁ ଫେରୁଥିଲେ। ଗାଁ ଛକ ଦେଇ ଯାଉଥିବା ବେଳେ ସେ ଦୁର୍ଘଟଣାର ଶିକାର ହୋଇଥିଲେ।
ସୋରରୁ କୁପାରୀ ଅଭିମୁଖେ ଏକ ପିକ୍ଅପ୍ ଗୋଟିଏ ଡିଜିକୁ ଟାଣି ଟାଣି ନେଉଥିଲା l ହେଲେ କାନପୁର ଛକ ନିକଟରେ ହଠାତ ପିକ୍ଅପ୍ରୁ ଡିଜିଟି ଅଲଗା ହୋଇଯାଇଥିଲା ଓ ଉର୍ମିଳାଙ୍କ ଉପରେ ଓଲଟି ପଡ଼ିଥିଲା। ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଥିଲା। ତାଙ୍କ ସହିତ ଯେଉଁ ଦୁଇ ଜଣ ଥିଲେ ସେମାନେ ସାମାନ୍ୟ ଆହତ ହୋଇଛନ୍ତି।
ଏହି ଦୁର୍ଘଟଣା ପରେ ଗାଁରେ ଉତ୍ତେଜନା ପ୍ରକାଶ ପାଇଥିଲା। ଉତ୍ତ୍ୟକ୍ତ ଲୋକେ ପିକ୍ଅପ୍ ଭ୍ୟାନ୍ଟିକୁ ପିଟି ଭାଙ୍ଗାରୁଜା କରିବା ସହିତ ପୋଡ଼ି ଦେଇଥିଲେ। ପୁଲିସ୍ ଓ ଅଗ୍ନିଶମ ବାହିନୀ ପହଞ୍ଚି ଲୋକଙ୍କୁ ବୁଝାସୁଝା କରିବା ସହିତ ନିଆଁକୁ ଆୟତ୍ତ କରିଥିଲେ। ତେବେ ଲୋକମାନେ ଶବ ରଖି ରାସ୍ତାରୋକ କରିଛନ୍ତି। ସେମାନେ ମୃତକଙ୍କ ପରିବାରକୁ ୧୦ ଲକ୍ଷ ଟଙ୍କା କ୍ଷତିପୂରଣ ଦେବାକୁ ଦାବି କରିଛନ୍ତି। ତହସିଲଦାର, ଆଇଆଇସି ପ୍ରମୁଖ ଗାଁରେ ପହଞ୍ଚି ଲୋକଙ୍କୁ ବୁଝାସୁଝା କରୁଛନ୍ତି।