ଭୁବନେଶ୍ୱର(ଓଡ଼ିଶା ରିପୋର୍ଟର): ସାପ୍ତାହିକ ସଟଡାଉନ୍ ଓ ରାତ୍ରିକାଳୀନ ଲକଡାଉନକୁ ଉଠାଇ ଆର୍ଥିକ ଓ ବ୍ୟବସାୟିକ କାରବାରକୁ ପ୍ରୋତ୍ସାହିତ କରିଥିବା ରାଜ୍ୟ ସରକାର ଆଜି ରାଜ୍ୟବ୍ୟାପୀ ରେଷ୍ଟୁରାଣ୍ଟ ଓ ବାର୍ ଖୋଲିବା ନିମନ୍ତେ ଅନୁମତି ଦେଇଛନ୍ତି।
ଏନେଇ ପର୍ଯ୍ୟଟନ ନିର୍ଦ୍ଦେଶକ ତଥା ଅତିରିକ୍ତ ସଚିବ ସଚିନ ରାମଚନ୍ଦ୍ର ଯାଦବ ଆଜି ଓଡ଼ିଶା ହୋଟେଲ ଆଣ୍ଡ ରେଷ୍ଟୁରାଣ୍ଟ ଆସୋସିଏସନ, ପଶ୍ଚିମଓଡ଼ିଶା ହୋଟେଲ ଆଣ୍ଡ ରେଷ୍ଟୁରାଣ୍ଟ ଆସୋସିଏସନ୍, ସମ୍ବଲପୁର, ଝାରସୁଗୁଡ଼ା ଓ ରାଉରକେଲା ହୋଟେଲ ଆଣ୍ଡ ରେଷ୍ଟୁରାଣ୍ଟ ଆସୋସିଏସନକୁ ଚିଠି ଲେଖି ଅଗଷ୍ଟ ୩୧ତାରିଖରେ ସ୍ୱତନ୍ତ୍ର ରିଲିଫ କମିଶନରଙ୍କ ଦ୍ୱାରା ଜାରି କୋଭିଡ୍-୧୯ ସଂକ୍ରମଣ ରୋକିବା ସଂକ୍ରାନ୍ତ ନିର୍ଦ୍ଦେଶନାମାର ଧାରା-୨ ଆଧାରରେ ଏସଓପି ପାଳନ କରି ରେଷ୍ଟୁରାଣ୍ଟ ଖୋଲିବାକୁ ପରାମର୍ଶ ଦେଇଛନ୍ତି। ତେବେ ଯେଉଁଠି କଣ୍ଟେନମେଣ୍ଟ ଜୋନ୍ ଘୋଷଣା ହୋଇଥିବ, ସେଠାରେ ରେଷ୍ଟୁରାଣ୍ଟ ଓ ବାର ଖୋଲିବା ଉପରେ ସ୍ଥାନୀୟ ପ୍ରଶାସନ ନିଷ୍ପତ୍ତି ନେବ।
ସୂଚନାଯୋଗ୍ୟ, ଅଗଷ୍ଟ ୩୧ତାରିଖରେ ସ୍ୱତନ୍ତ୍ର ରିଲିଫ କମିଶନର ଜାରି କରିଥିବା କୋଭିଡ୍ -୧୯ ସଂକ୍ରମଣ ରୋକିବାକୁ ନିର୍ଦ୍ଦେଶନାମା ବା ଗାଇଡ଼ଲାଇନରେ ରେଷ୍ଟୁରାଣ୍ଟ ଓ ବାର ଖୋଲିବା ସମ୍ପର୍କରେ କୌଣସି ସୂଚନା ଦିଆଯାଇ ନାହିଁ। କିନ୍ତୁ ପର୍ଯ୍ୟଟନ ବିଭାଗ ଏନେଇ ଆଜି ରିଲିଫ କମିଶନରଙ୍କ ଅଗଷ୍ଟ ୩୧ତାରିଖର ନିର୍ଦ୍ଦେଶରେ କ୍ଲଜ-୨(କଣ୍ଟେନମେଣ୍ଟ ଜୋନ୍ ବାହାରେ ବିଭିନ୍ନ ଗତିବିଧି)କୁ ଉଦ୍ଧାର କରି ରାଜ୍ୟବ୍ୟାପୀ ରେଷ୍ଟୁରାଣ୍ଟ ଓ ବାର ଖୋଲିବାକୁ ଅନୁମତି ଦେଇଛି। କୋଭିଡ୍-୧୯ ସଂକ୍ରମଣ ରୋକିବା ପାଇଁ କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ଦ୍ୱାରା ଜାରି ଏସଓପି ଏବଂ ଓଡ଼ିଶା ସରକାରଙ୍କ ଗାଇଡଲାଇନକୁ କଡ଼ାକଡ଼ି ପାଳନ ନିମନ୍ତେ ପର୍ଯ୍ୟଟନ ନିର୍ଦ୍ଦେଶକ ଶ୍ରୀ ଯାଦବ ପରାମର୍ଶ ଦେଇଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
