OR 
ମୁଣ୍ଡ ଝାଳ ତୁଣ୍ଡରେ ମାରି ଚାଷ କଲେ। ଦୁଇ ପଇସା ଅଶାରେ ଅମଳ ଧାନକୁ ସୋସାଇଟରେ ବିକ୍ରି କଲେ। ହେଲେ ସେମାନଙ୍କୁ ମିଳୁନି ଧାନବିକ୍ରି ଟଙ୍କା। ୩ ମାସ ଧରି ନିଜ ପରିଶ୍ରମର ମୂଲ୍ୟ ଅପେକ୍ଷାରେ ରହି ନିରାଶ ହେବା ପରେ ଏବେ ରାସ୍ତାକୁ ଓହ୍ଲାଇଛନ୍ତି ଭଦ୍ରକ ବାସୁଦେବପୁର ଅଞ୍ଚଳର ଚାଷୀ। ବିଷ ବୋତଲ ଧରି ଧାମରା ଜାମୁ ଝାଡ଼ି ରାସ୍ତାର ଚାନ୍ଦିମାଳ ଛକରେ ରାସ୍ତାରୋକ କରିଛନ୍ତି ଚାଷୀ।
ବାସୁଦେବପୁର ଅଞ୍ଚଳର ଚାଷୀମାନେ ଗଦି ସେବା ସମବାୟ ସମିତିରେ ଧାନ ଦେଇଥିଲେ। ଧାନ ଦେବାର କିଛି ଦିନ ଭିତରେ ଟଙ୍କା ମିଳିଯିବ ବୋଲି ସୋସାଇଟିର ସଂପାଦକ କହିଥିଲେ। ହେଲେ ସମିତିରେ ଧାନ ଦେବାର ୩ ମାସ ପରେ ମଧ୍ୟ ଚାଷୀଙ୍କ ଆକାଉଣ୍ଟକୁ ଟଙ୍କା ଆସିନାହିଁ। ସମବାୟ ସମିତିକୁ ଦୌଡ଼ି ଦୌଡ଼ି ଚାଷୀ ନୟାନ୍ତ ହେଲେ ମଧ୍ୟ ସଂପାଦକ ଧରା ଛୁଆଁ ଦେଉ ନାହାନ୍ତି। ଏନେଇ ଚାଷୀମାନେ ଜିଲ୍ଲାପାଳ ଏବଂ ସିଏସଓଙ୍କ ନିକଟରେ ଫେରାଦ ହେବା ପରେ ମଧ୍ୟ କୌଣସି ସୁଫଳ ମିଳିନଥିଲା। ଶେଷରେ ଚାଷୀମାନେ କିଛି ଉପାୟ ନ ପାଇ ବିଷ ବୋତଲ ଧାରି ଆଜି ରାସ୍ତାରୋକ କରିଛନ୍ତି। ଯଥାଶୀଘ୍ର ସମସ୍ୟାର ସମାଧାନ ନହେଲେ ଚରମ ନିଷ୍ପତ୍ତି ନେବାକୁ ଚାଷୀମାନେ ଚେତାବନୀ ଦେଇଛନ୍ତି।
Also Read
ଚାଷୀ ଜୟଦେବ ସାହୁ କହିଛନ୍ତି, ୩ ମାସ ହେବ ସୋସାଇଟିକୁ ଧାନ ଦେଲୁଣି, ହେଲେ ଏପର୍ଯ୍ୟନ୍ତ ପଇସା ମିଳିନାହିଁ। ପଇସା ପାଇଁ ଦୌଡ଼ି ଦୌଡ଼ି ନୟାନ୍ତ ହେଲୁଣି। ଆଜି ମିଳିବ, କାଲି ମିଳିବ ବୋଲି କହୁଛନ୍ତି। ଆମେ ମହାଜନ ପାଖରୁ ପଇସା ଆଣି ଧାନ ଚାଷ କରିଥିଲୁ। ଏବେ ମହାଜନ ଆସି ଆମ ଘରେ ବସୁଛି। ଆମ ପରିବାର କିପରି ଚଳିବ? ଧାନ ପଇସା ନ ମିଳିଲେ ବିଷ ପିଇ ଆତ୍ମହତ୍ୟା କରିବୁ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
