ଭଦ୍ରକ (ପାର୍ଥ ସାରଥୀ ନାୟକ): ବିନା ମାସ୍କ ଓ ହେଲମେଟରେ ଗାଡ଼ି ଚଳାଉଥିଲେ। ଧରା ନେଲା ପୁଲିସ। ଆଉ ଚେକିଂ କରୁ କରୁ ବାହାରିଲା ବିପୁଳ ପରିମାଣର ବ୍ରାଉନ୍ ସୁଗର। ଯାହାର ଆନୁମାନିକ ମୂଲ୍ୟ ୧ କୋଟି ଟଙ୍କାରୁ ଅଧିକ ହେବ ବୋଲି ଜଣାପଡ଼ିଛି। ଭଦ୍ରକ ଗ୍ରାମାଞ୍ଚଳ ପୁଲିସକୁ ମିଳିଛି ଏହି ସଫଳତା। ପୁଲିସ୍ ଏହି ମାମଲାରେ ଦୁଇ ଜଣଙ୍କୁ ଗିରଫ କରିଛି।
ଭଦ୍ରକ-ଆନନ୍ଦପୁର ୫୩ ନମ୍ବର ରାଜ୍ୟ ରାଜପଥର ରାନ୍ଦିଆ ପାୱାର ପ୍ଲାଣ୍ଟ ଛକ ନିକଟରେ ଗ୍ରାମାଞ୍ଚଳ ପୁଲିସ ଚେକିଂ ଚାଲିଥିଲା। ତେବେ ପୂର୍ବରୁ ବ୍ରାଉନସୁଗର ଚାଲାଣ ବିଷୟରେ ପୁଲିସ ଖବର ପାଇଥିଲା। ଏହି ସମୟରେ ଦୁଇ ଜଣ ଏକ ବାଇକରେ ବିନା ମାସ୍କ ଓ ବିନା ହେଲମେଟରେ ଆସୁଥିବା ଦେଖି ପୁଲିସ ମାଡି ବସିଥିଲା। ପରେ ପୁଲିସ ଉଭୟଙ୍କୁ କାବୁ କରି ଚେକିଂ କରିଥିଲା। ଚେକିଂ କରୁ କରୁ ଦୁଇ ଜଣଙ୍କ ନିକଟରୁ ମିଳିଥିଲା ବିପୁଳ ପରିମାଣର ବ୍ରାଉନସୁଗର।
ଜବତ ବ୍ରାଉନ ସୁଗାରର ପରିମାଣ ୧ କିଲୋ ୩୦ ଗ୍ରାମ ହେବ। ଯାହାର ଆନୁମାନିକ ମୂଲ୍ୟ ୧ କୋଟି ୩ ଲକ୍ଷ ଟଙ୍କା ବୋଲି ଭଦ୍ରକ ଏସପି ଚରଣ ସିଂ ମିନା ସୂଚନା ଦେଇଛନ୍ତି। ବ୍ରାଉନ୍ ସୁଗର ଚାଲାଣ ବେଳେ ଗିରଫ ହୋଇଥିବା ଅଭିଯୁକ୍ତ ହେଲେ ଭଦ୍ରକ ଗ୍ରାମାଞ୍ଚଳ ଥାନା ହାସିନପୁର ଅଞ୍ଚଳର ଶ୍ରୀକାନ୍ତ ପ୍ରଧାନ ଓରଫ ବଡ଼ପୁର ଓ ଅରୁଣ ସେଠି।
ତେବେ ସେମାନେ କେଉଁ ଠାରୁ ଏତେ ପରିମାଣର ବ୍ରାଉନସୁଗର ଆଣିଥିଲେ ଓ କେଉଁ ସ୍ଥାନକୁ ନେଇ ଯାଉଥିଲେ। ସେ ନେଇ ପୁଲିସ ଏବେ ତଦନ୍ତ ଆରମ୍ଭ କରିଛି। ଏହି ବ୍ରାଉନସୁଗାର ଜଳେଶ୍ୱରରୁ ଗଣିଜାଙ୍ଗ ଅଭିମୁଖେ ଯାଉଥିବା ଜଣାପଡ଼ିଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
