ଶିଶୁମାନଙ୍କ ସୁରକ୍ଷା ଓ ଭବିଷ୍ୟତ ସୁନିଶ୍ଚିତ କରିବା ପାଇଁ ରାଜ୍ୟ ସରକାର ‘ବିଜୁ ସୁରକ୍ଷା ଯୋଜନା’ ଓ ‘ଆଶୀର୍ବାଦ ଯୋଜନା କାର୍ଯ୍ୟକାରୀ କରୁଛନ୍ତି । କୋଭିଡ୍ ମହାମାରୀ ସମୟରେ ‘ଆଶୀର୍ବାଦ’ ଯୋଜନା ଲାଗୁ କରିଛନ୍ତି । ଏହି ଉଭୟ ଯୋଜନାରେ ଏପର୍ଯ୍ୟନ୍ତ ୫୦୯୫୨ଜଣ ଶିଶୁଙ୍କୁ ଚିହ୍ନଟ କରାଯାଇଛି । ସେମାନଙ୍କ ଯତ୍ନ ଓ ସୁରକ୍ଷା ପାଇଁ ମାସିକ ୧୦୦୦ରୁ ୨୫୦୦ଟଙ୍କା ପର୍ଯ୍ୟନ୍ତ ସହାୟତା ରାଶି ସେମାନଙ୍କ ବ୍ୟାଙ୍କ ଆକାଉଣ୍ଟରେ ଜମା କରାଯାଉଛି ବୋଲି ମହିଳା ଓ ଶିଶୁ ବିକାଶ ମନ୍ତ୍ରୀ ବାସନ୍ତୀ ହେମ୍ବ୍ରମ କହିଛନ୍ତି ।
ଆଜି ବିଧାନସଭାରେ ବିଧାୟକ ତାରାପ୍ରସାଦ ବାହିନୀପତିଙ୍କ ଏକ ପ୍ରଶ୍ନର ଲିଖିତ ଉତ୍ତର ଦେଇ ମନ୍ତ୍ରୀ ଶ୍ରୀମତୀ ହେମ୍ବ୍ରମ କହିଛନ୍ତି ଯେ, ରାଜ୍ୟରେ ୧୯୦୯୫ଜଣ ଶିଶୁ ନିଜର ପିତାମାତାଙ୍କୁ ହରାଇ ଗତ ୨ବର୍ଷ ମଧ୍ୟରେ ଶିଶୁ ମଙ୍ଗଳ ସମିତି ସମ୍ମୁଖରେ ଉପସ୍ଥିତ ହୋଇଛନ୍ତି । ସେମାନଙ୍କ ମଧ୍ୟରୁ କୋଭିଡ୍ ମହାମାରୀ ଯୋଗୁ ୧୦୮ଜଣ ଶିଶୁ ସେମାନଙ୍କ ପିତାମାତାଙ୍କୁ ହରାଇଛନ୍ତି । ତେବେ ବିଜୁ ସୁରକ୍ଷା ଯୋଜନା ଓ ଆଶୀର୍ବାଦ ଯୋଜନାରେ ଏପର୍ଯ୍ୟନ୍ତ ୫୦୯୫୨ଜଣ ଶିଶୁଙ୍କୁ ଚିହ୍ନଟ କରାଯାଇଛି । ସେମାନଙ୍କର ଯତ୍ନ ଓ ସୁରକ୍ଷା ପାଇଁ ସରକାର ଉଭୟ ପିତାମାତା ହରାଇଥିବା ଶିଶୁଙ୍କୁ ମାସିକ ୨୫୦୦ଟଙ୍କା, ଜଣେ ପିତା ଅବା ମାତାଙ୍କୁ ହରାଇଥିବା ଶିଶୁକୁ ମାସିକ ୧୫୦୦ଟଙ୍କା, ଉଭୟ ପିତା-ମାତାଙ୍କୁ ହରାଇ ଶିଶୁ ଯତ୍ନ ଅନୁଷ୍ଠାନରେ ଲାଳନପାଳନ ହେଉଥିବା ଶିଶୁଙ୍କୁ ମାସିକ ହଜାରେ ଟଙ୍କାରେ ସହାୟତା ରାଶି ସେମାନଙ୍କ ବ୍ୟାଙ୍କ ଖାତାରେ ଜମା କରାଯାଇଛି । ୧୦୮ଜଣ ପିଲାଙ୍କୁ ସ୍ପୋନରସିପ୍ ମିଳିଛି । ଏହି ଯୋଜନାରେ ଅନ୍ତର୍ଭୁକ୍ତ ହୋଇଥିବା ଶିଶୁମାନଙ୍କୁ ୧୮ବର୍ଷ ପୂରିବା ପର୍ଯ୍ୟନ୍ତ ସହାୟତା ପ୍ରଦାନ କରିବାର ବ୍ୟବସ୍ଥା ରହିଛି । ଏହାସହିତ ଶିଶୁମାନଙ୍କର ସମ୍ପତ୍ତିର ସୁରକ୍ଷା ପାଇଁ ମଧ୍ୟ ପଦକ୍ଷେପ ନିଆଯାଉଛି ।