ମୁଢ଼ି ଖାଇବାକୁ ଡାକିନେଇ ୯ ବର୍ଷିୟ ନାବାଳିକାକୁ ବଳାତ୍କାର

ମୁଢ଼ି ଖାଇବାକୁ ଡାକିନେଇ ଜଣେ ୯ ବର୍ଷିୟ ନାବାଳିକାକୁ ଦୁଷ୍କର୍ମ ଅଭିଯୋଗ। ମଞ୍ଚେଶ୍ୱର ଥାନା ପୁଲିସ ମାମଲାର ତଦନ୍ତ କରି ମଞ୍ଚେଶ୍ୱର ଜରଣସାହି ବସ୍ତିରୁ ଅଭିଯୁକ୍ତକୁ ଗିରଫ କରିଛି। ଅଭିଯୁକ୍ତ ଜଣକ ଏହି ବସ୍ତିରେ ରହୁଥିବା ୪୦ ବର୍ଷିୟ ଯୁଧିଷ୍ଠିର ସୋରେନ।

ଅଭିଯୋଗ ମୁତାବକ ଗତ ୧୨ ତାରିଖ ରାତିରେ ନାବାଳିକା ଜନକ ତା’ ଘର ନିକଟରେ ଖେଳୁଥିବା ବେଳେ ଅଭିଯୁକ୍ତ ମୁଢ଼ି ଖାଇବାକୁ ଡାକିନେଇ ଥିଲା। ପାଖ ପଡୋଶୀ ହୋଇଥିବାରୁ ନାବାଳିକା ଜଣକ ଅଭିଯୁକ୍ତ ସହ ଯାଇଥିଲା। ପରେ କୌଶଳ କରି ଅଭିଯୁକ୍ତ ଜଣକ ନାବାଳିକାକୁ ଘର ଠାରୁ ଦୂର ଏକ ନିଛାଟିଆ ସ୍ଥାନକୁ ନେଇ ବଳାତ୍କାର କରୁଥିବା।

ନାବାଳିକାର କାନ୍ଦ ଶୁଣି ସ୍ଥାନୀୟ କିଛି ବସ୍ତି ଲୋକ ସେଠାରେ ପହଞ୍ଚି ଅଭିଯୁକ୍ତକୁ କାବୁ କରିଥିଲେ। ଏଥିସହ ନାବାଳିକାକୁ ଉଦ୍ଧାର କରି ପରିବାର ଲୋକଙ୍କୁ ଖବର ଦେଇଥିଲେ। ଏନେଇ ପରିବାର ଲୋକେ ପରେ ମଞ୍ଚେଶ୍ୱର ଥାନାରେ ଏତଲା ଦେଇଥିଲେ। ପୁଲିସ ଏନେଇ ଏକ ମାମଲା ରୁଜୁ କରି ଅଭିଯୁକ୍ତକୁ ଗିରଫ କରି ଆଜି କୋର୍ଟ ଚାଲାଣ କରିଛି।

ଅଭିଯୁକ୍ତ ଜଣକ ଏହି ବସ୍ତିରେ ରହୁଥିବା ବେଳେ ଜଣେ ଶ୍ରମିକ ଭାବେ କାମ କରୁଥିବା ଜଣାପଡ଼ିଛି।