OR 
ରାଜ୍ୟରେ ଆଗୁଆ ନିର୍ବାଚନ ହେବାର ସମ୍ଭାବନା ନାହିଁ । ଇଭିଏମ୍ ମେସିନ୍ ଓଡ଼ିଶା ସମେତ ଦେଶର ବିଭିନ୍ନ ରାଜ୍ୟକୁୁ ପଠାଯିବା ହେଉଛି ଏକ ସାଧାରଣ ପ୍ରକ୍ରିୟା । ତେଣୁ ଆଗୁଆ ନିର୍ବାଚନକୁ ନେଇ ଖବର ପ୍ରସାରଣରୁ ଗଣମାଧ୍ୟମ ନିବୃତ୍ତ ରହିବା ଉଚିତ୍ ବୋଲି ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ(ସିଇଓ)ଙ୍କ କାର୍ଯ୍ୟାଳୟ ପକ୍ଷରୁ କୁହାଯାଇଛି ।
ରାଜ୍ୟର ବିଭିନ୍ନ ଜିଲ୍ଲାକୁ ଇଭିଏମ୍ ମେସିନ୍ ପଠାଯିବାକୁ ନେଇ ଗଣମାଧ୍ୟମରେ ଆଗୁଆ ନିର୍ବାଚନ ସଂକ୍ରାନ୍ତରେ ଚାଲିଥିବା କଳ୍ପନକଳ୍ପନା ଉପରେ ପ୍ରତିକ୍ରିୟା ରଖି ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ କାର୍ଯ୍ୟାଳୟର ପିଆରଓ କହିଛନ୍ତି ଯେ, ଇଭିଏମ ମେସିନର ଏକ ନିର୍ଦ୍ଦିଷ୍ଟ ସମୟସୀମା ରହିଛି । ଭବିଷ୍ୟତରେ ନିର୍ବାଚନକୁ ଦୃଷ୍ଟିରେ ରଖି ଫ୍ୟାକ୍ଟ୍ରିରେ ନିର୍ମାଣ ହେଉଥିବା ଇଭିଏମ୍ ମେସିନକୁ ଓଡ଼ିଶା ସମେତ ବିଭିନ୍ନ ରାଜ୍ୟକୁ ପଠାଯାଉଛି । ବିଭିନ୍ନ ସ୍ଥାନକୁ ଇଭିଏମ୍ ଆସିବା ଏକ ସାଧାରଣ ପ୍ରକ୍ରିୟା, ତେଣୁ ଆଗୁଆ ନିର୍ବାଚନ ନେଇ ଗଣମାଧ୍ୟମ କୌଣସି ଖବର ପ୍ରସାରଣ କରିବା ଅନୁଚିତ୍ ।
Also Read
ଉଲ୍ଲେଖଯୋଗ୍ୟ, ଗତ ମଙ୍ଗଳବାର ହାଇଦ୍ରାବାଦସ୍ଥିତ ଇଲେକ୍ଟ୍ରୋନିକସ କର୍ପୋରେସନ୍ ଅଫ ଇଣ୍ଡିଆ ଲିଃରୁ ୮୨୦୦ଟି ଇଭିଏମ୍ ମେସିନ୍ ପ୍ରଥମପର୍ଯ୍ୟାୟରେ ଓଡ଼ିଶା ଆସିଛି । ପୁରୀସ୍ଥିତ ୱେୟାରହାଉସକୁ ଏହି ଇଭିଏମ୍ ମେସିନ ଯିବାବେଳେ ସେଠାରେ ବିଭିନ୍ନ ଦଳର ପ୍ରତିନିଧିମାନେ ଉପସ୍ଥିତ ଥିଲେ । ଏତେ ପରିମାଣର ଇଭିଏମ୍ ମେସିନ୍ ଆସିବା ପରେ ରାଜ୍ୟରେ ଆଗୁଆ ବିଧାନସଭା ନିର୍ବାଚନ ହୋଇପାରେ ବୋଲି କଳ୍ପନାଜଳ୍ପନା ଲାଗି ରହିଥିଲା ।
ସୂଚନାଯୋଗ୍ୟ, ଧାର୍ଯ୍ୟ ସମୟସୀମା ଅର୍ଥାତ୍ ଆସନ୍ତା ୨୦୨୪ ଫେବୃୟାରୀ-ମାର୍ଚ୍ଚରେ ଓଡ଼ିଶାରେ ଏକକାଳୀନ ବିଧାନସଭା ଓ ଲୋକସଭା ନିର୍ବାଚନ ହେବାର ସମ୍ଭାବନା ରହିଛି । ଭୋଟଗ୍ରହଣ ପାଇଁ ରାଜ୍ୟର ୧୪୭ଟି ବିଧାନସଭା ଓ ୨୧ଟି ଲୋକସଭା ନିର୍ବାଚନମଣ୍ଡଳୀରେ ପ୍ରାୟ ୩୭୧୦୦ ବୁଥରେ ୯୫ହଜାର ଇଭିଏମ୍ ମେସିନର ଆବଶ୍ୟକତା ରହିଛି ।
TAGS
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
