OR 
ରାଜ୍ୟ ସରକାରଙ୍କ କ୍ୟାବିନେଟ୍ ମନ୍ତ୍ରୀ ଅଶୋକ ଚନ୍ଦ୍ର ପଣ୍ଡାଙ୍କ ରାଜ୍ୟ ସରକାରର କେଉଁ ବିଭାଗର ମନ୍ତ୍ରୀ ଅଛନ୍ତି ସେ ସମ୍ପର୍କରେ ରାଜ୍ୟର ଉନ୍ନୟନ କମିଶନର ଅନୁ ଗର୍ଗ ଅବଗତ ନାହାନ୍ତି । ଆପଣ ହୁଏତ ବିଶ୍ୱାସ କରିନପାରନ୍ତି । କିନ୍ତୁ ଏହା ସତ । ଆଜି ଦୁବାଇରେ ‘ଓଡ଼ିଶା ଦିବସ’ ପାଳନବେଳେ ଏଭଳି ଅକ୍ଷମଣୀୟ ତ୍ରୁଟି ପଦାକୁ ଆସିଛି । କେବଳ ସେତିକି ନୁହେଁ ‘ଓଡ଼ିଶା ଦିବସ’ ପାଳନ ସମାରୋହରେ ରାଜ୍ୟର ବିଧାୟକ ଓ ସାଂସଦମାନେ ଉପସ୍ଥିତ ଥିଲେ ମଧ୍ୟ ନିଜ ଉଦଘାଟନୀ ଅଭିଭାଷଣରେ ‘ଓଡ଼ିଶା ପରିବାର’ ନିର୍ଦ୍ଦେଶକ ଦିଲ୍ଲୀପ ରାଉତରାୟ ସେମାନଙ୍କୁ ଅଣଦେଖା କରିବାକୁ ପଛାଇ ନାହାନ୍ତି । ଏପରିକି ପ୍ରବାସୀ ଓଡ଼ିଆଙ୍କ ଆଗରେ ସରକାରୀ ପ୍ରୋଟୋକଲକୁ ଅଣଦେଖା କରି ସେଠାରେ ଉପସ୍ଥିତ ଥିବା ଓଡ଼ିଶାର ଅଫିସରମାନଙ୍କ ନାଁକୁ ଜଣ ଜଣ କରି ସମ୍ବୋଧିତ କରିଥିବାବେଳେ ସର୍ବଶେଷରେ ଏଠାରେ ଉପସ୍ଥିତ ଥିବା ‘ବିଧାୟକ ଓ ସାଂସଦମାନେ’ କହି ନିଜର କର୍ତ୍ତବ୍ୟ ସମ୍ପାଦନ କରିଥିବା ଜଣାପଡ଼ିଛି ।
ସୂଚନା ଅନୁସାରେ, ଆଜି ଦୁବାଇର ତାରକା ହୋଟେଲ ‘ଲେ ମରିଡିଆନ୍ ’ଠାରେ ଓଡ଼ିଶା ସରକାର ଓ ଦୁବାଇସ୍ଥିତ ଭାରତର କନସୁଲେଟ୍ ଜେନେରାଲ କାର୍ଯ୍ୟାଳୟ ପକ୍ଷରୁ ‘ଓଡ଼ିଶା ଦିବସ’ ପାଳନ ହେଉଛି । ଗତକାଲି ଭୁବନେଶ୍ୱରରୁ-ଦୁବାଇରୁ ସିଧାସଳଖ ଆନ୍ତର୍ଜାତିକ ବିମାନକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଲୋକାର୍ପଣ କରିବା ପରେ ସେହି ବିମାନରେ ଦୁବାଇ ଗସ୍ତ କରିଥିବା ରାଜ୍ୟର ୨୫ରୁ ଅଧିକ ବିଜେଡି ବିଧାୟକ ଓ ସାଂସଦଙ୍କ ସମେତ ବିଭିନ୍ନ ବିଭାଗର ସରକାରୀ ଅଫିସର ଓ ସେମାନଙ୍କ ପରିବାର ସଦସ୍ୟମାନେ ଆଜି ସନ୍ଧ୍ୟାରେ ମଧ୍ୟପ୍ରାଚ୍ୟ ରାଷ୍ଟ୍ରଗୁଡ଼ିକରେ ରହୁଥିବା ପ୍ରବାସୀ ଓଡ଼ିଆମାନଙ୍କ ସହ ଦୁବାଇର ଏକ ତାରକା ହୋଟେଲରେ ‘ଓଡ଼ିଶା ଦିବସ’ପାଳନ କରିଛନ୍ତି ।
Also Read
ଏହି ଉତ୍ସବକୁ ରାଜ୍ୟ ସରକାରଙ୍କ ବିଜ୍ଞାନ ଓ କାରିଗର କୌଶଳ,ସାଧାରଣ ଉଦ୍ୟୋଗ, ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତିକରଣ ବିଭାଗର କ୍ୟାବିନେଟ୍ ମନ୍ତ୍ରୀ ଅଶୋକ ଚନ୍ଦ୍ର ପଣ୍ଡା ଆନୁଷ୍ଠାନିକ ଭାବେ ଉଦଘାଟନ କରିଛନ୍ତି । ଏହି ଉତ୍ସବରେ ଅନ୍ୟତମ ଅତିଥି ଭାବେ କନସଲେଟ ଜେନେରାଲ ଅମନ ପୁରୀ ଓ ରାଜ୍ୟ ଉନ୍ନୟନ କମିଶନର ଅନୁ ଗର୍ଗ ସଭା ମଂଚରେ ଉପସ୍ଥିତ ଥିଲେ । କିନ୍ତୁ ରାଜ୍ୟ ସରକାରଙ୍କ ଉନ୍ନୟନ କମିଶନର ଅନୁ ଗର୍ଗ ନିଜ ଅଭିଭାଷଣର ପ୍ରାରମ୍ଭରେ ମନ୍ତ୍ରୀ ଶ୍ରୀ ପଣ୍ଡାଙ୍କୁ ‘ରାଜ୍ୟ ସଂସ୍କୃତି ଓ ଭାଷା ବିଭାଗର ମନ୍ତ୍ରୀ’ ଭାବେ ଅଭିହିତ କରିଥିଲେ । ରାଜ୍ୟର ଜଣେ କ୍ୟାବିନେଟ ମନ୍ତ୍ରୀଙ୍କ ବିଭାଗ ସମ୍ପର୍କରେ କିଭଳି ରାଜ୍ୟ ପ୍ରଶାସନର ‘ନମ୍ବର ଟୁ’ ପଦବୀ(ଉନ୍ନୟନ କମିଶନର) ଜାଣିନାହାନ୍ତି ଅବା ଉଦ୍ଦେଶ୍ୟମୂଳକ ଭାବେ ଏପରି ସମ୍ବୋଧିତ କଲେ ତାକୁ ନେଇ ସାଧାରଣରେ ପ୍ରଶ୍ନ ଉଠିଛି । ସେହିପରି ଶ୍ରୀମତୀ ଗର୍ଗ ରାଜ୍ୟର ବିଧାୟକ ଓ ସାଂସଦମାନେ ଉପସ୍ଥିତ ଥିଲେ ବି ସେମାନଙ୍କ ସମ୍ମାନରେ ପଦେଦୁଇପଦ ବି ଅବା ସମ୍ବୋଧିତ କରିନଥିବା ଦେଖିବାକୁ ମିଳିଛି ।
ସେହିପରି ‘ଓଡ଼ିଶା ପରିବାର’ ନିର୍ଦ୍ଦେଶକ ଶ୍ରୀ ରାଉତରାୟ ସେହି ‘ଓଡ଼ିଶା ଦିବସ’ରେ ଉପସ୍ଥିତ ଥିବା ରାଜ୍ୟ ସରକାରଙ୍କ ପ୍ରତ୍ୟେକ ଅଫିସରଙ୍କ ନାଁ ଧରି ସମ୍ବୋଧିତ କରିଥିଲେ । ତା’ପରେ ଶେଷରେ ଏଠାରେ ଉପସ୍ଥିତ ଥିବା ‘ବିଧାୟକ ଓ ସାଂସଦ’ କଥା କହି ‘ଧର୍ମକୁ ଆଖିଠାର ଭଳି’ କର୍ତ୍ତବ୍ୟ ସମ୍ପାଦନ କରିଥିଲେ ।
ପ୍ରବାସୀ ଓଡ଼ିଆଙ୍କ ସମ୍ମୁଖରେ ବିଦେଶ ମାଟିରେ ଜଣେ କ୍ୟାବିନେଟ୍ ମନ୍ତ୍ରୀ ଓ ଅନ୍ୟ ବିଧାୟକ-ସାଂସଦମାନଙ୍କ ସମ୍ମାନରେ ସାଧାରଣ ପ୍ରୋଟୋକଲ କାହିଁକି ପାଳନ ହେଲାନି ତାହା ଏବେ ପ୍ରଶ୍ନ ଉଠିଛି ।
ଏହି କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ଭିକେ ପାଣ୍ଡିଆନ ପ୍ରବାସୀ ଓଡ଼ିଆଙ୍କ ସହ ବିଭିନ୍ନ ପ୍ରସଙ୍ଗରେ ୱାନଟୁୱାନ୍ ଆଲୋଚନା କରିଥିଲେ । ଏହି ସମସ୍ତ କାର୍ଯ୍ୟକ୍ରମର ସିଧାସଳଖ ପ୍ରସାରଣ ସୋସିଆଲ ମିଡିଆ ମାଧ୍ୟମରେ ହୋଇଥିଲା ।
ସୂଚନାଯୋଗ୍ୟ, ଏହି କାର୍ଯ୍ୟକ୍ରମରେ ରାଜ୍ୟସଭା ସାଂସଦ ସୁଜିତ୍ କୁମାର, ବିଧାୟକ ଦେବୀପ୍ରସାଦ ମିଶ୍ର, ଅରୁଣ ସାହୁ, ସରକାରୀ ମୁଖ୍ୟ ସଚେତକ ପ୍ରଶାନ୍ତ ମୁଦୁଲି, ବିଧାୟକ ସଞ୍ଜିବ ମଲ୍ଲିକ, ପ୍ରଣବ ବଳବନ୍ତରାୟ, ବ୍ୟୋମକେଶ ରାୟ, ବିକ୍ରମ ପଣ୍ଡା, ଲତିକା ପ୍ରଧାନ ପ୍ରମୁଖ ଉପସ୍ଥିତ ଥିଲେ ।
TAGS
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
