OR 
ରାଜ୍ୟରେ ୭୦ଲକ୍ଷ ମହିଳାଙ୍କୁ ସ୍ୱୟଂ ସହାୟକ ଗୋଷ୍ଠୀରେ ସାମିଲ କରି ସେମାନଙ୍କର ଆର୍ଥିକ ଓ ସାମାଜିକ ସ୍ୱାବଲମ୍ବୀ ଏବଂ ପଂଚାୟତିରାଜ ବ୍ୟବସ୍ଥାରେ ମହିଳାଙ୍କୁ ୫୦ ପ୍ରତିଶତ ସଂରକ୍ଷଣ ଦେଇ ‘ମହିଳା ସଶକ୍ତିକରଣ’ର ଡିଣ୍ଡିମ ପିଟୁଥିବା ନବୀନ ପଟ୍ଟନାୟକ ସରକାରର ଅସଲ ଚେହେରା ପଦାରେ ପଡ଼ିଛି । ଜଣେ ମହିଳାଙ୍କୁ ବ୍ଲକ ଅଧ୍ୟକ୍ଷା(ପଂଚାୟତ ସମିତି ଅଧ୍ୟକ୍ଷା) ପଦରେ ଆସୀନ କରାଇ ତାଙ୍କ ସ୍ୱାମୀ ନିଜେ ବିଭିନ୍ନ ସରକାରୀ ଫାଇଲରେ ଦସ୍ତଖତ କରୁଥିବା ଭଳି ସଙ୍ଗୀନ ଅଭିଯୋଗ ଆସିଛି । ଆଉ ଏସବୁ ଦସ୍ତଖତ ଥିବା ସରକାରୀ ଫାଇଲ କିଭଳି ବିଧିସମ୍ମତ ହେଉଛି ଓ ଏହା ଉପରେ ସ୍ଥାନୀୟ ବିଡିଓ କିମ୍ବା ଅନ୍ୟ ବ୍ଲକସ୍ତରୀୟ ପ୍ରଶାସନିକ ଅଧିକାରୀମାନେ କାହିଁକି ଆପତ୍ତି ଉଠାଉନାହାନ୍ତି ତାକୁ ନେଇ ପ୍ରଶ୍ନ ଉଠିଛି । ଏହାସହିତ ଏଭଳି ଜାଲ୍ ଦସ୍ତଖତରେ ଯେଉଁ ସବୁ ନିଷ୍ପତ୍ତି ନିଆଯାଇଛି ତା’ର ବୈଧତା ଉପରେ ମଧ୍ୟ ପ୍ରଶ୍ନବାଚୀ ସୃଷ୍ଟି ହୋଇଛି । ସବୁଠୁ ଆଶ୍ଚର୍ଯ୍ୟର କଥା ହେଉଛି, ସ୍ଥାନୀୟ ବିଧାୟିକାଙ୍କ ଜାଣତରେ ଏଭଳି ବେଆଇନ କାର୍ଯ୍ୟ ଚାଲିଥିବା ଜଣାପଡ଼ିଛି ।
ମିଳିଥିବା ସୂଚନା ଅନୁସାରେ, ବରଗଡ଼ ଜିଲ୍ଲାର ପଦ୍ମପୁର ବିଧାନସଭା ନିର୍ବାଚନମଣ୍ଡଳୀର ଝାରବନ୍ଧ ବ୍ଲକର ପଂଚାୟତସମିତି ଅଧ୍ୟକ୍ଷା ଭାବେ ଲିପସା ପ୍ରଧାନ କାର୍ଯ୍ୟ କରୁଛନ୍ତି । କିନ୍ତୁ ପଂଚାୟତସମିତି ଅଧ୍ୟକ୍ଷା(ବ୍ଲକ ଚେୟାରମ୍ୟାନ) ଭାବେ ସେ ଯେଉଁସବୁ ସରକାରୀ ଫାଇଲରେ ଦସ୍ତଖତ କରିବା କଥା ତାହା ସେ କରନ୍ତି ନାହିଁ । ତାଙ୍କ ସ୍ୱାମୀ ବିଜୟ ପ୍ରଧାନ ବ୍ଲକର ବିଭିନ୍ନ ସରକାରୀ ଫାଇଲରେ ସ୍ୱାକ୍ଷର କରିଥାନ୍ତି । ତା’ପୁଣି ଲିପସାଙ୍କ ଜାଲ୍ ଦସ୍ତଖତ । ଏ ସଂକ୍ରାନ୍ତ ଭିଡିଓ ‘ଓଡ଼ିଶା ରିପୋର୍ଟର’ର ହସ୍ତଗତ ହୋଇଛି, ଯେଉଁଥିରେ ବିଜୟ ନିଜେ ସରକାରୀ ଫାଇଲରେ ଦସ୍ତଖତ କରୁଥିବା ସ୍ୱୀକାର କରିଛନ୍ତି । କେବଳ ସେତିକି ନୁହେଁ ଗତ ଏପ୍ରିଲ ୧୫ତାରିଖରେ ଝାରବନ୍ଧ ପଂଚାୟତସମିତି ବୈଠକରେ କିଛି ସମିତି ସଭ୍ୟ ଏଭଳି ଅଭିଯୋଗ ଉତଥାପନ କରିଥିଲେ ।
Also Read
ବ୍ଲକ ଚେୟାରମ୍ୟାନ୍ କାହିଁକି ଅଫିସ ଆସୁନାହାନ୍ତି ଓ ତାଙ୍କ ପରିବର୍ତ୍ତେ ସ୍ୱାମୀ ବିଜୟ ପ୍ରଧାନ ବିଭିନ୍ନ ସରକାରୀ ଫାଇଲରେ ଦସ୍ତଖତ କରୁଛନ୍ତି, ଯାହାକି ବେଆଇନ ବୋଲି ଅଭିଯୋଗ କରିଥିଲେ । ଛୋଟଅନକି ପଂଚାୟତର ସମିତି ସଭ୍ୟ ସତ୍ୟମ ପ୍ରଧାନ ସେହି ବୈଠକରେ ଏହି ଅଭିଯୋଗ କରିବା ସହ ବିଭିନ୍ନ ଉନ୍ନତିମୂଳକ କାର୍ଯ୍ୟ ସଂକ୍ରାନ୍ତ ଫାଇଲରେ ଚେୟାରମ୍ୟାନଙ୍କ ସ୍ୱାମୀଙ୍କ ଦସ୍ତଖତ କିଭଳି ବୈଧ ବୋଲି ପ୍ରଶ୍ନ କରିଥିଲେ । ମାତ୍ର ସେହି ବୈଠକରେ ଉପସ୍ଥିତ ଥିବା ନବନିର୍ବାଚିତ ବିଧାୟିକା ବର୍ଷା ସିଂ ବରିହା ଏହି ଅଭିଯୋଗ ଶୁଣିବା ପରିବର୍ତ୍ତେ ସମ୍ପୃକ୍ତ ସମିତି ସଭ୍ୟଙ୍କୁ ନାଲି ଆଖି ଦେଖାଇ ଚୁପ୍ ରହିବାକୁ ତାଗିଦ୍ କରିଥିଲେ । ଏପରିକି ବୈଠକରୁ ବାହାରି ଯିବାକୁ (ଗେଟ୍ ଆଉଟ୍ )ମଧ୍ୟ କହିଥିବା ଶ୍ରୀ ପ୍ରଧାନ ଅଭିଯୋଗ କରିଛନ୍ତି ।
ତେବେ ପ୍ରଶ୍ନ ଉଠୁଛି, ନବୀନ ପଟ୍ଟନାୟକ ସରକାର ରାଜ୍ୟରେ ମହିଳା ସଶକ୍ତିକରଣର ଡିଣ୍ଡିମ ପିଟୁଥିବାବେଳେ ଜଣେ ମହିଳା ବ୍ଲକ୍ ଚେୟାରମ୍ୟାନଙ୍କ ପତି କିଭଳି ସରକାରୀ ଫାଇଲରେ ଦସ୍ତଖତ କରୁଛନ୍ତି ଓ ଏସବୁ ଜାଲ୍ ଦସ୍ତଖତ ବଳରେ ସରକାରୀ କାର୍ଯ୍ୟ କିପରି ସମ୍ପାଦନ ହେଉଛି ତାହା ବୁଦ୍ଧିଜୀବୀଙ୍କୁ ଆଶ୍ଚର୍ଯ୍ୟ କରିଛି । ଆଉ ଏସବୁ ବିଷୟରେ ପଂଚାୟତସ୍ତରର ଜନପ୍ରତିନିଧିମାନେ ମୁହଁ ଖୋଲିଲେ ସେମାନଙ୍କୁ ନାଲି ଆଖି ଦେଖାଇ ଚୁପ୍ ରହିବାକୁ ବିଧାୟିକା ଓ ସ୍ଥାନୀୟ ପ୍ରଶାସନ ତାଗିଦ୍ କରିବା ପରୋକ୍ଷରେ ରାଜ୍ୟରେ ଅଗଣତାନ୍ତ୍ରିକ ଶାସନର ସଙ୍କେତ ଦେଉଛି । ଝାରବନ୍ଧ ବ୍ଲକର ବିଡିଓ କିଭଳି ଏପରି ଜାଲ୍ ଦସ୍ତଖତ ସଂକ୍ରାନ୍ତ ଫାଇଲ ଉପରେ ଆପତ୍ତି ଉଠାଉନାହାନ୍ତି ତାହା ତଦନ୍ତସାପେକ୍ଷ । ନବନିର୍ବାଚିତ ବିଧାୟିକା ଶ୍ରୀମତୀ ସିଂ ବରିହା ଏଭଳି ବେଆଇନ କାର୍ଯ୍ୟକୁ ପ୍ରଶୟ ଦେବା ପଛରେ କ’ଣ ରହସ୍ୟ ରହିଛି ଓ ଜଣେ ନାରୀ ହୋଇ କାହିଁକି ଅନ୍ୟ ଜଣେ ନାରୀ ନେତ୍ରୀ(ବ୍ଲକ ଚେୟାରମ୍ୟାନ)ଙ୍କୁ ତାଙ୍କର କ୍ଷମତାରୁ ବଂଚିତ ରହିବା ପାଇଁ ପରୋକ୍ଷରେ ସୁଯୋଗ ସୃଷ୍ଟି କରୁଛନ୍ତି ତାହା ବି ସନ୍ଦେହଘେରରେ ।
ସୂଚନାଯୋଗ୍ୟ, କ୍ଷମତାସୀନ ବିଜେଡି ସରକାର ମହିଳା ସଶକ୍ତିକରଣର ଡିଣ୍ଡିମ ପିଟୁଥିଲେ ମଧ୍ୟ ‘ଭାତ ହାଣ୍ଡିରୁ ଗୋଟିଏ ଭାତ ଚାଖିବା’ ଭଳି ରାଜ୍ୟର ବିଭିନ୍ନ ଭାଗରେ ଏଭଳି ଅବସ୍ଥା ରହିଥିବା ଜଣାପଡ଼ିଛି । ମାତ୍ର ଝାରବନ୍ଧ ବ୍ଲକରେ ସରକାରୀ ଦସ୍ତାବିଜରେ ଜାଲ୍ ଦସ୍ତଖତ(ପ୍ରକୃତ ବ୍ୟକ୍ତିଙ୍କର ନୁହେଁ) ଉପରେ କାହିଁକି ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନି ଓ ଏଭଳି ଜାଲିଆତିରେ ସମ୍ପୃକ୍ତ ବ୍ଲକ ଚେୟାରମ୍ୟାନ୍ ଏବଂ ତାଙ୍କ ସ୍ୱାମୀଙ୍କ ବିରୁଦ୍ଧରେ ଆଇନଗତ କାର୍ଯ୍ୟାନୁଷ୍ଠାନ ପାଇଁ ସବୁ ମହଲରେ ଦାବି ହେଉଛି ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
