OR 
ମହାପ୍ରଭୁ ଶ୍ରୀଜଗନ୍ନାଥଙ୍କ ରତ୍ନଭଣ୍ଡାର ଖୋଲିବା ପାଇଁ ବିଜେପି ଦାବି କରିଛି ବିଜେପି। ଏଥିସହ ଜଷ୍ଟିସ ରଘୁବୀର ଦାସ କମିଶନଙ୍କ ରିପୋର୍ଟକୁ ସାର୍ବଜନୀନ କରିବାକୁ ଦାବି ହୋଇଛି।
ଗୁରୁବାର ବିଜେପି ରାଜ୍ୟ ମୁଖପାତ୍ର ପିତାମ୍ବର ଆଚାର୍ଯ୍ୟ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ, ଓଡ଼ିଆ ଜାତିର ଆରାଧ୍ୟ ଦେବତା ମହାପ୍ରଭୁ ଶ୍ରୀଜଗନ୍ନାଥଙ୍କର ଅମୂଲ୍ୟ ସମ୍ପତି ସୁରକ୍ଷିତ ନେଇ ୧୯୫୫ରେ ଆଇନ ପ୍ରଣୟନ କରାଯାଇଥିଲା । ଶ୍ରୀଜୀଉଙ୍କ ରତ୍ନଭଣ୍ଡାର ୨୦୧୮ମସିହା ଅପ୍ରେଲ ୩ ତାରିଖରେ ହାଇକୋର୍ଟଙ୍କ ନିର୍ଦ୍ଦେଶରେ ଏକ ବଡ଼ ଅନୁଧ୍ୟାନକାରୀ ଦଳ ଧଳା ଲୁଗା ପିନ୍ଧି ଅରୁଆ ଖାଇ କୂଅରେ ଗାଧୋଇ ମନ୍ଦିର ଭିତରକୁ ପ୍ରବେଶ କଲେ ରତ୍ନଭଣ୍ଡାର ଖୋଲିବା ପାଇଁ। କିନ୍ତୁ ପାଖରେ ଚାବିକାଠି ନଥିଲା ।
ଏପ୍ରିଲ ୪ତାରିଖରେ ତତକାଳୀନ ଜିଲ୍ଲାପାଳ ଅରବିନ୍ଦ ଅଗ୍ରୱାଲ ବିବୃତି ଦେଲେ, ରତ୍ନଭଣ୍ଡାର ଚାବି ମିଳୁନି । ଏହାପରେ ସାରା ରାଜ୍ୟରେ ଆନ୍ଦୋଳନ ହେଲା ଓ ପ୍ରତିବାଦର ସ୍ୱର ଉଠିଲା । ଜନତା,ବିରୋଧୀ ଓ ଗଣମାଧ୍ୟମ ସହ ରାଜ୍ୟ ସରକାର ଲୁଚକାଳି ଖେଳିଲେ । ବିଜେପିର ତୀବ୍ର ଆନ୍ଦୋଳନ ପରେ ରାଜ୍ୟ ସରକାର ପ୍ରାୟ ୨ମାସ ପରେ ଜୁନ୍ ୬ରେ ଜଷ୍ଟିସ୍ ରଘୁବୀର ଦାସ କମିଶନ ଗଠନ କଲେ । ବିଜେପି ସେହି ସମୟରେ କମିଶନଙ୍କ ବିଶ୍ୱସନୀୟତା ଉପରେ ପ୍ରଶ୍ନ ଉଠାଇଥିଲା । ଏହି କମିଶନରୁ କିଛି ସୁଫଳ ମିଳିବ ନାହିଁ ବୋଲି ବିଜେପି ଆଶଙ୍କା ପ୍ରକାଶ କରିଥିଲା । ଆଜି ପୁନର୍ବାର ସେହି କଥାକୁ ଦୋହରାଇ ଏ ସରକାର ଏକ କମିଶନ ସର୍ବସ୍ୱ ସରକାର ବୋଲି ଶ୍ରୀ ଆଚାର୍ଯ୍ୟ କହିଛନ୍ତି ।
Also Read
ଏ ସରକାରର ସବୁବେଳେ କମିଶନ ଦରକାର । ରାଜ୍ୟରେ ପାଇଖାନା, ବାସଗୃହ, ବିଧବା-ବାର୍ଦ୍ଧକ୍ୟ ଭତା ଓ ଯୁବକଙ୍କୁ ଚାକିରୀ ଦେବାରେ ସବୁ ସ୍ତରରେ କମିଶନ କାରବାର ବ୍ୟାପକ ମାତ୍ରାରେ ଚାଲିଛି । ଶେଷରେ ଏ କମିଶନ ସର୍ବସ୍ୱ ସରକାର ମହାପ୍ରଭୁ ଜଗନ୍ନାଥଙ୍କ ପାଖରେ ମଧ୍ୟ କମିଶନ ଶବ୍ଦଟିକୁ ଲଗାଇବାକୁ ପଛାଇଲେ ନାହିଁ । ଜଷ୍ଟିସ୍ ରଘୁବୀର ଦାସ କମିଶନ ପାଇଁ ରାଜ୍ୟ ସରକାର ୨୨ଲକ୍ଷ ଟଙ୍କାରୁ ଊର୍ଦ୍ଧ୍ୱ ଖର୍ଚ୍ଚ କରିବାର ୬ମାସ ପରେ ଗୋଟିଏ ରିପୋର୍ଟ ସାମ୍ନାକୁ ଆସିଲା । ରତ୍ନଭଣ୍ଡାର ଚାବି ପ୍ରସଙ୍ଗରେ ସେତେବେଳେ ବିଜେପି ମାମଲା ରୁଜୁ କରିବା ପରେ ଜିଲ୍ଲାପାଳ ନାଟକ କରି କହିଲେ, "ରେକର୍ଡ ରୁମ୍ରୁ ଗୋଟିଏ ଡୁପ୍ଲିକେଟ୍ ଚାବି ମିଳିଲା’ । ୪୫ ବର୍ଷରୁ ଊର୍ଦ୍ଧ୍ୱ ସମୟ ଓଡ଼ିଶା ସରକାର ରତ୍ନଭଣ୍ଡାର ଚାବିକୁ ହଜେଇ ଦେଇଛନ୍ତିି ବୋଲି ୨୦୧୮ରେ ଜଣାପଡ଼ଲା ।
ରାଜ୍ୟ ସରକାର ପ୍ରଥମତଃ ସ୍ୱୀକାର କଲେ ଅରଜିନାଲ ଚାବି ହଜିଛି ଓ ଚାବି ମିଳିଛି । ଯଦି ପ୍ରକୃତ ସେ ଚାବିର ଡୁପ୍ଲିକେଟ୍ ଚାବି ହୋଇଥାଏ ତାହେଲେ ରତ୍ନଭଣ୍ଡାର ଖୋଲିବାର ପ୍ରତିବନ୍ଧକ ରହିଲା କେଉଁଠି? ୫ ବର୍ଷ ଧରି ଗୋଟିଏ ଡୁପ୍ଲିକେଟ୍ ଚାବିକୁ ପାଇଥିବା ସରକାର ତାହା ସତରେ ଅର୍ଜିନାଲ ଚାବିର ଡୁପ୍ଲିକେଟ୍ କି ନୁହେଁ ରାଜ୍ୟବାସୀଙ୍କୁ ସ୍ପଷ୍ଟୀକରଣ ଦିଅନ୍ତୁ ଓ ତୁରନ୍ତ ରତ୍ନଭଣ୍ଡାର ଖୋଲି ହାଇକୋର୍ଟଙ୍କ ନିର୍ଦ୍ଦେଶକୁ ପାଳନ କରନ୍ତୁ ବୋଲି ଶ୍ରୀ ଆଚାର୍ଯ୍ୟ ଦାବି କରିଛନ୍ତି । ଏହାସହିତ ଜଷ୍ଟିସ୍ ରଘୁବୀର ଦାସ କମିଶନଙ୍କ ରିପୋର୍ଟରେ କ'ଣ ଅଛି ରାଜ୍ୟ ସରକାର ତାହା ଆଜି ପର୍ଯ୍ୟନ୍ତ ପ୍ରକାଶ କଲେ ନାହିଁ ।
ଆଇନ ଅନୁଯାୟୀ ୬ ମାସ ଭିତରେ ରାଜ୍ୟ ସରକାର କମିଶନ ଇନକ୍ୱାରି ରିପୋର୍ଟ କଣ କଣ ଆବଶ୍ୟକ ପଦକ୍ଷେପ ନେଇଛନ୍ତିି ତାହାକୁ ବିଧାନସଭା ଗୃହରେ ଉପସ୍ଥାପନ କରିବାର ନିୟମ ରହିଛି । କିନ୍ତୁ ତାହା ରାଜ୍ୟ ସରକାର କରିନାହାନ୍ତିି । ଏଥିରୁ ରାଜ୍ୟ ସରକାରଙ୍କ ବିଧାନସଭା ଉପରେ ଏବଂ ଜନପ୍ରତିନିଧିମାନଙ୍କ ଉପରେ ତିଳେ ମାତ୍ର ଭରସା ଓ ବିଶ୍ୱାସ ନାହିଁ ବୋଲି ଜଣାପଡ଼ୁଛି । ଯଥାଶୀଘ୍ର ରାଜ୍ୟ ସରକାର ଜଷ୍ଟିସ ରଘୁବୀର ଦାସ କମିଶନଙ୍କ ରିପୋର୍ଟକୁ ଶୀତଳଭଣ୍ଡାରରେ ନରଖି ରିପୋର୍ଟ ଉପରେ କଣ ପଦକ୍ଷେପ ନେଇଛନ୍ତିି ତାହାକୁ ବିଧାନସଭାରେ ଉପସ୍ଥାପନ କରନ୍ତୁ ବୋଲି ବିଜେପି ଦାବି କରିଛି ।
ଏହି ସାମ୍ବାଦିକ ସମ୍ମିଳନୀରେ ବିଜେପି ନେତା ଦିଲୀପ ମଲ୍ଲିକ, ରାଜେନ୍ଦ୍ର ପଣ୍ଡା, ଉମାକାନ୍ତ ପଟ୍ଟନାୟକ,ଆଶ୍ରିିତ ପଟ୍ଟନାୟକ ପ୍ରମୁଖ ଉପସ୍ଥିତ ଥିଲେ ।
TAGS
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
