ଭୁବନେଶ୍ୱର(ଓଡ଼ିଶା ରିପୋର୍ଟର): ଧାମନଗର ଉପନିର୍ବାଚନରେ ଭୋଟରଙ୍କୁ ସ୍ୱୟଂ ସହାୟକ ଗୋଷ୍ଠୀ(ଏସଏଚଜି) ସହାୟତାରେ ବିଜେଡି ଅନୈତିକ ଉପାୟରେ ଟଙ୍କା ବାଂଟୁଛି ବୋଲି ବିଜେପି ଅଭିଯୋଗ କରିଛି । ଏହାସହିତ ନିର୍ବାଚନ ସରିବା ପର୍ଯ୍ୟନ୍ତ ଏସଏଚଜି ଗ୍ରୁପର ବ୍ୟାଙ୍କ ଆକାଉଣ୍ଟକୁ ଫ୍ରିଜ୍ କରିବାକୁ ଦଳ ଦାବି କରିଛି ।
ବିଜେପିର ଏକ ପ୍ରତିନିଧି ଦଳ ଆଜି ରାଜ୍ୟ ମୁଖ୍ୟ ନିର୍ବାଚନ ଅଧିକାରୀଙ୍କୁ ଭେଟି ଅଭିଯୋଗ କରିଛନ୍ତି ଯେ, ଭୋଟରଙ୍କୁ ପ୍ରଭାବିତ କରିବା ପାଇଁ ଶାସକ ବିଜେଡି ଅତୀତରେ ପୁଲିସ, ଆମ୍ବୁଲାନ୍ସର ସହାୟତାରେ ଟଙ୍କା ବାଂଟୁଥିବାର ଅନେକ ନଜିର ଅତୀତରେ ଦେଖିବାକୁ ମିଳିଛି । ଏବେ ଆଉ ଗୋଟିଏ ପାଦ ଆଗେଇ ଆସି ସ୍ୱୟଂ ସହାୟକ ଗୋଷ୍ଠୀଙ୍କ (ଏସଏଚଜି) ସହାୟତାରେ ବିଜେଡି ଅନୈତିକ ଉପାୟରେ ବ୍ୟାପକ ଟଙ୍କା ବାଂଟୁଛି । ଏହା ଦ୍ୱାରା ଅବାଧ, ମୁକ୍ତ ଓ ନିରପେକ୍ଷ ନିର୍ବାଚନ ଆଦୌ ସମ୍ଭବ ନୁହେଁ । ତେଣୁ ନିର୍ବାଚନ ପ୍ରକ୍ରିୟା ଶେଷ ହେବା ଯାଏଁ ନିର୍ବାଚନମଣ୍ଡଳୀ ଅନ୍ତର୍ଗତ ସମସ୍ତ ଏସ୍ଏଚ୍ଜି ଗ୍ରୁପର ବ୍ୟାଙ୍କ ଆକାଉଂଟକୁ ଫ୍ରିଜ କରାଯିବାକୁ ବିଜେପି ଦାବି କରୁଛି ।
କେବଳ ସେତିକି ନୁହେଁ ଧାମନଗର ବିଧାନସଭା ମଣ୍ଡଳୀରେ କାର୍ଯ୍ୟରତ ଏମବିକେ, ସିଆରପି ଭଳି ସରକାରୀ କର୍ମଚାରୀମାନଙ୍କୁ ବିଜେଡି କ୍ଷମତାର ଅପବ୍ୟବହାର କରି ଭୋଟରଙ୍କୁ ଟଙ୍କା ବାଂଟିବାର କାର୍ଯ୍ୟରେ ନିୟୋଜିତ କରୁଛି । ଶାସକ ବିଜେଡି ମିଶନଶକ୍ତି ଜରିଆରେ ଏମବିକେ ଓ ସିଆରପିମାନଙ୍କୁ ଲଗାଇ ସ୍ୱୟଂ ସହାୟିକା ଗୋଷ୍ଠୀମାନଙ୍କ ସମ୍ମିଳନୀ କରାଇ ଭୋଟ୍ ପାଇଁ ପ୍ରଭାବିତ କରୁଛି । ଗତ ପଂଚାୟତ, ପୌର ନିର୍ବାଚନ ଓ ବ୍ରଜରାଜନଗର ସମୟରେ ଏଭଳି ଅନେକ ଘଟଣାମାନ ସାମ୍ନାକୁ ଆସିଥିଲା ଏବଂ ଏ ସଂପର୍କରେ ରାଜ୍ୟ ନିର୍ବାଚନ କମିଶନଙ୍କୁ ଅବଗତ କରାଯାଇଥିଲେ ସୁଦ୍ଧା କିଛି ସୁଫଳ ମିଳିଲା ନାହିଁ। ବରଂ ନିରବଦ୍ରଷ୍ଟା ସାଜି ଶାସକ ବିଜେଡି ସପକ୍ଷରେ ଭୋଟ୍ କରାଇବା କାର୍ଯ୍ୟରେ ଏସଏଚଜି କର୍ମଚାରୀଙ୍କୁ ଅଧିକ ପ୍ରୋତ୍ସାହିତ କରାଯାଇଥିଲା । ତେଣୁ ଅବାଧ, ମୁକ୍ତ ଓ ନିରପେକ୍ଷ ନିର୍ବାଚନ ପରିଚାଳନା ନିମନ୍ତେ ଆୟୋଗ ତୁରନ୍ତ ବିହିତ ପଦକ୍ଷେପ ଗ୍ରହଣ କରିବାକୁ ବିଜେପି ଦାବି କରିଛି ।
ଏହି ପ୍ରତିନିଧି ଦଳରେ ବିଜେପି ରାଜ୍ୟ ସାଧାରଣ ସମ୍ପାଦିକା ଲେଖାଶ୍ରୀ ସାମନ୍ତସିଂହାରଙ୍କ ସମେତ ରାଜ୍ୟ ମୁଖପାତ୍ର ସୋନାଲୀ ସାହୁ, ଜୟନ୍ତ ଜେନା ଓ ସୁଜିତ କୁମାର ଦାସ ପ୍ରମୁଖ ସାମିଲ ଥିଲେ ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
