ଭୁବନେଶ୍ୱର (ଓଡ଼ିଶା ରିପୋର୍ଟର): ଓଡ଼ିଶାରେ ୨୯ଲକ୍ଷ ନୂଆ ଚାକିରିର ଆବଶ୍ୟକତା ଥିବାବେଳେ ବିଜେଡି ସରକାର ଗୋଟିଏ ବି ଚାକିରି ସୃଷ୍ଟି କରିବା ଦିଗରେ ପଦକ୍ଷେପ ନେଇନି ବୋଲି ପିସିସି ସଭାପତି ନିରଞ୍ଜନ ପଟ୍ଟନାୟକ ଅଭିଯୋଗ କରିବା ସଙ୍ଗେ ସଙ୍ଗେ ଚାକିରି ଅନ୍ୱେଷଣରେ ପ୍ରତିବର୍ଷ ଲକ୍ଷ ଲକ୍ଷ ଓଡ଼ିଆ ରାଜ୍ୟ ବାହାରକୁ ପଳାୟନ କରୁଥିବା ତଥ୍ୟକୁ ନେଇ କଟାକ୍ଷ କରିଛନ୍ତି।
ଓଡ଼ିଶାରେ ୨୯ଲକ୍ଷ ନୂଆ ଚାକିରିର ଆବଶ୍ୟକତା ଥିବା ନେଇ ପିଡବ୍ଲ୍ୟୁସି ପକ୍ଷରୁ ଏକ ରିପୋର୍ଟ ପ୍ରକାଶ ପାଇବା ପରେ ରାଜ୍ୟର କ୍ଷମତାସୀନ ବିଜେଡି ସରକାରକୁ କଡ଼ା ଭାଷାରେ ସମାଲୋଚନା କରିଛନ୍ତି। ରାଜ୍ୟରେ ଯେଉଁ ସବୁ ଶିଳ୍ପ ଥିଲା ତାକୁ ନଷ୍ଟ କରିଥିବାବେଳେ ଶିଳ୍ପ ପ୍ରତି ବୈମାତୃକ ମନୋଭାବ ଯୋଗୁ ବିଜେଡି ସରକାର ଗୋଟିଏ ବି ଚାକିରି ସୃଷ୍ଟି କରିପାରିନି। ଚାକିରି ଆଶାରେ ଓଡ଼ିଶାରୁ ପ୍ରତିବର୍ଷ ଲକ୍ଷ ଲକ୍ଷ ଓଡ଼ିଆ ଅନ୍ୟ ରାଜ୍ୟକୁ ପଳାୟନ କରୁଛନ୍ତି। ଗତ ୧୮ବର୍ଷ ଧରି ଏହି ସଂଖ୍ୟା ବଢ଼ିବାରେ ଲାଗିଛି। ବିଜେଡି ସରକାର ଯୋଗୁ ରାଜ୍ୟରେ କିଭଳି ବିକାଶ ହୋଇଛି ତାହା ଏଥିରୁ ଜଣାପଡ଼ୁଛି।
ଶ୍ରୀ ପଟ୍ଟନାୟକ କହିଛନ୍ତି ଯେ, ୨୦୦୭ ମସିହାରେ ଚାକିରି ଅନ୍ୱେଷଣରେ ୫୫ହଜାର ଲୋକ ରାଜ୍ୟ ବାହାରକୁ ଯାଇଥିବାବେଳେ ୨୦୦୮ ମସିହାରେ ୮୭ହଜାର, ୨୦୧୨ ମସିହାରେ ୧ଲକ୍ଷ ୫ହଜାର, ୨୦୧୩ରେ ୧ଲକ୍ଷ ୨୦ହଜାର, ୨୦୧୪ରେ ୧ଲକ୍ଷ ୩୫ହଜାର ଓ ୨୦୧୫ରେ ୧ଲକ୍ଷ ୪୬ହଜାର ଲୋକ ରାଜ୍ୟ ବାହାରକୁ ଚାକିରି ଅନ୍ୱେଷଣରେ ଯାଇଛନ୍ତି। ଏହା ବିଜେଡି ସରକାର ଦ୍ୱାରା ରାଜ୍ୟରେ ରୋଜଗାର ସୃଷ୍ଟି ଦିଗରେ ପଦକ୍ଷେପର ନଗ୍ନ ଚିତ୍ର ବୋଲି ନିରଞ୍ଜନ କଟାକ୍ଷ କରି କହିଛନ୍ତି।
ଚାକିରୀ
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
