ଚଉରା ପୂଜା କରୁଥିଲେ ମହିଳା, ଚେନ୍‌ ଝାମ୍ପି ନେଲା ଲୁଟେରା

ଭୁବନେଶ୍ୱର (ଓଡ଼ିଶା ରିପୋର୍ଟର): ଘର ପରିସରରେ ଚଉରା ମୂଳେ ପୂଜା କରୁଥିବା ବେଳେ ଲୁଟ୍‌ର ଶିକାର ହୋଇଛନ୍ତି ଜଣେ ମହିଳା। ଲୁଟେରା ପୂରା ସନ୍ତର୍ପଣରେ ଆସି ତାଙ୍କ ବେକ୍‌ରୁ ଚେନ୍ ଟାଣି ନେଇଗଲା। ଘଟଣାଟି ଘଟିଛି ରାଜଧାନୀ ଭୁବନେଶ୍ୱରରେ। ଆଉ ସିସିଟିଭିରେ କଏଦ ହୋଇଛି ଏହି ଦୃଶ୍ୟ।

ନୟାପଲ୍ଲୀ ଥାନା ଅନ୍ତର୍ଗତ ଆଇଆରସି ଭିଲେଜରେ ରହୁଥିବା ଜଣେ ମହିଳା ଗତ ସୋମବାର ଦିନ ତୁଳସୀ ଚଉରା ମୂଳେ ପୂଜା କରୁଥିଲେ। ଏହି ସମୟରେ ଲୁଟେରା ଜଣକ ତାଙ୍କ ଘର ନିକଟରେ ବୁଲାବୁଲି କରୁଥିଲା। ସେ କିଛି ସମୟ ଏପଟେ ସେପଟ ଚାହିଁଥିଲା। ଉକ୍ତ ଘର ଆଖପାଖ ରାସ୍ତାରେ ସେତେବେଳେ ଆଉ କେହି ନ ଥିଲେ। ଏହାର ସୁଯୋଗ ନେଇ ଲୁଟେରା ଗେଟ୍‌ ବାହାରୁ ହାତ ବଢ଼ାଇ ତୁଳସୀ ଚଉରା ମୂଳେ ପୂଜା କରୁଥିବା ମହିଳାଙ୍କ ବେକରୁ ଚେନ୍‌ ଛିଣ୍ଡାଇ ଚମ୍ପଟ ମାରିଥିଲା।

ଘଟଣା ସମ୍ପର୍କରେ ମହିଳାଙ୍କ ପରିବାର ଲୋକେ ନୟାପଲ୍ଲୀରେ ଥାନାରେ ଅଭିଯୋଗ କରିଛନ୍ତି। ପୁଲିସ ସିସିଟିଭି ଆଧାର କରି ଘଟଣାର ତଦନ୍ତ କରୁଛି। କମିଶନରେଟ୍‌ ପୁଲିସ୍‌କୁ ଲୁଟେରାଙ୍କ ଏହା ଖୋଲା ଚ୍ୟାଲେଞ୍ଜ ବୋଲି ଆଲୋଚନା ହେଉଛି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।