ଯାଜପୁର(ଅଭୟ ପତି): ସ୍ୱଚ୍ଛ ଓଡ଼ିଶା, ସ୍ୱଚ୍ଛ ସହର । ସ୍ୱଚ୍ଛତା ଦିଗରେ ଆଉ ପାଦେ ଆଗେଇଛି ଯାଜପୁର ଜିଲ୍ଲାର ପ୍ରମୁଖ ସହର ବ୍ୟାସନଗର । ସହର ପରିମଳ ବ୍ୟବସ୍ଥା ସଜାଡିବା ଲାଗି ଏକ ଅଭିନବ ପ୍ରୟାସ ଆରମ୍ଭ କରିଛି ପୌର ପରିଷଦ । ପ୍ରଥମ କରି ସହରରେ ଅଳିଆ ଆବର୍ଜନା ଉଠାଇବା ପାଇଁ ଗଡିଛି ବ୍ୟାଟେରୀ ଚାଳିତ ଗାଡି । ଆଉ ଏହି ଗାଡି ଚଳାଉଛନ୍ତି ମହିଳା ।
ବିଭିନ୍ନ ସ୍ୱୟଂ ସହାୟକ ଗୋଷ୍ଠୀ ଜରିଆରେ ମହିଳାମାନଙ୍କୁ ଚୟନ କରାଯାଇ ପ୍ରଥମେ ପ୍ରଶିକ୍ଷଣ ଦିଆଯାଇଥିଲା । ପ୍ରଶିକ୍ଷଣ ସରିବା ପରେ ସେମାନଙ୍କୁ ଏଥିରେ ନିଯୁକ୍ତି ଦିଆଯାଇଛି । ପ୍ରତିଦିନ ସକାଳୁ ପ୍ରଶିକ୍ଷିତ ମହିଳାମାନେ ବ୍ୟାଟେରୀ ଚାଳିତ ଗାଡ଼ି ନେଇ ବିଭିନ୍ନ ୱାର୍ଡ଼କୁ ଯାଇ ଘର ଘର ବୁଲି ଅଳିଆ ଆବର୍ଜନା ସଂଗ୍ରହ କରୁଛନ୍ତି । ଶୁଖିଲା ଓ ଓଦା ଆବର୍ଜନା ସଂଗ୍ରହ ପାଇଁ ଉକ୍ତ ଗାଡ଼ିରେ ଅଲଗା ଅଲଗା ବ୍ୟବସ୍ଥା ରହିଛି । ଚାଳକଙ୍କ ସହ ସ୍ୱଚ୍ଛ ସାଥୀର ଜଣେ ସଦସ୍ୟା ଯାଇ ଲୋକଙ୍କୁ ସଚେତନ ମଧ୍ୟ କରୁଛନ୍ତି । ମହିଳାମାନେ କହିଛନ୍ତି, “ଆମେ ଘରେ ବସିଥିଲୁ । ସରକାରଙ୍କ ଏହି ଯୋଜନା ଲାଗି ଦୁଇ ପଇସା ରୋଜଗାର ମିଳିଲା । ଆମେ ନିଜେ ସ୍ୱାବଲମ୍ବୀ ହୋଇପାରିଲୁ । ଏଥିପାଇଁ ଆମେ ବେଶ୍ ଖୁସି ।”
ସେପଟେ ପୌର ପ୍ରଶାସନର ଏଭଳି ପଦକ୍ଷେପକୁ ସହରବାସୀ ସ୍ୱାଗତ କରିଛନ୍ତି । ପୂର୍ବରୁ ଘର ବାହାରେ ଅଳିଆ ଆବର୍ଜନା ପଡିରହି ଦୁର୍ଗନ୍ଧମୟ ପରିବେଶ ସୃଷ୍ଟି ହେବା ସହ ପ୍ରଦ୍ୟୁଷଣ ବଢୁଥିଲା । ହେଲେ ଏବେ ପ୍ରତିଦିନ ଗାଡ଼ି ଆସି ଘରୁ ଆବର୍ଜନା ସଂଗ୍ରହ କରି ନେଉଥିବାରୁ ପୌର ସଂସ୍ଥା ଓ ସରକାରଙ୍କୁ ଧନ୍ୟବାଦ ଜଣାଇଛନ୍ତି ପୌରବାସିନ୍ଦା ।
ଏଥିପାଇଁ ୨୧ଟି ବ୍ୟାଟେରୀ ଚାଳିତ ଗାଡିକୁ ଆବର୍ଜନା ସଂଗ୍ରହ କାର୍ଯ୍ୟରେ ନିୟୋଜିତ କରାଯାଇଛି । ନାରୀ ସଶକ୍ତିକରଣକୁ ପ୍ରୋତ୍ସାହିତ କରିବା ସହ ସହରାଞ୍ଚଳରେ ମନୁଷ୍ୟକୃତ ପ୍ରଦୂଷଣର ମାତ୍ରା କମ୍ କରିବା ପାଇଁ ରାଜ୍ୟ ସରକାରଙ୍କ ପକ୍ଷରୁ ଏଭଳି ପଦକ୍ଷେପ ନିଆଯାଇଥିବା କଳିଙ୍ଗନଗର ଅତିରିକ୍ତ ଜିଲ୍ଲାପାଳ କହିଛନ୍ତି । ଆଗାମୀ ଦିନରେ ସହରର ପରିମଳ ବ୍ୟବସ୍ଥା ଓ ସହରକୁ ଅଧିକରୁ ଅଧିକ ସ୍ୱଚ୍ଛତା ରଖା ଯାଇପାରିବ ବୋଲି ଆଶା ରଖିଛନ୍ତି ସହରବାସୀ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
