ନୟାଗଡ଼ (ଆର୍ତ୍ତତ୍ରାଣ ପ୍ରଧାନ): ସାତ ଜନମର ସାଥୀ ହୋଇଥିଲେ। ଏକାଠୀ ଜିଇବାର ସୁନେଲୀ ସ୍ୱପ୍ନ ମଧ୍ୟ ଦେଖୁଥିଲେ। ହେଲେ ଜିଇବା ଆଗରୁ ସାତ ଜନମର ସାଥୀକୁ ଛଡ଼ାଇ ନେଲା କରୋନା। ଅଫେରା ରାସ୍ତାରେ ଚାଲିଗଲେ ସ୍ୱାମୀ। ଏହାକୁ କିନ୍ତୁ ସହଜରେ ଗ୍ରହଣ କରିପାରିଲେନି ପ୍ରାଣପ୍ରୀୟା। ସ୍ୱାମୀଙ୍କ ପଛେ ପଛେ ସେ ଚାଲିଗଲେ। ଆଗ ପଛ ହୋଇ ଜଳିଲା ସ୍ୱାମୀ ଓ ସ୍ତ୍ରୀଙ୍କ ଜୁଇ। ଆଜି ଏପରି ହୃଦୟବିଦାରକ ଘଟଣା ନୟାଗଡ଼ ଜିଲ୍ଲା ଇଟାମାଟି ଥାନା ଅଞ୍ଚଳରେ ଘଟିଛି।
ପୂରା ଘଟଣା ଏମିତି। ୪ ମାସ ତଳେ ସୁନୀତା ରାଣୀ ପାତ୍ରଙ୍କୁ ବିବାହ କରିଥିଲେ ମଥୁରାପୁରପାଟଣା ସାହିର ଦିଲୀପ କୁମାର ପାତ୍ର। ବୈଦିକ ରୀତିନୀତିରେ ହୋଇଥିଲା ବାହାଘର। ଦିଲୀପ ଓ ସୁନୀତାଙ୍କ ଘର ଗୋଟିଏ ସାହିରେ ହୋଇଥିବାରୁ ବେଶ୍ ଖୁସିରେ ଥିଲେ।
[caption id="attachment_640507" align="aligncenter" width="650"]
ସ୍ୱାମୀଙ୍କ ମୃତ୍ୟୁ ପରେ ସ୍ତ୍ରୀଙ୍କ ମୃତ୍ୟୁ[/caption]
ବିବାହ ପରେ ସ୍ୱାମୀ-ସ୍ତ୍ରୀ ହନିମୁନ୍ରେ ଆଣ୍ଡାମାନ-ନିକୋବର ବୁଲିବାକୁ ଯାଇଥିଲେ। ସେଠାରେ ଉଭୟ ଖୋଲା ଆକାଶର ବିହଙ୍ଗ ପରି ଉଡିଥିଲେ। ପ୍ରକୃତି ଭିତରେ ନିଜକୁ ହଜାଇ ଦେଇଥିଲେ। ହନିମୁନ୍ରୁ ଫେରିବା ପରେ ଉଭୟଙ୍କର ଭୁବନେଶ୍ୱରରେ ହୋଇଥିଲା କରୋନା ଟେଷ୍ଟ୍। ଦିଲୀପଙ୍କର କରୋନା ରିପୋର୍ଟ ପଜିଟିଭ୍ ଆସିଥିବା ବେଳେ ସୁନୀତାଙ୍କର ନେଗେଟିଭ୍ ଆସିଥିଲା। ଫଳରେ ଦିଲୀପଙ୍କୁ କୋଭିଡ୍ ହସ୍ପିଟାଲ୍ରେ ଭର୍ତ୍ତି କରାଯାଇଥିଲା। ଆଉ ସୁନୀତା ଏକା ଶାଶୁ ଘରକୁ ଫେରିଯାଇଥିଲେ।
ଆଜି ସକାଳେ କୋଭିଡ୍ ହସ୍ପିଟାଲ୍ରୁ ଆସିଥିଲା ଏକ ଫୋନ୍ କଲ୍। ସେଥିରୁ ଶୁଣିବାକୁ ମିଳିଲା, ଦିଲୀପ ଆଉ ନାହାନ୍ତି। ଯାହାକୁ ସହଜରେ ଗ୍ରହଣ କରିପାରିଲେ ନାହିଁ ପରିବାର ଲୋକେ। କ୍ଷଣକ ଭିତରେ କଥା ଘର ଭିତରେ ବ୍ୟାପିଗଲା। କାନ୍ଦ ବୋବାଳିରେ ଫାଟି ପଡ଼ିଲା ଚାରି କାନ୍ଥ। ଆଉ ସେହି କାନ୍ଦ ଯାଇ ପଡ଼ିଲା ସୁନୀତାଙ୍କ କାନରେ। ସେ କିନ୍ତୁ ସ୍ୱାମୀଙ୍କର ଅବେଳରେ ଚାଲିଯିବାକୁ ସହିପାରିଲେନି। ହଠାତ୍ ଟଳି ପଡ଼ିଲେ। ସେପଟେ କୋଭିଡ୍ ପ୍ରୋଟୋକଲ୍ରେ ସ୍ୱାମୀ ଦିଲୀପଙ୍କ ଚିତା ଜଳୁଥିବା ବେଳେ ଏପଟେ ଗାଁ ଶ୍ମଶାନରେ ଜଳିଲା ସୁନୀତାଙ୍କ ଜୁଇ।
https://youtu.be/Q61A69_tT2w
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
