୪ ଦିନ ହେଲା ନିଖୋଜ ଥିଲେ ଓକିଲ, କୂଅରୁ ମିଳିଲା ମୃତଦେହ

୪ ଦିନ ହେଲା ନିଖୋଜ ଥିଲା ପୁଅ। ବହୁ ଖୋଜାଖୋଜି ପରେ ପୁଅ ତ ମିଳିଲାନି, ମିଳିଲା ପୁଅର ମୃତଦେହ। ଏହାଦେଖି ମା’ ଛାତି ବାଡ଼ାଇ କାନ୍ଦୁଥିବା ବେଳେ ପୂର୍ବ ଶତ୍ରୁତାରୁ ତାକୁ ହତ୍ୟା କରି କୂଅରେ ଫିଙ୍ଗି ଦିଆଯାଇଛି ବୋଲି ଚିତ୍କାର କରି କହୁଛି। ମୃତକ ହେଲେ କଟକ ବିଡ଼ାବାସୀ ନୂଆସାହିର ଆର୍ଯ୍ୟ ଚୌଧୁରୀ । ଆର୍ଯ୍ୟ ଜଣେ ଓକିଲ ଥିଲେ।

ଆର୍ଯ୍ୟ ଗତ ଗୁରୁବାରଠାରୁ ଘରୁ କେଉଁଆଡ଼େ ଚାଲି ଯାଇଥିଲେ। ପରିବାର ଲୋକେ ବହୁ ଖୋଜାଖୋଜି କରିବା ପରେ ଏ ନେଇ ଥାନାରେ ବି ଅଭିଯୋଗ କରିଥିଲେ। ପୁଲିସ୍‌ ବହୁ ଖୋଜାଖୋଜି କରିବା ପରେ ଗତକାଲି ବିଳମ୍ବିତ ରାତିରେ ଏକ କୂଅ ଭିତରୁ ତାଙ୍କ ମୃତଦେହକୁ ଉଦ୍ଧାର କରିଛି।

ପୁଲିସ୍‌ ଓ ସାଇଣ୍ଟିଫିକ ଟିମ୍‌ ପହଞ୍ଚି ପାରିପାର୍ଶ୍ୱିକ ସ୍ଥିତି ଅନୁଧ୍ୟାନ କରିବା ପରେ ମୃତଦେହକୁ ବ୍ୟବଚ୍ଛେଦ ନିମନ୍ତେ କଟକ ଏସସିବି ମେଡିକାଲକୁ ପଠାଯାଇଛି। ସେଠାରେ ଆଜି ଶବ ବ୍ୟବଚ୍ଛେଦ ପରେ ମୃତଦେହକୁ ପରିବାର ଲୋକଙ୍କୁ ହସ୍ତାନ୍ତର କରାଯିବ ।

ଗତ ଗୁରୁବାର ମୋ’ ପୁଅ ଘରେ ଥିବା ବେଳେ ଏକ କଲ୍‌ ଆସି ଜଣେ ଡାକିଲା। ଏହାପରେ ପୁଅ ଘରକୁ ଆସିଥିବା ବେଳେ ଆଉ ଫେରି ନ ଥିଲା। ତେଣୁ ତାକୁ ହତ୍ୟା କରି କୂଅରେ ଫିଙ୍ଗି ଦେଇଥିବା ମୋ’ର ସନ୍ଦେହ ହେଉଛି ବୋଲି କହିଛନ୍ତି ଆର୍ଯ୍ୟଙ୍କ ମା’ । ପୁଲିସ୍‌ ଏହି ଘଟଣାର ତଦନ୍ତ ଆରମ୍ଭ କରିଥିବା ବେଳେ କୂଅକୁ ଡେଇଁ ଆର୍ଯ୍ୟଙ୍କ ମୃତ୍ୟୁ ହୋଇଛି ନା ହତ୍ୟା କରି ତାଙ୍କୁ ଫୋପାଡ଼ି ଦିଆଯାଇଛି ତାହାର ତଦନ୍ତ ଆରମ୍ଭ କରିଛି।