ତୀର ମାଇଲେ ଧର୍ମେନ୍ଦ୍ର: କହିଲେ-ଆମେ କମାଇଥିଲୁ, ଏବେ ତୁମ ପାଳି

ଭୁବନେଶ୍ୱର (ଓଡ଼ିଶା ରିପୋର୍ଟର): ଅନ୍ତର୍ଜାତୀୟ ବଜାରରେ ରାଜନୈତିକ ଅସ୍ଥିରତା ଲାଗି ରହିଛି। ତେଣୁ ଅଶୋଧିତ ତୈଳ ଦର ବୃଦ୍ଧି ପାଉଛି। ବିଶେଷକରି ତେଲ ଉତ୍ପାଦନକାରୀ ବଡ଼ ଦେଶ ଇରାନ୍‌ ଓ ଭେନେଜୁଏଲାରେ ରାଜନୈତିକ ଅସ୍ଥିରତା ଏବଂ ଡଲାର ତୁଳନାରେ ଭାରତୀୟ ମୁଦ୍ରା ‘ଟଙ୍କା’ର ମୂଲ୍ୟହ୍ରାସ ଯୋଗୁଁ ତେଲ ଦର ବଢ଼ୁଛି। ଏହାକୁ ନିୟନ୍ତ୍ରଣ କରିବା ପାଇଁ ପୂର୍ବରୁ କେନ୍ଦ୍ର ସରକାର ଏକ୍ସାଇଜ୍‌ ଡ୍ୟୁଟି କମାଇଥିଲେ। ଏବେ ରାଜ୍ୟ ସରକାର ମଧ୍ୟ ଭାଟ କମାନ୍ତୁ ବୋଲି କେନ୍ଦ୍ର ପେଟ୍ରୋୟମ୍‌ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି।

ସେ ଆହୁରି ମଧ୍ୟ କହିଛନ୍ତି-“ରାଜ୍ୟର କଲ୍ୟାଣକାରୀ କାର୍ଯ୍ୟ କରିବା ରାଜ୍ୟ ଓ କେନ୍ଦ୍ର ସରକାରଙ୍କର ଦାୟିତ୍ୱ। ଏହି ଦାୟିତ୍ୱକୁ ପୂରା କରିବା ପାଇଁ ରାଜସ୍ୱ ଦରକାର। ଏହାର ମାଧ୍ୟମ ହେଉଛି ଟ୍ୟାକ୍ସ। ଏହାକୁ ପୂରଣ କରିବା ପାଇଁ ଓଡ଼ିଶା ସରକାର ପେଟ୍ରୋଲ ଉପରେ ୨୬ % ଭାଟ୍‌ ଲଗାଉଛନ୍ତି। କିନ୍ତୁ ଓଡ଼ିଶାଠାରୁ ଛୋଟ ରାଜ୍ୟ ଗୋଆ ୧୨% ଭାଟ୍‌ ଆଦାୟ କରୁଛି। ଗୋଆ ପରି ଆମ ରାଜ୍ୟ ଭାଟ୍‌ ହ୍ରାସ କଲେ ତେଲ ଦର ଆପଣା ଛାଏଁ କମିବ। ବର୍ତ୍ତମାନ କେନ୍ଦ୍ର ସରକାର ତେଲ ଦର କମାଇବା ଉପରେ ବିଚାର ବିମର୍ଶ କରୁଛନ୍ତି। ସମାଧାନର ରାସ୍ତା ବାହାର କରିବ।”

ସେ କହିଛନ୍ତି-“ଯେତେବେଳେ ଅନ୍ତର୍ଜାତୀୟ ବଜାରରେ ତେଲ ଦର କମ୍‌ ଥିଲା ସେହି ସମୟରେ ଭାରତ ସରକାର ଏକ୍ସାଇଜ୍‌ ଡ୍ୟୁଟି ବଢ଼ାଇ କିଛି ଅର୍ଥ ସଞ୍ଚୟ କରିଥିଲେ। ସେହି ଅର୍ଥକୁ ଦେଶ ବିକାଶରେ ଖର୍ଚ୍ଚ କରାଯାଇଥିଲା। ସେଥିରୁ ୪୨ ପ୍ରତିଶତ ଅର୍ଥ ରାଜ୍ୟ ଗୁଡ଼ିକୁ ପ୍ରଦାନ କରାଯାଇଥିଲା। ଯାହା ରାଜ୍ୟ ଆଦାୟ କରୁଥିବା ଭାଟ୍‌ର ଅନ୍ତଭୂକ୍ତ ନୁହେଁ ବାଦ୍‌। ତେବେ ବିଭିନ୍ନ କାରଣରୁ ତେଲ ଦର ବଢ଼ୁଥିବାରୁ ଗତ ଅକ୍ଟୋବର ମାସରେ କେନ୍ଦ୍ର ସରକାର ୨ ଟଙ୍କା ଏକ୍‌ସାଇଜ୍‌ ଡ୍ୟୁଟି କମାଇଥିଲେ। ରାଜ୍ୟ ଗୁଡ଼ିକୁ ମଧ୍ୟ କମାଇବା ପାଇଁ ଅନୁରୋଧ କରାଯାଇଥିଲା। ହେଲେ ରାଜ୍ୟ ସରକାର କମାଇଲେ ନାହିଁ।”

ଆନ୍ଦୋଳନ ନେଇ ସେ କହିଛନ୍ତି-“ତେଲ ଉପରେ ଭାରତ ଓ ରାଜ୍ୟ ସରକାର ଉଭୟ ଟ୍ୟାକ୍ସ ଆଦାୟ କରୁଛନ୍ତି। ଅନ୍ତର୍ଜାତୀୟ ବଜାରରେ ଅସ୍ଥିତା ଯୋଗୁଁ ତେଲ ଦର ବଢ଼ୁଥିବାରୁ ପୂର୍ବରୁ କେନ୍ଦ୍ର ସରକାର ଟ୍ୟାକ୍ସ କମାଇଥିଲେ। ହେଲେ ରାଜ୍ୟ ସରକାର କମାଇଲେ ନାହିଁ। ଏବେ ସେମାନେ କମାନ୍ତୁ। ସେମାନେ କାହିଁକି କମାଇଲେ ନାହିଁ? ସେ ବିଷୟରେ ମୋର କିଛି କହିବାର ନାହିଁ।”

ତେବେ ତୈଳ ଦର ହ୍ରାସ ପାଇଁ ରାଜ୍ୟ ଭାଟ କାଟିବା ନେଇ ଧର୍ମେନ୍ଦ୍ରଙ୍କ ମନ୍ତବ୍ୟ ପ୍ରସଙ୍ଗକୁ ସମାଲୋଚନା କରିଛନ୍ତି ଅର୍ଥମନ୍ତ୍ରୀ ଶଶିଭୂଷଣ ବେହେରା। ସେ କହିଛନ୍ତି-“ଓଡ଼ିଶା ୨୬% ଭାଟ୍ ନେଉଛି। ଯାହା ସାରା ଦେଶରେ ପ୍ରାୟ ସବୁଠୁ କମ। ରାଜ୍ୟ ଟିକସଠାରୁ କେନ୍ଦ୍ରର ଏକ୍ସାଇଜ ଟିକସ ବହୁ ଅଧିକ ନେଉଛି। ଦାୟିତ୍ୱ ଓ ଅସଫଳତା ଘୋଡ଼ାଇବା ପାଇଁ କେନ୍ଦ୍ରମନ୍ତ୍ରୀ ଏସବୁ କହୁଛନ୍ତି। GST ପ୍ରସ୍ତାବ ଆସିଲେ ସବୁ ରାଜ୍ୟ ଯାହା କିଛି ନିଷ୍ପତ୍ତି ନେବେ।”

ଲଗାତର ଏଗାର ଦିନ ପାଇଁ ବଢ଼ିଛି ତୈଳ ଦର। ଆଜି ମଧ୍ୟ ପେଟ୍ରୋଲ ଦର ୩୦ ପଇସା ଏବଂ ଡିଜେଲ୍ ୧୯ ପଇସା ବଢ଼ିଛି। ମୁମ୍ବାଇରେ ଦେଶର ସବୁଠୁ ମହଙ୍ଗା ପେଟ୍ରୋଲ ଓ ଡିଜେଲ ବିକ୍ରି ହେଉଛି। ଆଜି ମୁମ୍ବାଇରେ ବର୍ଦ୍ଧିତ ପେଟ୍ରୋଲ ଦର ୮୭ ଟଙ୍କା ୨୭ ପଇସା ହୋଇଥିବା ବେଳେ ଦିଲ୍ଲୀରେ ୭୭ ଟଙ୍କା ୪୭ ପଇସା ରହିଛି। ସେହିଭଳି ରାଜଧାନୀ କୋଲକାତାରେ ୮୦ ଟଙ୍କା ୧୨ ପଇସାରେ ବିକ୍ରି ହେଉଛି ପେଟ୍ରୋଲ। ବଢ଼ୁଥିବା ତୈଳ ଦରକୁ ନେଇ ଗ୍ରାହକ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି। କ୍ରମାଗତ ତେଲଦର ବଢୁଥିବାରୁ ଏହାର ପ୍ରଭାବ ବିଭିନ୍ନ ସାମଗ୍ରୀ ଉପରେ ପଡିଛି। ତେଲଦର କମାଇବା ପାଇଁ ବିରୋଧୀମାନେ ସରକାରଙ୍କ ଉପରେ ଚାପ ପକାଉଛନ୍ତି।