ଅକ୍ଷୟ ପରିଜାଙ୍କୁ ୬ ଘଣ୍ଟା ଘାଣ୍ଟିଲା ଇଡି, କହିଲେ- ଆଇନ ଉପରେ ସମ୍ପୂର୍ଣ୍ଣ ବିଶ୍ୱାସ ଅଛି

ଭୁବନେଶ୍ୱର(ଓଡ଼ିଶା ରିପୋର୍ଟର): ସିନେ ପ୍ରଯୋଜକ ଅକ୍ଷୟ ପରିଜାଙ୍କୁ ୬ ଘଣ୍ଟା ଖାଣ୍ଟିଲା ପ୍ରବର୍ତ୍ତନ ନିର୍ଦ୍ଦେଶାଳୟ( ଇଡି)। ୬ ଘଣ୍ଟା ସମୟ ମଧ୍ୟରେ ଇଡି ବ୍ଲାକମେଲିଂ, ହନିଟ୍ରାପ୍ ଓ ଅର୍ଥ କାରବାର ମାମଲାରେ ତାଙ୍କୁ ଗୁଡ଼େଇ ତୁଡ଼େଇ ଅନେକ ପ୍ରଶ୍ନ କରିଥିଲା।

ବହୁ ଚର୍ଚ୍ଚିତ ଲେଡି ବ୍ଲାକମେଲର ଅର୍ଚ୍ଚନା ନାଗର କଳାଧନ୍ଦା ଓ କଳାଟଙ୍କା  ମାମଲାରେ ତନାଘନା କରୁଥିବା ଇଡିର ସମନ ପାଇଥିବା ଅକ୍ଷୟ ପରିଜା ଗତକାଲି ଅପରାହ୍ନ ୨ଟା ବେଳେ ଇଡ଼ି ଅଫିସରେ ହାଜର ହୋଇଥିଲେ। ଇଡି ଅଧିକାରୀମାନେ ତାଙ୍କୁ ସଂଧ୍ୟା ୬ଟାରୁ ଜେରା ଆରମ୍ଭ କରିଥିଲେ।

ଅକ୍ଷୟ ପରିଜା  ଅର୍ଚ୍ଚନା ଓ ଶ୍ରଦ୍ଧାଞ୍ଜଳିଙ୍କ ବିରୋଧରେ ୩ କୋଟି ଟଙ୍କା ପାଇଁ ବ୍ଲାକମେଲ୍ ଅଭିଯୋଗ ଆଣି ନୟାପଲ୍ଲୀ ଥାନାର ଦ୍ୱାରସ୍ଥ ହୋଇଥିଲେ। ଏ ଦିଗରେ ତଥ୍ୟ ଆଦାୟ କରିବା ସହ ଆର୍ଥିକ କାରବାର ହୋଇଛି ନା ନାହିଁ ସେ ନେଇ ଇଡ଼ି ଅକ୍ଷୟଙ୍କୁ ପଚରାଉଚରା କରିଥିବା କୁହାଯାଉଛିା ଆଜି ମଧ୍ୟ ଇଡି ଅଫିସରେ ହାଜର ହେବେ ଅକ୍ଷୟ ପରିଜା। ଅକ୍ଷୟ ପରିଜା ଓ ଶ୍ରଦ୍ଧାଞ୍ଜଳିଙ୍କୁ ମୁହିଁମୁହିଁଜେରା କରାଯିବ ବୋଲି ସୂଚନା ମିଳିଛି।

ଇଡି ଅଫିସରୁ ବାହାରିବା ପରେ ଅକ୍ଷୟ ପରିଜା କହିଛନ୍ତି, ଓଡ଼ିଶାର ପୁଲିସ ଓ  ଆଇନ ଉପରେ ମୋର ସମ୍ପୂର୍ଣ୍ଣ ବିଶ୍ୱାସ ରହିଛି। ଆଇନ ତା’ ବାଟରେ ଯାଉଛି।

ଅକ୍ଷୟ ପରିଜାଙ୍କ ଓକିଲ ଆକାଶ ଭୁଇଁ କହିଛନ୍ତି, ପୂର୍ବ ନିର୍ଦ୍ଧାରିତ ସମୟ ଭିତରେ ଆମେ ଇଡି ଅଫିସରେ ଅକ୍ଷୟ ପରିଜା ହାଜର ହୋଇଥିଲୁ । ଇଡି ଅଧିକାରୀଙ୍କ କାର୍ଯ୍ୟବ୍ୟସ୍ତତା ସ୍ୱତ୍ତେ ଆମକୁ ୨ରୁ ୩ ଘଣ୍ଟା ଅପେକ୍ଷା କରିବାକୁ ପଡ଼ିଲା। ଆମେ ୬ଟାପରେ ଇଡି ଅଧିକାରୀଙ୍କ ସହ ଆଲୋଚନା କଲୁ।

ପଇସାପତ୍ର  ଆମେ କିଛି ଦେଇ ନାହୁଁ। ମୁଁ ସେ ବିଷୟରେ କିଛି କହିବାକୁ ଚାହୁଁନି ବୋଲି ଅକ୍ଷୟଙ୍କ ଓକିଲ କହିଛନ୍ତି।