ବଡ଼ ଭାଇର ତୀର ମାଡ଼ରେ ସାନ ଭାଇ ଗୁରୁତର

ଉଦଳା(ମାନସ ପାଣି): ମୂୟରଭଞ୍ଜ ଜିଲ୍ଲା ଶରତ ଥାନା ଅନ୍ତର୍ଗତ ହୁଡ଼ିସାହି ଗାଁରେ ବଡ଼ ଭାଇର ତୀର ମାଡ଼ରେ ସାନଭାଇ ଗୁରୁତର ହୋଇଛି। ଗୁରୁତର ଥିବା ସାନ ଭାଇର ନାଁ ଶିବନ ହେମ୍ୱ୍ରମ। ବଡଭାଇର ନାଁ ମାନସିଂ ହେମ୍ୱ୍ରମ।

ସୂଚନା ଅନୁସାରେ, ପୂର୍ବରୁ ଏହି ଦୁଇ ଭାଇଙ୍କ ମଧ୍ୟରେ ଜମିଜମାକୁ ନେଇ ବିବାଦ ରହି ଆସିଥିଲା। ଗତକାଲି ରାତିରେ ଶିବନ ଘରେ ଶୋଇଥିବା ବେଳେ ବଡ଼ଭାଇ ମାନସିଂ ତାଙ୍କୁ ତୀର ମାଡ଼ କରିଥିଲା। ତୀରଟି ଶିବନଙ୍କ ଛାତିରେ ପଶିଯାଇଥିଲା। ତାଙ୍କୁ ଗୁରୁତର ଅବସ୍ଥାରେ ପରିବାର ଲୋକେ ପ୍ରଥମେ ଉଦଳା ଡାକ୍ତରଖାନାରେ ଭର୍ତ୍ତି କରିଥିଲେ। ତେବେ ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ ବାରିପଦା ଡାକ୍ତରଖାନାକୁ ସ୍ଥାନାନ୍ତର କରାଯାଇଛି। ଖବର ପାଇ ପୁଲିସ୍‌ ଘଟଣାସ୍ଥଳରେ ପହଞ୍ଚି ବଡ଼ ଭାଇ ମାନସିଂଙ୍କୁ ଥାନାରେ ଅଟକ ରଖି ତଦନ୍ତ ଆରମ୍ଭ କରିଛି।