ମୋହନା (ମିହିର ଯତି): ପହଞ୍ଚି ପାରିଲାନି ଆମ୍ବୁଲାନ୍ସ। ଯାହା ଫଳରେ ଷ୍ଟ୍ରେଚରରେ ବୁହା ହେଲେ ଗର୍ଭବତୀ। ଏମିତି ଏକ ଅଭାବନୀୟ ଘଟଣା ଘଟିଛି ଗଜପତି ଜିଲ୍ଲା ମୋହନା ବ୍ଲକ୍ ସିକୁଳିପଦର ପଞ୍ଚାୟତ ଉଲଣ୍ଡା ଗାଁରେ। ରାସ୍ତା ଭଲ ନ ଥିବାରୁ ଗାଁକୁ ପହଞ୍ଚି ପାରିଲାନି ଆମ୍ବୁଲାନ୍ସ। ଫଳରେ ବାଧ୍ୟ ହୋଇ ଗର୍ଭବତୀ ମହିଳାଙ୍କୁ ଗାଁରୁ ପ୍ରାୟ ୫ କିଲୋମିଟର ଦୂର ଷ୍ଟ୍ରେଚରରେ ବୋହି ଆଣିବାକୁ ପଡିଲା।
ଗାଁର ସୁନିଲା ଶବରଙ୍କ ପ୍ରସବ ଯନ୍ତ୍ରଣା ହେବାରୁ ୧୦୮ ଆମ୍ବୁଲାନ୍ସ ଖବର ଦିଆଯାଇଥିଲା। କିନ୍ତୁ ରାସ୍ତା ଭଲ ଥିବାରୁ ଅଧାରାସ୍ତାରେ ଆମ୍ବୁଲାନ୍ସଟି ଅଟକି ରହିଯାଇଥିଲା। ଫଳରେ ୧୦୮ ଆବୁଲାନ୍ସର ଫାର୍ମାଶିଷ୍ଟ ବିଦ୍ୟାଧର ସାହୁ ଓ ଗ୍ରାମବାସୀଙ୍କ ସହାୟତାରେ ଗର୍ଭବତୀ ମହିଳାଙ୍କୁ ଷ୍ଟେଚରରେ ଅଣାଯାଇଥିଲା।
ଗର୍ଭବତୀ ମହିଳାଙ୍କୁ ଗାଁ ଠାରୁ ଉଲଣ୍ଡା ଛକ ଯାଏଁ ପ୍ରାୟ ୫ କିମି ଘାଟି ରାସ୍ତାରେ ବୁହା ହୋଇ ଆମ୍ବୁଲାନ୍ସ ପର୍ଯ୍ୟନ୍ତ ନିଆଯାଇଥିଲା। ସେଠାରୁ ଗର୍ଭବତୀ ମହିଳାଙ୍କୁ ଆମ୍ବୁଲାନ୍ସ ଯୋଗେ ଚନ୍ଦ୍ରଗିରି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଅଣାଯାଇଥିଲା। ସେଠାରେ ମହିଳା ଜଣଙ୍କ ଏକ ପୁତ୍ର ସନ୍ତାନ ପ୍ରସବ କରିଥିଲେ। ବର୍ତ୍ତମାନ ଉଭୟ ମା’ ଓ ଶିଶୁର ସ୍ୱାସ୍ଥ୍ୟବସ୍ଥା ଭଲ ରହିଛି।