୨୪ ଲକ୍ଷ ଲୁଟ୍‌ ଓ ଅପହରଣ ନାଟକର ଖଳନାୟକ ନିଜେ ଡ୍ରାଇଭର

ବ୍ରହ୍ମପୁର (ଓଡ଼ିଶା ରିପୋର୍ଟର): ବ୍ରହ୍ମପୁରରେ ATM ଗାଡ଼ି ଡ୍ରାଇଭରକୁ ଅପହରଣ ଘଟଣାର ପର୍ଦ୍ଦାଫାସ୍ କରିଛି ପୁଲିସ। ଡ୍ରାଇଭରକୁ କେହି ଅପହରଣ କରି ନ ଥିଲେ, ବରଂ ଡ୍ରାଇଭର ନିଜେ ଅପହରଣ ନାଟକ ରଚିଥିଲା ବୋଲି ସୂଚନା ଦେଇଛନ୍ତି ବ୍ରହ୍ମପୁର ଏସପି। ଦୁଇ ସହଯୋଗୀଙ୍କ ସାହାଯ୍ୟରେ ଅପହରଣ ନାଟକ କରି ସେ ଟଙ୍କା ହଡ଼ପ କରିଥିଲା । ଡ୍ରାଇଭର ନିଜେ ନିଶା ଔଷଧ ସ୍ପ୍ରେ କରି ଅଚେତ ହେବାର ଡ୍ରାମା କରିଥିଲା ।

ଡ୍ରାଇଭର ସମେତ ମୋଟ ୩ ଜଣଙ୍କୁ ପୁଲିସ୍ ଗିରଫ କରିଥିବା ବେଳେ ସେମାନଙ୍କ ନିକଟରୁ ଲୁଟ୍‌ ହୋଇଥିବା ୨୪ ଲକ୍ଷ ଟଙ୍କାରୁ ୨୦ ଲକ୍ଷ ୯୦ ହଜାର ଓ ବ୍ୟବହୃତ ନିଶା ସାମଗ୍ରୀ ଜବତ କରିଛି। ଏହା ସହିତ ଗୋଟିଏ ମୋଟର ସାଇକେଲ ଓ ୪ଟି ମୋବାଇଲ୍ ଜବତ କରିଛି ପୁଲିସ୍‌। ଗିରଫ ଡ୍ରାଇଭରଙ୍କ ନାଁ ଆଶିଷ କୁମାର ଦିଗାଲ୍ ଏବଂ ଅନ୍ୟ ୨ ଜଣ ହେଉଛନ୍ତି ମାନ୍ୟବାର ନାୟକ ଓ କାର୍ତ୍ତିକ ନାୟକ।

ସୂଚନା ଅନୁଯାୟୀ, ଗତ ୧୮ ତାରିଖରେ ଟଙ୍କା ଭର୍ତ୍ତି ଗାଡିକୁ ବ୍ରହ୍ମପୁର ବଡ଼ବଜାର ଏକ ବ୍ୟାଙ୍କ ନିକଟରୁ ବନ୍ଧୁକ ମୁନରେ ଅପହରଣ ହୋଇଥିବା ନେଇ ଅଭିଯୋଗ ହୋଇଥିଲା । ଏହାପରେ ପୁଲିସ ଆନ୍ଧ୍ର ସୀମାନ୍ତ ଗିରିସୋଲା ନିକଟରୁ ଉକ୍ତ ଭ୍ୟାନ ସହ ଅଚେତ ଅବସ୍ଥାରେ ଡ୍ରାଇଭରକୁ ଉଦ୍ଧାର କରିଥିଲା। ତେବେ ଜେରା ବେଳେ ଡ୍ରାଇଭର ଆଶିଷ ଦିଗାଲ ନିଜେ ଏହି ଅପହରଣ ନାଟକ ରଚିଥିବା ପୁଲିସ ସମ୍ମୁଖରେ ସ୍ଵୀକାର କରିଥିଲା।