ବ୍ରହ୍ମପୁର (ଓଡ଼ିଶା ରିପୋର୍ଟର): ଲାଞ୍ଚ ନେଇ ଭିଜିଲାନ୍ସ ହାତରେ ଧରାପଡ଼ିଛନ୍ତି ଜଣେ ପଞ୍ଚାୟତ ନିର୍ବାହୀ ଅଧିକାରୀ (ପିଇଓ)। ତାଙ୍କ ନାଁ ରାଜେନ୍ଦ୍ର କୁମାର ବେହେରା। ସେ ଗଞ୍ଜାମ ଜିଲ୍ଲା ପାତ୍ରପୁର ବ୍ଲକ୍ ତୁରୁବୁଡ଼ି ପଞ୍ଚାୟତରେ ନିଯୁକ୍ତ ହୋଇଛନ୍ତି।
ପ୍ରଧାନମନ୍ତ୍ରୀ ଗ୍ରାମୀଣ ଆବାସ ଯୋଜନାର ଜଣେ ହିତାଧିକାରୀଙ୍କ ଠାରୁ ୬ ହଜାର ଟଙ୍କା ଲାଞ୍ଚ ନେବାବେଳେ ପିଇଓ ରାଜେନ୍ଦ୍ର କୁମାର ବେହେରାଙ୍କୁ ଧରିଥିଲେ ଭିଜିଲାନ୍ସ ଟିମ୍। ଉକ୍ତ ହିତାଧିକାରୀଙ୍କ ଶେଷ କିସ୍ତି ଅର୍ଥ (୩୦ ହଜାର ଟଙ୍କା) ପ୍ରଦାନ କରିବା ପାଇଁ ସେ ଲାଞ୍ଚ ମାଗିଥିଲେ। ଭିଜିଲାନ୍ସ ଟିମ୍ ତାଙ୍କ ଠାରୁ ଲାଞ୍ଚ ଅର୍ଥ ଜବତ କରିଛି।
ପିଇଓ ରାଜେନ୍ଦ୍ର କୁମାର ବେହେରାଙ୍କୁ ଧରିବା ପରେ ଭିଜିଲାନ୍ସ ଟିମ୍ ତାଙ୍କ ଅଫିସ୍, ଗଞ୍ଜାମ ଜିଲ୍ଲା ନୂଆଗାଁ ଥାନା ଅନ୍ତର୍ଗତ ବନମାଳି ସ୍ଥିତ ତାଙ୍କ ଘର ଓ ବ୍ରହ୍ମପୁର ବଡ଼ ବଜାର ଥାନା ଅନ୍ତର୍ଗତ ଲକ୍ଷ୍ମୀ ବିହାର ସ୍ଥିତ ତାଙ୍କ ଭଡ଼ା ଘରେ ଚଢ଼ାଉ କରିଥିଲା। ଭିଜିଲାନ୍ସ ଏ ଘଟଣାର ତା’ର ତଦନ୍ତ ଜାରି ରଖିଛି।