OR 
ପୁଣି ଥରେ ଚର୍ଚ୍ଚାରେ ଆସିକା ସାଂସଦ ପ୍ରମିଳା ବିଷୋୟୀ। କେତେବେଳେ ଧାନବିଲ ଖସ ଖସ ଗୀତ ଗାଇ ତ ଆଉ କେତେବେଳେ ହୁଳହୁଳି ପକାଇ କିମ୍ବା ଗଣମାଧ୍ୟମରେ ନିଜର ପ୍ରତିକ୍ରିୟା ପାଇଁ ସେ ଅନେକ ସମୟରେ ଚର୍ଚ୍ଚାରେ ରହିଥାନ୍ତି। ବର୍ତ୍ତମାନ 5T ସଚିବ ପାଣ୍ଡିଆନଙ୍କୁ ମୁଖ୍ୟମନ୍ତ୍ରୀ ସମ୍ବୋଧନ କରି ପୁଣି ଥରେ ଚର୍ଚ୍ଚାକୁ ଆସିଛନ୍ତି ଆସିକା ସାଂସଦ।
ବୁଧବାର ଅର୍ଥାତ ଗତକାଲି ଗଞ୍ଜାମ ଜିଲ୍ଲାର ଶେରଗଡରୁ ପୁରୀକୁ ନୂତନ ସରକାରୀ ବସ୍ ସେବାର ଲୋକାର୍ପଣ କାର୍ଯ୍ୟକ୍ରମରେ ଯୋଗ ଦେଇଥିବା ସାଂସଦ ପ୍ରମିଳା ବିଷୋୟୀ ସଭାମଞ୍ଚରେ ଧନ୍ୟବାଦ ଦେବାବେଳେ 'ଆମ ପ୍ରିୟ ମୁଖ୍ୟମନ୍ତ୍ରୀ ପାଣ୍ଡିଆନ ବାବୁ' ବୋଲି କହିଥିଲେ। ଥରେ ରେ ନୁହେଁ, ଦୁଇ ଦୁଇ ଥର ପାଣ୍ଡିଆନଙ୍କୁ ଆମର ପ୍ରିୟ ମୁଖ୍ୟମନ୍ତ୍ରୀ ବୋଲି ସମ୍ବୋଧନ କରି ସଭାରେ ନିଜର ଅଭିଭାଷଣ ରଖିଥିଲେ। ପାଖରେ ଜିଲ୍ଲାପାଳ ଦିବ୍ୟଜ୍ୟୋତି ପରିଡ଼ା ବି ଉପସ୍ଥିତ ଥିଲେ। ଅଥଚ କେହି କିଛି କହି ନଥିଲେ। ତେବେ ଜଣେ ସାଂସଦ ହୋଇ କେଉଁ ପରିସ୍ଥିତିରେ 5T ସଚିବଙ୍କୁ ‘ଆମ ପ୍ରିୟ ମୁଖ୍ୟମନ୍ତ୍ରୀ ପାଣ୍ଡିଆନ ବାବୁ’ ବୋଲି ଦୁଇ ଦୁଇ ଥର ସମ୍ବୋଧନ କଲେ, ସେନେଇ ଆସିକା ସାଂସଦ ପ୍ରମିଳା ବିଷୋୟୀଙ୍କ ପକ୍ଷରୁ କୌଣସି ପ୍ରତିକ୍ରିୟା ମିଳିନାହିଁ। ଏହାର ଭିଡ଼ିଓ ଭାଇରାଲ ହେବା ପରେ ଚାରିଆଡେ ଜୋରଦାର ଚର୍ଚ୍ଚା ଜୋର ଧରିଛି।
Also Read
ସୂଚନାଯୋଗ୍ୟ, ଗତକାଲି ଗଞ୍ଜାମ ଜିଲ୍ଲା ପାଇଁ ଆଉ ଏକ ନୂତନ ସରକାରୀ ବସ୍ ସେବାର ଲୋକାର୍ପଣ କରିଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ମୁଖ୍ୟମନ୍ତ୍ରୀ ଭର୍ଚୁଆଲ ମୋଡରେ ଉପସ୍ଥିତ ରହି ଏହି ବସ୍ ସେବାର ଶୁଭାରମ୍ଭ କରିଥିଲେ। ଶେରଗଡ଼-ପୁରୀ ରୁଟ୍ ମଧ୍ୟରେ ସାଧାରଣ ଯାତ୍ରୀଙ୍କ ଗମନାଗମନ ପାଇଁ ନୂତନ ବସ୍ ସେବାଟି କରାଯାଇଥିଲା। ଯାହାଫଳରେ ଶେରଗଡ଼ ସମେତ ଆଖପାଖ ଅଞ୍ଚଳର ଜନସାଧାରଣ ଉପକୃତ ହୋଇପାରିବେ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
