ପୁଲିସ ଏଏସଆଇ ଗୋପାଳ ଦାସଙ୍କ ଗୁଳିମାଡ଼ରେ ରାଜ୍ୟ ସ୍ୱାସ୍ଥ୍ୟ ମନ୍ତ୍ରୀ ନବ ଦାସ ନିହତ ହେବା ଘଟଣାର ତଦନ୍ତ ପ୍ରକ୍ରିୟାକୁ ଜଣେ ବିଚାରପତିଙ୍କ ଦ୍ୱାରା ତଦାରଖ କରିବା ନିମନ୍ତେ ରାଜ୍ୟ ସରକାର ଆଜି ହାଇକୋର୍ଟଙ୍କୁ ଚିଠି ଲେଖି ଅନୁରୋଧ କରିଥିବା ଜଣାପଡ଼ିଛି । ନବ ଦାସଙ୍କୁ ଗୁଳିମାଡ଼ ଘଟଣାର କ୍ରାଇମବ୍ରାଂଚ ତଦନ୍ତ ଜାରି ରହିଥିଲେ ମଧ୍ୟ ତଦନ୍ତ ପ୍ରକ୍ରିୟାରେ ଅଧିକ ପାରଦର୍ଶିତା ଆଣିବା ପାଇଁ ରାଜ୍ୟ ସରକାର ଏଭଳି ପଦକ୍ଷେପ ନେଇଥିବା ସୂଚନା ମିଳିଛି ।
ମିଳିଥିବା ସୂଚନା ଅନୁସାରେ, ରାଜ୍ୟ ଗୃହ ବିଭାଗ ପକ୍ଷରୁ ଆଜି ହାଇକୋର୍ଟ ରେଜିଷ୍ଟ୍ରାରଙ୍କୁ ଚିଠି ଲେଖି ମନ୍ତ୍ରୀ ନବ ଦାସଙ୍କୁ ଗୁଳିମାଡ଼ ଘଟଣାର ତଦନ୍ତର ତଦାରଖ ଦାୟିତ୍ୱ ହାଇକୋର୍ଟର ଜଣେ କାର୍ଯ୍ୟରତ ବିଚାରପତି ଅବା ଜଣେ ଅବସରପ୍ରାପ୍ତ ବିଚାରପତି ଅବା ପୁଣି ଜଣେ ଜିଲ୍ଲା ଜଜଙ୍କ ଦ୍ୱାରା କରାଇବାକୁ ଅନୁରୋଧ କରିଛନ୍ତି । ଏହା ଏକ ସମ୍ବେଦନଶୀଳ ଘଟଣା ଓ ଜଣେ ପୁଲିସ ଅଧିକାରୀଙ୍କ ସମ୍ପୃକ୍ତି ରହିଥିବାରୁ ତଦନ୍ତରେ ପାରଦର୍ଶିତା ରହିବାର ଆବଶ୍ୟକତା ଅଛି । ତେଣୁ ଏ ସମ୍ପର୍କରେ ହାଇକୋର୍ଟ ମୁଖ୍ୟ ବିଚାରପତିଙ୍କୁ ଅବଗତ କରାଇ ଆବଶ୍ୟକ ପଦକ୍ଷେପ ନେବାକୁ ଗୃହ ବିଭାଗ ତାଙ୍କ ଚିଠିରେ ଉଲ୍ଲେଖ କରିଥିବା ଜଣାପଡ଼ିଛି ।
ଅନ୍ୟପକ୍ଷରେ ଘଟଣାର ତଦନ୍ତ ଦାୟିତ୍ୱ ହାତକୁ ନେଇଥିବା କ୍ରାଇମବ୍ରାଂଚ ଆଜି ଦ୍ୱିତୀୟ ଦିନ ମଧ୍ୟ ତଦନ୍ତ ଜାରି ରଖିଛି । ଅଭିଯୁକ୍ତ ଗୋପାଳ ଦାସଙ୍କୁ ଗିରଫ କରି ଜେରା କରିବା ସହ ଆଇପିସିର ଧାରା ୧୬୧ ଅନୁସାରେ ମାଜିଷ୍ଟ୍ରେଟଙ୍କ ଉପସ୍ଥିତିରେ ତାଙ୍କର ବୟାନ ରେକର୍ଡ ହୋଇଛି । ପୁଲିସ ଏଏସଆଇ ଗୋପାଳ ଦାସ ନିଜେ ଏହି ହତ୍ୟା କରିଥିବା ସ୍ୱୀକାର କରିଛନ୍ତି ବୋଲି କ୍ରାଇମବ୍ରାଂଚ ଏଡିଜି ଅରୁଣ ବୋଥ୍ରା ଗଣମାଧ୍ୟମକୁ ସୂଚନା ଦେଇଛନ୍ତି। ଶ୍ରୀ ବୋଥ୍ରା ବ୍ରଜରାଜନଗରରେ କ୍ୟାମ୍ପ କରି ରହି ତଦନ୍ତ ପ୍ରକ୍ରିୟାକୁ ତ୍ୱରାନ୍ୱିତ କରୁଥିବାବେଳେ କ୍ରାଇମବ୍ରାଂଚ ଡିଏସପି ରମେଶ ଚନ୍ଦ୍ର ଦୋରାଙ୍କ ନେତୃତ୍ୱରେ ଗୋଟିଏ ଟିମ୍ ଅଭିଯୁକ୍ତ ଗୋପାଳ ଦାସଠୁ ଗୋଟିଏ ୯ଏମଏମ୍ ପିସ୍ତଲ, ୩ରାଉଣ୍ଡ ଜୀବନ୍ତ ଗୁଳି ଓ ମୋବାଇଲ ଫୋନ୍ ଜବତ କରିଛି । ଗୁଳିକାଣ୍ଡ ହୋଇଥିବା ସ୍ଥାନରୁ ମଧ୍ୟ ଗୋଟିଏ ଖାକା ଜବତ କରିଛନ୍ତି । ଏହି ସମସ୍ତ ସାମଗ୍ରୀର ଫୋରନ୍ସିକ ଓ ବାଲାଷ୍ଟିକ ଏକ୍ସପର୍ଟଙ୍କ ଦ୍ୱାରା ଯାଂଚ କରିବାକୁ ଭୁବନେଶ୍ୱରସ୍ଥିତ ରାଜ୍ୟ ଫୋରେନ୍ସିକ ଲ୍ୟାବକୁ ପଠାଯାଇଛି । ସେହିପରି ଡିଏସପି ଶିଶିର ମିଶ୍ରଙ୍କ ନେତୃତ୍ୱରେ ଅନ୍ୟ ଏକ ଟିମ୍ ଭୁବନେଶ୍ୱରରେ ମନ୍ତ୍ରୀ ଶ୍ରୀ ଦାସଙ୍କ ଶବ ବ୍ୟବଚ୍ଛେଦର ଭିଡିଓଗ୍ରାଫି କରିବା ସହ ତାଙ୍କ ରକ୍ତ ଜୁଡୁବୁଡୁ ଡ୍ରେସ, ହସ୍ପିଟାଲରେ ଚିକିତ୍ସିତ ହେଉଥିବାର ସମସ୍ତ ରିପୋର୍ଟକୁ ମଧ୍ୟ ନିଜ କବଜାକୁ ନେଇଛନ୍ତି । ଅଧିକ କେମିକାଲ ଯାଂଚ ପାଇଁ ଭିସେରାକୁ ମଧ୍ୟ ସଂରକ୍ଷିତ କରି ରଖାଯାଇଥିବା କ୍ରାଇମବ୍ରାଂଚ ପକ୍ଷରୁ ସୂଚନା ମିଳିଛି ।