ଭୁବନେଶ୍ୱର(ଓଡ଼ିଶା ରିପୋର୍ଟର): ଆଉ କିଛି ଦିନ ପରେ ଶଙ୍ଖାସିନ୍ଦୁର ପିନ୍ଧି ନବବଧୂ ସାଜି ଶାଶୁ ଘରକୁ ଯାଇଥାନ୍ତେ। ହେଲେ ତା’ ପୂର୍ବରୁ ସବୁ ଓଲଟପାଲଟ ହୋଇଗଲା। ହୋମ ନିଆଁ ବଦଳରେ ଜଳିଲା ଜୁଇର ନିଆଁ। ଏକ ଭଡ଼ା ଘରୁ ମିଳିଲା ଯୁବତୀଙ୍କ ଝୁଲନ୍ତା ମୃତଦେହ। ଏପରି ଘଟଣା ଘଟିଛି ଭୁବନେଶ୍ୱର ଲକ୍ଷ୍ମୀସାଗର ଥାନା ଚିନ୍ତାମଣିଶ୍ୱର ଅଞ୍ଚଳରେ।
ମୃତ ଯୁବତୀ ଜଣଙ୍କର ଘର ନୟାଗଡ଼ର ଗୁଡିପଲ୍ଲୀ ଅଞ୍ଚଳରେ ବୋଲି ଜଣାଯାଇଛି। ସେ ଭୁବନେଶ୍ୱରର ଏକ ବିଜ୍ଞାପନ କମ୍ପାନୀରେ କାମ କରୁଥିଲେ। ଯୁବତୀ ଜଣଙ୍କ କାହିଁକି ଆତ୍ମହତ୍ୟା କଲେ,ଏହା ପଛରେ କ’ଣ କାରଣ ଥାଇପାରେ, ତାହା ଜଣାପଡ଼ିନାହିଁ।
ପୁଲିସ ତାଙ୍କ ପରିବାର ଲୋକଙ୍କୁ ପଚରାଉଚରା କରୁଛି। ଯୁବତୀଙ୍କ ପରିବାର ଲୋକ ମଧ୍ୟ ଲକ୍ଷ୍ମୀସାଗର ଥାନାରେ ଏକ ଏତଲା ଦେଇଛନ୍ତି। ପୁଲିସ ମୃତଦେହକୁ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଛି ଓ ଘଟଣାର ତଦନ୍ତ କରୁଛି।
ମୃତ ଯୁବତୀଙ୍କ ରୁମ୍ରେ ରହୁଥିବା ତାଙ୍କ ସହଯୋଗୀଙ୍କ କହିବା ଅନୁସାରେ, ଯୁବତୀ ଜଣଙ୍କର ବିବାହ ସ୍ଥିର ହୋଇଥିଲା। ମଙ୍ଗଳବାର ରାତିରେ ଯୁବତୀ ଜଣଙ୍କ ବିବାହ ସ୍ଥିର ହୋଇଥିବା ପୁଅ ସହ କଥା ହେଉଥିଲେ। ହଠାତ୍ କୌଣସି କାରଣ ପାଇଁ ରାଗିଯାଇ ମୋବାଇଲକୁ କଚାଡ଼ି ଭାଙ୍ଗିବାକୁ ଚେଷ୍ଟା କରିଥିଲେ। ବୁଧବାର ଯୁବତୀ ଜଣଙ୍କ ଅଫିସ ଯାଇ ନ ଥିଲେ। ତାଙ୍କ ସହଯୋଗୀ ଅଫିସରୁ ଫେରି ଯୁବତୀ ଆତ୍ମହତ୍ୟା କରିଥିବା ଦେଖିଥିଲେ। ଏନେଇ ତାଙ୍କ ପରିବାର ଲୋକ ଓ ପୁଲିସକୁ ଜଣାଇଥିଲେ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
