ମୋହନା (ଓଡ଼ିଶା ରିପୋର୍ଟର): ଭୋଟର ତାଲିକାରୁ ନାଁ ବାଦ୍ ପଡ଼ିଥିବାରୁ ନାମାଙ୍କନ ପତ୍ର ଦାଖଲ କାର୍ଯ୍ୟକୁ ବନ୍ଦ କରିଦେଇ ନିର୍ବାଚନ ଅଧିକାରୀଙ୍କୁ ଭିତରେ ରଖି ପଞ୍ଚାୟତ ଅଫିସରେ ତାଲା ପକାଇ ଧାରଣା ବସିଲେ ଲୋକେ। ଏଭଳି ଘଟଣା ଘଟିଛି ଗଜପତି ଜିଲ୍ଲା ମୋହନାରେ।
ମିଳିଥିବା ସୂଚନା ଅନୁସାରେ, ଚଳିତ ପଞ୍ଚାୟତ ନିର୍ବାଚନ ପାଇଁ ଭୋଟର ତାଲିକା ପ୍ରକାଶ ପାଇଥିବା ବେଳେ ମୋହନା ପଞ୍ଚାୟତର ୧୧, ୧୨,୧୩ ଓ ୧୪ ନମ୍ବର ସମେତ ୫ଟି ଓ୍ୱାର୍ଡର ବାସିନ୍ଦାଙ୍କ ନାଁ ଏଥିରୁ ବାଦ୍ ପଡ଼ିଛି। ତେଣୁ ଏହି ଲୋକମାନେ ଆଜି ପଞ୍ଚାୟତ କାର୍ଯ୍ୟାଳୟରେ ପହଞ୍ଚି ନାମାଙ୍କନ ପତ୍ର ଦାଖଲ କାର୍ଯ୍ୟକୁ ବନ୍ଦ କରି ଦେଇଥିଲେ। ସେମାନେ ନିର୍ବାଚନ ଅଧିକାରୀଙ୍କୁ ପଞ୍ଚାୟତ କାର୍ଯ୍ୟାଳୟରେ ରଖି ତାଲା ପକାଇ ଦେଇଥିଲେ ଓ ତା’ ସମ୍ମୁଖରେ ଧାରଣାରେ ବସିଥିଲେ।
କିଛି ଲୋକ ପ୍ରାର୍ଥୀ ହେବା ପାଇଁ ଆଶା ରଖିଥିବା ବେଳେ ଭୋଟର ତାଲିକାରେ ନାଁ ନଥିବାରୁ ସେମାନେ ନିରାଶ ହୋଇଥିବା କହିଛନ୍ତି। ଏ ସମ୍ପର୍କରେ ବାରମ୍ବାର ପ୍ରଶାସନିକ ଅଧିକାରୀଙ୍କୁ ଜଣାଇବା ପରେ ବି କେହି ଶୁଣି ନଥିବାରୁ ଶେଷରେ ଏଭଳି ପ୍ରତିବାଦ କରାଯାଇଥିବା ଆନ୍ଦୋଳନକାରୀ କହିଛନ୍ତି।
ଆନ୍ଦୋଳନକାରୀ ପ୍ରଭାକର ମଲ୍ଲିକ କହିଛନ୍ତି, ଆମ ଗାଁରେ ଭୋଟର ତାଲିକାରେ କାହା ନାଁ ନାହିଁ। ଆମେ ଏନେଇ ବ୍ଲକ୍ ଅଫିସକୁ ଚାରି ଦିନ ହେଲା ଦୌଡ଼ି ଦୌଡ଼ି ନୟାନ୍ତ ହେଲୁଣି। ହେଲେ ସେମାନେ କିଛି ପ୍ରତିଶ୍ରୁତି ଦେଉ ନାହାନ୍ତି। ମୁଁ ସରପଞ୍ଚ ପ୍ରାର୍ଥୀ ଭାବେ ନିର୍ବାଚନ ଲଢ଼ିବାକୁ ଇଚ୍ଛା ରଖିଥିଲି। ହେଲେ ମୋ ନାଁ ଭୋଟର ତାଲିକାରେ ନଥିବାରୁ ନିର୍ବାଚନ ଲଢ଼ିପାରୁ ନାହିଁ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
