ଘରୋଇ ଋଣ ସଂସ୍ଥାର ଦବଙ୍ଗଗିରି ସୀମା ଟପିଲା। ଟଙ୍କା ଶୁଝିବାକୁ କହି ଜଣେ ମହିଳାଙ୍କ ଘର ଆଗରେ ଅଶ୍ରାବ୍ୟ ଭାଷାରେ ଗାଳିଗୁଲଜ କଲେ ୯ ଯୁବକ । ଦୀର୍ଘ ୫ରୁ ୬ ଘଣ୍ଟା ମହିଳାଙ୍କ ଘରେ ଆଗରେ ଜଗି ରହି ସେମାନେ ଏକ ପ୍ରକାର ଗୁଣ୍ଡାରାଜ ଚଳାଇଲେ। ମହିଳାଜଣକ ଋଣ ବିଷୟରେ କିଛି ଜାଣି ନ ଥିବା କହିବା ସତ୍ତ୍ୱେ ଟଙ୍କା ନ ଦେଲେ ଘର ଆଗରୁ ହଟିବେନି ବୋଲି ଧମକ ଦେଲେ । ଏନେଇ ମହିଳାଜଣକ ଥାନାର ଦ୍ୱାରସ୍ଥ ହୋଇଥିବା ବେଳେ ପୁଲିସ୍ ସମସ୍ତ ୯ ଯୁବକଙ୍କୁ ଅଟକ ରଖିଛି।
ଏପରି ଏକ ଘଟଣା ଗତ ରାତିରେ ଯାଜପୁର ଜିଲ୍ଲା ପାଣିକୋଇଲି ଥାନା ଅନ୍ତର୍ଗତ ସନ୍ତରା ଗ୍ରାମରେ ଘଟିଛି। ସନ୍ତରା ଗ୍ରାମର ପ୍ରିୟତମା ବିଶ୍ୱାଳ ନାମ୍ନୀ ମହିଳା ଏନେଇ ଥାନାରେ ଅଭିଯୋଗ କରିଛନ୍ତି ।
ପ୍ରିୟତମାଙ୍କ ଅନୁଯୋଗ ଅନୁଯାୟୀ, ସନ୍ତରା ଗ୍ରାମର କାଞ୍ଚନ ମଲ୍ଲିକ ନାମ୍ନୀ ମହିଳା ପ୍ରାୟ ବର୍ଷେ ପୂର୍ବେ ଗ୍ରାମର ଏକାଧିକ ମହିଳାଙ୍କୁ ଏକାଠି କରି କମ ସୁଧରେ ଋଣ କରାଇ ଦେବାକୁ କହିଥିଲେ । ସମସ୍ତଙ୍କୁ ଋଣ ଦେବାକୁ କହି ଉପଯୁକ୍ତ ପ୍ରମାଣପତ୍ର ମାଗିଥିଲେ। ପରେ ଚତୁରତାର ସହ ସମସ୍ତଙ୍କ ନାମରେ ଋଣ ଟଙ୍କା ଉଠାଇ ନେଇଥିଲେ l କିଛି ମାସ ଋଣ ସୁଝିବା ପରେ ଏବେ କାଞ୍ଚନ କେଉଁଆଡେ ଫେରାର ହୋଇଯାଇଛନ୍ତି ।
Also Read
ମୋ’ ନାଁରେ ଋଣ ହୋଇଥିବା ନେଇ ଜାଣି ନ ଥିବା ବେଳେ ଋଣ ଟଙ୍କା ବି ମୁଁ ପାଇ ନ ଥିବା କହିଛନ୍ତି ପ୍ରିୟତମା। ଏପରି ସ୍ଥିତିରେ ଫାଇନାନ୍ସ କର୍ମଚାରୀ ଘର ସମ୍ମୁଖରେ ପହଞ୍ଚି ଋଣ ଟଙ୍କା ଦେବାକୁ ଧମକାଇଥିଲେ। ମାତ୍ର ମୁଁ ଏ ବିଷୟରେ କିଛି ଜାଣି ନ ଥିବା କହିବା ସତ୍ତ୍ୱେ ସେମାନେ ଘର ଆଗରୁ ହଟି ନ ଥିଲେ।
ମୋ’ ସ୍ୱାମୀ, ପୁଅ ଘରେ ନ ଥିବା ବେଳେ ସେମାନେ ଆସିବା ପରେ ଫାଇନାନ୍ସ କର୍ମଚାରୀ ଉଭୟଙ୍କ ସହ ବଚସା କରିଥିଲେ। ଏପରିକି ସେମାନେ ମୋ’ ସ୍ୱାମୀଙ୍କୁ ଧକ୍କା ମାରିଥିବା କହିଛନ୍ତି ପ୍ରିୟତମା ।
ଗତ ରାତିରେ ଖବର ପାଇ ପୁଲିସ୍ ୯ ଫାଇନାନ୍ସ କର୍ମଚାରୀଙ୍କୁ ଉଠାଇ ଆଣିଥିବା ବେଳେ ଆଜି ଏ ନେଇ ପ୍ରିୟତମା ପାଣିକୋଇଲି ଥାନାରେ ଅଭିଯୋଗ କରିଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
