କୁନ୍ଦୁଲି ନାବାଳିକା ଗଣଦୁଷ୍କର୍ମ ମାମଲା: ଆବଶ୍ୟକ ପଡ଼ିଲେ ସନ୍ଦିଗ୍ଧଙ୍କ ଲାଇ ଡିଟେକ୍ସନ ଟେଷ୍ଟ ହେବ

<p>ଭୁବନେଶ୍ୱର: କୋରାପୁଟ ଜିଲ୍ଲା କୁନ୍ଦୁଲି ନାବାଳିକା ଗଣଦୁଷ୍କର୍ମ ଅଭିଯୋଗ ମାମଲାର ତଦନ୍ତ ଆଗେଇଛି। ସନ୍ଦିଗ୍ଧଙ୍କୁ ପଚରାଉଚୁରା କରାଯାଉଛି। କିଛି ତଥ୍ୟ ମିଳିଛି, ତା&rsquo; ଉପରେ ତଦନ୍ତ ଚାଲିଛି। ଆବଶ୍ୟକ ପଡ଼ିଲେ ବାରମ୍ବାର ବୟାନ&nbsp; ବଦଳାଉଥିବା ସନ୍ଦିଗ୍ଧଙ୍କ ଲାଇ ଡିଟେକ୍ସନ ଟେଷ୍ଟ ହୋଇପାରେ ବୋଲି କହିଛନ୍ତି ପୋଲିସ ଡିଜିପି ଡାକ୍ତର ରାଜେନ୍ଦ୍ର&nbsp; ପ୍ରସାଦ ଶର୍ମା।</p> <p>ସେ ଆହୁରି କହିଛନ୍ତି,&ldquo;ଘଟଣାରେ ସୁରକ୍ଷା କର୍ମୀ କିମ୍ବା ମାଓବାଦୀଙ୍କ ହାତ ଥିବା ନେଇ ଏଯାଏଁ କିଛି ତଥ୍ୟ&nbsp; ମିଳିନି। ମାମଲାର ତଦନ୍ତ ଆଶାଜନକ ଭାବେ ଆଗେଇ ଚାଲିଛି। ଆଉ କିଛି ତଥ୍ୟ ମିଳିବା ପରେ&nbsp; ତଦନ୍ତ ଅଧିକ ଆଗେଇ ପାରିବ।&rdquo;</p> <p>ସୂଚନାଯୋଗ୍ୟ, ଗତ ଅକ୍ଟୋବର ୧୦ ତାରିଖରେ କୋରାପୁଟ ଜିଲ୍ଲାରେ ଜଣେ ନାବାଳିକାଙ୍କୁ ଗଣଦୁଷ୍କର୍ମ କରାଯାଇଥିବା ଅଭିଯୋଗ ହୋଇଥିଲା। ୪ ଜଣ ଯବାନ ଏହି ଦୁଷ୍କର୍ମ କରିଥିବା ପୀଡ଼ିତାଙ୍କ ପରିବାର ଲୋକେ ଅଭିଯୋଗ କରିଥିଲେ। ଗୁରୁତର ଅବସ୍ଥାରେ ପୀଡ଼ିତା ନାବାଳିକାକୁ କୋରାପୁଟ ମେଡିକାଲରେ ଭର୍ତ୍ତି କରାଯାଇଥିଲା।</p> <p>ଏହି ଘଟଣାରେ ପୋଲିସ ୪ ଜଣଙ୍କୁ ଅଟକ ରଖି ପଚରାଉଚରା କରୁଥିଲା। ସେମାନଙ୍କ ମଧ୍ୟରୁ ୩ ଜଣଙ୍କୁ ପୋଲିସ ଛାଡ଼ି ଦେଥିବା ବେଳେ ଅନ୍ୟତମ ଅଭିଯୁକ୍ତଙ୍କୁ ଅଟକ ରଖି ପଚରାଉଚରା କରୁଛି। ଅନ୍ୟପକ୍ଷରେ ଏହି ଘଟଣାକୁ ନେଇ ରାଜନୀତି ଜୋର ଧରିଛି। ଗତ ସୋମବାର ଦିନ କୋରାପୁଟ ଜିଲ୍ଲାରେ କଂଗ୍ରେସ ୭ ଘଣ୍ଟିଆ ବନ୍ଦ ପାଳନ କରିଥିଲା।</p>