ଭୁବନେଶ୍ୱର(ଓଡ଼ିଶା ରିପୋର୍ଟର): ଦିନିକିଆ ଓଡ଼ିଶା ଗସ୍ତରେ ଆସିଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜି ୧୪ ହଜାର ୫୨୩ କୋଟି ଟଙ୍କାର ବିଭିନ୍ନ କେନ୍ଦ୍ରୀୟ ପ୍ରକଳ୍ପର ଲୋକାର୍ପଣ ଓ ଶିଳାନ୍ୟାସ କରିଛନ୍ତି। ଏଥିସହିତ ପାଇକ ବିଦ୍ରୋହ ସ୍ମାରକୀ ମୁଦ୍ରା ଓ ଡ଼ାକଟିକଟ ଜାରି କରିବା ସହ ଉତ୍କଳ ବିଶ୍ୱବିଦ୍ୟାଳୟରେ ବକ୍ସି ଜଗବନ୍ଧୁ ଚେୟାରର ସ୍ଥାପନା କରିଛନ୍ତି ମୋଦି।
ସୋମବାର ଅପରାହ୍ଣ ଗୋଟାଏ ୫ ମିନିଟ୍ରେ ଭୁବନେଶ୍ୱର ବିମାନ ବନ୍ଦରରେ ପହଞ୍ଚିଥିଲେ ମୋଦି। ସେଠାରୁ ସେ ହେଲିକପ୍ଟରରେ ଆଇଆଇଟି ଭୁବନେଶ୍ୱର ଯାଇଥିଲେ। ୧ ହଜାର ୧୨୬୦ କୋଟି ଟଙ୍କା ବ୍ୟୟରେ ନିର୍ମିତ ଆଇଆଇଟି ଭୁବନେଶ୍ୱରକୁ ସେ ଜାତି ଉଦ୍ଦେଶ୍ୟରେ ସମର୍ପଣ କରିଥିଲେ। ଏହି ଅବସରରେ ରାଜ୍ୟପାଳ ଗଣେଶୀ ଲାଲ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏବଂ ଦୁଇ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ଜୁଏଲ ଓରାମ ଓ ଭୁବନେଶ୍ୱର ସାଂସଦ ପ୍ରସନ୍ନ ପାଟଶାଣୀ ପ୍ରମୁଖ ଉପସ୍ଥିତ ଥିଲେ।
ଏଠାରେ ଆୟୋଜିତ ଉତ୍ସବରେ ସେ ୧୪ ହଜାର ୫୨୩ କୋଟି ଟଙ୍କାର ବିଭିନ୍ନ କେନ୍ଦ୍ରୀୟ ପ୍ରକଳ୍ପର ଶିଳାନ୍ୟାସ ଓ ଶୁଭାରମ୍ଭ କରିଥିଲେ। ଏଥିରେ ରହିଛି ୪ ହଜାର ୩୬୧ କୋଟି ଟଙ୍କା ବିନିଯୋଗରେ ନିର୍ମାଣ ହେବାକୁ ଥିବା NH-16 ର ଚଣ୍ଡିଖୋଲ-ଭଦ୍ରକ ସେକ୍ସନର ୬ ଲେନ୍ କରଣ, କଟକ-ଅନୁଗୋଳ ସେକ୍ସନର ୪ ଲେନ୍କରଣ, ଟାଙ୍ଗି-ପୁଇଁତଳା ସେକ୍ସନ୍ର ପ୍ରଶସ୍ତୀକରଣ ଓ ଖଣ୍ଡିଗିରି ଫ୍ଲାଏ ଓଭର। ସେହିପରି ଭୁବନେଶ୍ୱରରେ ଥିବା ESI ହସ୍ପିଟାଲର ଆଉ ୫୦ ଶଯ୍ୟା ଓ ଲଳିତଗିରି ପ୍ରତ୍ନତାତ୍ତ୍ୱିକ ସଂଗ୍ରହାଳୟକୁ ମଧ୍ୟ ମୋଦି ଲୋକାର୍ପଣ କରିଛନ୍ତି।
ବ୍ରହ୍ମପୁରରେ ନିର୍ମାଣ ହେବାକୁ ଥିବା ପ୍ରାୟ ୧୬ ଶହ କୋଟି ଟଙ୍କାର ଆଇଜର ଏବଂ ପାରାଦୀପ-ହାଇଦ୍ରାବାଦ୍ ଓ ବୋକାରୋ -ଅନୁଗୋଳ ତୈଳ ପାଇପ୍ ଲାଇନ୍ର ଶିଳାନ୍ୟାସ କରିଛନ୍ତି। ଏହାସହ ଉତ୍କଳ ବିଶ୍ୱବିଦ୍ୟାଳୟରେ ବକ୍ସି ଜଗବନ୍ଧୁ ଚେୟାର ବି ସ୍ଥାପନା କରିଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
