ନବରଙ୍ଗପୁର(ନବଘନ ବିଶୋୟୀ): ସମ୍ପତ୍ତି ଭାଗବଣ୍ଟାକୁ ନେଇ ୨ ବର୍ଷ ପୂର୍ବେ ଘଟିଥିଲା ରକ୍ତପାତ। ସାମାନ୍ୟ ଜମି ପାଇଁ ନିଜ ଜନ୍ମ କଲା ପୁଅକୁ ପିଟି ମାରିଥିଲା ବାପା । ଏଥିରେ ମୃତକଙ୍କ ୩ ଭାଇ ବି ସାମିଲ ଥିଲେ। ଦୀର୍ଘ ୨ ବର୍ଷରେ ଆଜି ଏହି ମାମଲାର ରାୟ ପ୍ରକାଶ ପାଇଛି। ମୃତକଙ୍କ ବାପା ଓ ୩ ଭାଇଙ୍କୁ ମିଳିଛି ଆଜୀବନ କାରାଦଣ୍ଡ । ଏପରି ଘଟଣା ନବରଙ୍ଗପୁର ଜିଲ୍ଲାରେ ଘଟିଛି।
ମୃତକ ହେଲେ ନବରଙ୍ଗପୁର ଜିଲ୍ଲା କୋଷାଗୁମୁଡା ଥାନା ଅନ୍ତର୍ଗତ ଗୁମଣ୍ଡଳୀ ଗ୍ରାମର ପଦ୍ମନ ନାୟକ । ଅଭିଯୁକ୍ତମାନେ ହେଉଛନ୍ତି ମୃତକ ପଦ୍ମନଙ୍କ ବାପା ଦାମୋଦର ନାୟକ, ଭାଇ ପ୍ରେମନାଥ ନାୟକ, ଶ୍ରୀଧର ନାୟକ, ଶ୍ୟାମସୁନ୍ଦର ନାୟକ l
ସୂଚନାଯୋଗ୍ୟ ଯେ, ନବରଙ୍ଗପୁର ଜିଲ୍ଲା କୋଷାଗୁମୁଡା ଥାନା ଅନ୍ତର୍ଗତ ଗୁମଣ୍ଡଳୀ ଗ୍ରାମର ଦାମୋଦରଙ୍କର ୪ ପୁଅ ଥିବା ବେଳେ ତାଙ୍କ ନିକଟରେ ୪ ଏକର ଜମି ଥିଲା। ବଡ଼ ୩ ଜଣ ୩ ଏକର ନେଇ ସାରିଥିବା ବେଳେ ଆଉ ଏକ ଏକର ଦାମୋଦରଙ୍କ ନିକଟରେ ଥିଲା। ଉକ୍ତ ଜମିରେ ନିଜ ହକ୍ ଥିବା କହି ପଦ୍ମନ ସେଥିରେ ଆଖୁ ଚାଷ କରିଥିଲେ। ହେଲେ ଏହାକୁ ନେଇ ଗଣ୍ଡଗୋଳ ଲାଗି ରହୁଥିଲା।
୨୦୧୯ ମସିହା ଏପ୍ରିଲ ୫ ତାରିଖରେ ଜମି ଭାଗବଣ୍ଟାକୁ ନେଇ ଦାମୋଦର ଓ ପଦ୍ମନଙ୍କ ମଧ୍ୟରେ ଗଣ୍ଡଗୋଳ ହୋଇଥିଲା। ଏହାଶୁଣି ଘଟଣାସ୍ଥଳକୁ ୩ ଭାଇ ଆସିଥିଲେ। ଏହାପରେ ବାପ ଓ ୩ ପୁଅ ପଦ୍ମନଙ୍କୁ ନିର୍ଧୂମ ପିଟିଥିଲେ। ଗୁରୁତର ଅବସ୍ଥାରେ ତାଙ୍କୁ କୋଟପାଡ଼ ହସ୍ପିଟାଲ ନିଆଯାଇଥିବା ବେଳେ ସେଠାରେ ତାଙ୍କୁ ଡାକ୍ତର ମୃତ ଘୋଷଣା କରିଥିଲେ l
ଏହାପରେ ମୃତ ପଦ୍ମନଙ୍କ ପତ୍ନୀଙ୍କ ଅଭିଯୋଗକୁ ଭିତ୍ତି କରି କୋଷାଗୁମୁଡା ପୁଲିସ୍ ମାମଲା ରୁଜୁ କରି ସମସ୍ତ ଅଭିଯୁକ୍ତକୁ କୋର୍ଟଚାଲାଣ କରିଥିଲା l ଆଜି ଏହାର ଶୁଣାଣ କରି ଜିଲ୍ଲା ଦୌରା ଜଜ ସଂଜୀବ ଦୁବେ ସମସ୍ତ ଅଭିଯୁକ୍ତଙ୍କୁ ଆଜୀବନ କାରାଦଣ୍ଡାଦେଶ ଦେଇଛନ୍ତି l
ଏଥିସହ ୨୦ ହଜାର ଲେଖାଏଁ ଜରିମାନା ପାଇଁ ମଧ୍ୟ ନିର୍ଦ୍ଦେଶ ଦିଆଯାଇଛି । ଜରିମାନା ଅନାଦେୟ ଆଉ ଏକ ବର୍ଷ ସଶ୍ରମ କାରାଦଣ୍ଡ ପାଇଁ ମଧ୍ୟ ଆଦେଶ ଦେଇଛନ୍ତି ଜିଲ୍ଲା ଜଜ । ପ୍ରାୟ ୨୨ଜଣ ସାକ୍ଷ୍ୟ ପ୍ରମାଣକୁ ଭିତ୍ତି କରି ଏହି ଶୁଣାଣି ହୋଇଛି l
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
