ଭୁବନେଶ୍ୱର(ଓଡ଼ିଶା ରିପୋର୍ଟର): ଛାତ୍ରଛାତ୍ରୀମାନେ ଏଣିକି ନିଜର ମାଟ୍ରିକ ଓ ବିଶ୍ୱବିଦ୍ୟାଳୟ ସାର୍ଟିଫିକେଟକୁ ଅନଲାଇନରେ ପାଇପାରିବେ।ଆସନ୍ତା ୨-୩ମାସ ମଧ୍ୟରେ ଅନଲାଇନରେ ସାର୍ଟିଫିକେଟ୍ ପ୍ରଦାନକୁ ଶତପ୍ରତିଶତ ସ୍ୱୟଂଚାଳିତ କରାଯିବ।
କଟକସ୍ଥିତ ବୋର୍ଡ ଅଫ୍ ସେକେଣ୍ଡାରୀ ଏଜୁକେସନ ଏବଂ ରାଜ୍ୟର ବିଭିନ୍ନ ବିଶ୍ୱବିଦ୍ୟାଳୟରୁ ସାର୍ଟଫିକେଟ୍ ଓ ମାର୍କଶିଟ୍ ପାଇବା ପାଇଁ ଛାତ୍ରଛାତ୍ରୀମାନଙ୍କ ଦରଖାସ୍ତ ଗ୍ରହଣ, ପ୍ରକ୍ରିୟାକରଣ, ବୈଧିକରଣ, ଦେୟ ଆଦାୟ, ଅନୁମୋଦନ ଓ ପ୍ରମାଣପତ୍ର ପ୍ରଦାନ ଆଦିକୁ ସମ୍ପୂର୍ଣ୍ଣ ଭାବେ କମ୍ପ୍ୟୁଟରୀକୃତ କରାଯିବ।
ସ୍କୁଲ ଓ ଗଣଶିକ୍ଷା ବିଭାଗର ୬ଟି ଏବଂ ଉଚ୍ଚଶିକ୍ଷା ବିଭାଗର ୨ଟି ସେବାକୁ ଏବେ ଅନଲାଇନରେ ନିର୍ଦ୍ଦିଷ୍ଟ ଅବଧି ମଧ୍ୟରେ ପ୍ରଦାନ କରାଯିବାକୁ ନିଷ୍ପତ୍ତି ହୋଇଛି। ହାଇସ୍କୁଲ ମାର୍କଶିଟ୍ ନକଲ, ବୋର୍ଡ ସାର୍ଟିଫିକେଟ୍ ନକଲ, ବୈଧକରଣ(ଭେରିଫିକେସନ) ସାର୍ଟିଫିକେଟ୍, ମାଇଗ୍ରେସନ୍ ସାର୍ଟିଫିକେଟ୍, ପ୍ରୋଭିଜିନାଲ ସାର୍ଟିଫିକେଟ୍ ଓ ମାର୍କଶିଟ୍ ସମେତ ବିଶ୍ୱବିଦ୍ୟାଳୟର ପ୍ରୋଭିଜିନାଲ ସାର୍ଟିଫିକେଟ୍ ଓ ମାଇଗ୍ରେସନ ସାର୍ଟିଫିକେଟ୍ ଏଣିକି ଅନଲାଇନରେ ମିଳିବ।
ଆଜି ମୁଖ୍ୟ ସଚିବ ଆଦିତ୍ୟ ପ୍ରସାଦ ପାଢ଼ୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏକ ଉଚ୍ଚସ୍ତରୀୟ ବୈଠକରେ ଏହି ନିଷ୍ପତ୍ତି ନିଆଯାଇଛି।