ବିଧାନସଭାର ଦ୍ୱିତୀୟ ପର୍ଯ୍ୟାୟ ବଜେଟ୍ ଅଧିବେଶନ ଆଜିଠୁ ଆରମ୍ଭ ହୋଇଥିଲେ ମଧ୍ୟ ସ୍ୱାସ୍ଥ୍ୟମନ୍ତ୍ରୀ ନବ ଦାସ ହତ୍ୟା ମାମଲାର ତଦନ୍ତର ଶିଥିଳତାକୁ ନେଇ ବିରୋଧୀ ବିଜେପି ଓ କଂଗ୍ରେସ ସଦସ୍ୟମାନେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଇସ୍ତଫା ଦାବିରେ ଗୃହରେ ହଟ୍ଟଗୋଳ କରିଥିଲେ । ଗୃହକୁ ସ୍ୱାଭାବିକ କରିବା ପାଇଁ ବାଚସ୍ପତି ବିକ୍ରମ କେଶରୀ ଆରୁଖ ସର୍ବଦଳୀୟ ବୈଠକ ଡାକିଥିଲେ ମଧ୍ୟ କୌଣସି ନିର୍ଯ୍ୟାସ ବାହାରିନଥିବା ଜଣାପଡ଼ିଛି । ଆଜି ଗୃହରେ ଅଚଳାବସ୍ଥା ମଧ୍ୟରେ ସରକାର ବିଭିନ୍ନ ବିଭାଗୀୟ ଷ୍ଟାଣ୍ଡିଂ କମିଟିର ରିପୋର୍ଟକୁ ଉପସ୍ଥାପିତ କରିଛନ୍ତି ।
ଆଜି ପୂର୍ବାହ୍ନରେ ଗୃହ କାର୍ଯ୍ୟ ଆରମ୍ଭ ହେବାମାତ୍ରେ ଅର୍ଥମନ୍ତ୍ରୀ ନିରଞ୍ଜନ ପୂଜାରୀ କ୍ୟାବିନେଟ୍ ବୈଠକର ନିଷ୍ପତ୍ତି ସମ୍ପର୍କରେ ଗୃହକୁ ଅବଗତ କରାଉଥିବାବେଳେ ନବ ଦାସ ହତ୍ୟାକାଣ୍ଡ ମାମଲାକୁ ନେଇ କଂଗ୍ରେସ ସଦସ୍ୟମାନେ ଗୃହର ମଧ୍ୟଭାଗକୁ ଯାଇ ମୁଖ୍ୟମନ୍ତ୍ରୀ କେଉଁଠି ଅଛନ୍ତି ଓ କୁଆଡ଼େ ଗଲେ ବୋଲି ସ୍ଲୋଗାନ ଦେଇ ହଟ୍ଟଗୋଳ କରିଥିଲେ । ବିଜେପି ସଦସ୍ୟମାନେ ମଧ୍ୟ ଗୃହର ମଧ୍ୟଭାଗକୁ ଆସି ହଟ୍ଟଗୋଳ କରିଥିଲେ । ଉଭୟ କଂଗ୍ରେସ ଓ ବିଜେପି ସଦସ୍ୟମାନେ ମୁଖ୍ୟମନ୍ତ୍ରୀଙ୍କ ଇସ୍ତଫା ଦାବି କରିଥିଲେ । ଗୃହରେ ଅଚଳାବସ୍ଥା ଦେଖି ବାଚସ୍ପତି ସାଢ଼େ ୧୧ଟା ପର୍ଯ୍ୟନ୍ତ ଗୃହକୁ ମୁଲତବୀ ଘୋଷଣା କରିଥିଲେ । ପରେ ପୁଣି ଗୃହରେ ଅଚଳାବସ୍ଥା ଜାରି ରହିବାରୁ ୧୧ଟା ୩୭ମିନିଟରେ ଗୃହକୁ ବାଚସ୍ପତି ଶ୍ରୀ ଆରୁଖ ୪ଟା ପର୍ଯ୍ୟନ୍ତ ମୁଲତବୀ ଘୋଷଣା କରିଥିଲେ । ଅପରାହ୍ନରେ ଗୃହ କାର୍ଯ୍ୟ ଆରମ୍ଭ ହେବାପରେ ଅଚଳାବସ୍ଥା ଜାରି ରହିଥିଲା । ବାଚସ୍ପତି ସର୍ବଦଳୀୟ ବୈଠକ ଡାକି ଗୃହକୁ ସ୍ୱାଭାବିକ ପାଇଁ ଉଦ୍ୟମ କରିôଥଳେ । ଏହି ସମୟରେ ୪ଟି ପର୍ଯ୍ୟାୟରେ ଗୃହ ପ୍ରାୟ ୫୦ମିନିଟ୍ ପର୍ଯ୍ୟନ୍ତ ମୁଲତବୀ ରହିଥିଲା । କିନ୍ତୁ ସର୍ବଦଳୀୟ ବୈଠକରେ କୌଣସି ନିର୍ଯ୍ୟାସ ବାହାରି ପାରିନଥିଲା । ବିରୋଧୀଙ୍କ ହଟ୍ଟଗୋଳ ଭିତରେ ବିଧାନସଭାରେ ବିଭିନ୍ନ କମିଟିର ରିପୋର୍ଟ ଉପସ୍ଥାପନ ହୋଇଥିଲା ।
Also Read
ଗୃହ ବାହାରେ ମୁଖ୍ୟମନ୍ତ୍ରୀଙ୍କୁ କଡ଼ା ସମାଲୋଚନା କରି ବିରୋଧୀ ଦଳ ନେତା ଜୟନାରାୟଣ ମିଶ୍ର କହିଥିଲେ ଯେ, ଗୃହର ନେତା ହୋଇ ମୁଖ୍ୟମନ୍ତ୍ରୀ ଯଦି ଗୃହକୁ ସମ୍ମାନ ଦେଉନାହାନ୍ତି, ତା’ହେଲେ ଆଉ କିଏ କ’ଣ ସମ୍ମାନ ଦେବ । ଗୃହକୁ ଆସିବାକୁ ମୁଖ୍ୟମନ୍ତ୍ରୀଙ୍କୁ ସମୟ ହେଉନି । ଘରେ ରହି ଭିସିରେ ଭାଗ ନେବାକୁ ମୁଖ୍ୟମନ୍ତ୍ରୀ ଚେଷ୍ଟା କରଉଛନ୍ତି । କିନ୍ତୁ ରାଜନୀତି କରିବାକୁ ତାଙ୍କ ପାଖରେ ପ୍ରଚୁର ସମୟ ଅଛି । ରାଜନୀତି କରିବାକୁ ସେ ବିଭିନ୍ନ ଅଂଚଳ ଗସ୍ତ କରୁଛନ୍ତି । ଏହା ଅତ୍ୟନ୍ତ ନିନ୍ଦନୀୟ । ସେହିପରି ବିରୋଧୀ ଦଳ ମୁଖ୍ୟ ସଚେତକ ମୋହନ ମାଝୀ କହିଥିଲେ ଯେ, ନବ ଦାସ ହତ୍ୟାକୁ ୪୧ଦିନ ବିତିଯାଇଥିଲେ ମଧ୍ୟ କ୍ରାଇମବ୍ରାଂଚ ତଦନ୍ତରୁ କିଛି ବି ସୁଫଳ ମିଳିପାରିନି । ହତ୍ୟା ପଛର ଷଡ଼ଯନ୍ତ୍ରକୁ ଉନ୍ମୋଚନ କରିବାରେ କ୍ର୍ରାଇମବ୍ରାଂଚ ବିଫଳ ହୋଇଛି । ତଦନ୍ତ ଦିଗହରା ହୋଇଥିବା ଭଳି ଲାଗୁଛି । ଏଭଳି ସମ୍ବେଦନଶୀଳ ହତ୍ୟା ମାମଲା ବାଟବଣା ହୋଇଥିବାରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଇସ୍ତଫା ଦେଇଦେବା ଉଚିତ୍ । ମୁଖ୍ୟମନ୍ତ୍ରୀ ଭାବେ ରହିବାରେ ତାଙ୍କର ନୈତିକ ଅଧିକାର ନାହିଁ ।
ସେହିପରି କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର ଗୃହ ବାହାରେ କହିଥିଲେ ଯେ, ନବ ଦାସଙ୍କ ହତ୍ୟା ଭଳି ସଙ୍ଗୀନ ମାମଲାରେ ମୁଖ୍ୟମନ୍ତ୍ରୀ ନୈତିକତା ଦୃଷ୍ଟିରୁ ଇସ୍ତଫା ଦେଇଦେବା ଦରକାର । ମୁଖ୍ୟମନ୍ତ୍ରୀ ନିଜେ ଗୃହ ବିଭାଗର ଦାୟିତ୍ୱରେ ଅଛନ୍ତି । ବିଧାନସଭା ଅଧିବେଶନ ଚାଲିଥିବାବେଳେ ମୁଖ୍ୟମନ୍ତ୍ରୀ ରାଉରକେଲା ଗସ୍ତରେ ଯାଉଛନ୍ତି । ଏହା ଗୃହକୁ ଅପମାନ । ମୁଖ୍ୟମନ୍ତ୍ରୀ ଉଭୟ ବିଧାନସଭା ଓ ଓଡ଼ିଶା ଲୋକଙ୍କ ନିକଟରେ ଉତ୍ତରଦାୟୀ । ନବ ଦାସ ହତ୍ୟା ମାମଲାର ତଦନ୍ତ ଏବେ ସଠିକ୍ ବାଟରେ ଯାଉନି । ହତ୍ୟା ପଛରେ ଷଡ଼ଯନ୍ତ୍ର ରହିଛି ବୋଲି ସରକାର ନିଜେ ସ୍ୱୀକାର କରିଥିଲେ ମଧ୍ୟ ଏନେଇ ବିସ୍ତୃତ ତଥ୍ୟ ଦେଇନାହାନ୍ତି । ସେହିପରି କଂଗ୍ରେସ ବିଧାୟକ ତାରାପ୍ରସାଦ ବାହିନୀପତି କହିଛନ୍ତି ଯେ, ମନ୍ତ୍ରୀ ନବ ଦାସ ହତ୍ୟା ମାମଲାରେ ତଦନ୍ତ ନାଁରେ ରାଜ୍ୟବାସୀଙ୍କୁ ରାଜ୍ୟ ସରକାର ଭୁଆ ବୁଲାଉଛନ୍ତି । ତଦନ୍ତର ନେତୃତ୍ୱ କିଏ ନେଉଛି ତାହା କେହି ଜାଣନ୍ତି ନାହିଁ ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
