୨୦୨୨-୨୩ ଆର୍ଥିକ ବର୍ଷର ଶେଷ ସୁଦ୍ଧା ଅର୍ଥାତ ଚଳିତବର୍ଷ ମାର୍ଚ୍ଚ ମାସ ଶେଷସୁଦ୍ଧା ରାଜ୍ୟର ଋଣବୋଝ ୯୭ହଜାର ୩୭କୋଟି ୬୮ଲକ୍ଷ ଟଙ୍କାରେ ସୀମିତ ରହିବ । ଯାହାକି ସର୍ବନିମ୍ନସ୍ତରରେ ତଥା ରାଜ୍ୟ ଜିଡିପିର ୧୨.୬୭ପ୍ରତିଶତ । ରାଜ୍ୟ ସରକାର ରାଜ୍ୟ ଜିଡିପିର ୨୫ ପ୍ରତିଶତ ପର୍ଯ୍ୟନ୍ତ ଅର୍ଥକୁ ଋଣ ଆକାରରେ ଆଣିବା ପାଇଁ ସକ୍ଷମ ହୋଇଥିଲେ ମଧ୍ୟ ଗତ କିଛିବର୍ଷ ଧରି ରାଜ୍ୟ ସରକାର ନିଜର ଋଣବୋଝକୁ କ୍ରମାଗତ ହ୍ରାସ କରିବାରେ ଲାଗିଛନ୍ତି । ଆଉ ରାଜ୍ୟ ସରକାରଙ୍କ ପାଇଁ ଓଏମବିଡିସି ଓ କାମ୍ପା ପାଣ୍ଠି ଏବେ ବରଦାନ ସାବ୍ୟସ୍ତ ହୋଇଛି । ଏହି ଦୁଇଟି ସ୍କିମରେ ଥିବା ବଳକା ପାଣ୍ଠିରୁ ପ୍ରାୟ ୬୦ ପ୍ରତିଶତ ପର୍ଯ୍ୟନ୍ତ ଅର୍ଥ ଖର୍ଚ୍ଚକୁ ସ୍ୱଳ୍ପମିଆଦୀ କମ୍ ସୁଧ ହାରରେ ଋଣ କରିବାର ଅନୁମତି ଥିବାରୁ ରାଜ୍ୟ ସରକାର ଏବେ ବ୍ୟବସ୍ଥିତ ଢଙ୍ଗରେ ନିଜର ଋଣ ପରିଚାଳନା କରିଥିବା ଜଣାପଡ଼ିଛି ।
ଆଜି ରାଜ୍ୟ ସରକାରଙ୍କ ପକ୍ଷରୁ ଉପସ୍ଥାପିତ ବଜେଟ୍ ଦସ୍ତାବିଜ ଅନୁସାରେ, ୨୦୨୩-୨୪ ଆର୍ଥିକ ବର୍ଷ ଶେଷ ସୁଦ୍ଧା ରାଜ୍ୟର ମୋଟ ଋଣବୋଝ ୧,୧୨,୮୮୧ .୬୨ କୋଟି ଟଙ୍କା ଛୁଇଁବ । ତେବେ ୨୦୨୨-୨୩ ଆର୍ଥିକ ବର୍ଷ ପ୍ରାରମ୍ଭରେ ରାଜ୍ୟର ମୋଝ ଋଣବୋଝ ୯୭ହଜାର ୨୦୪କୋଟି ୪୯ଲକ୍ଷ ଟଙ୍କା ଥିବାବେଳେ ବର୍ଷ ଶେଷବେଳକୁ ତାହା ୯୭ହଜାର ୩୭କୋଟି ୬୮ଲକ୍ଷ ଟଙ୍କାକୁ ହ୍ରାସ ପାଇଛି । ଅବଶ୍ୟ ଏହି ଅବଧିରେ ରାଜ୍ୟ ସରକାର ଖୋଲା ବଜାରରୁ ଆଣିଥିବା ଉଚ୍ଚସୁଧଯୁକ୍ତ ଋଣରୁ ପ୍ରାୟ ୭ହଜାର ୫୦୦କୋଟି ଟଙ୍କା ପରିଶୋଧ କରିଛନ୍ତି । ନାବାର୍ଡରୁ ୨୩୪୭କୋଟି ଟଙ୍କା, ଓଏମବିଡିସି ଓ ଅନ୍ୟ ପ୍ରତିଷ୍ଠାନରୁ ୮୦୦କୋଟି ଟଙ୍କା, ଭାରତ ସରକାରଙ୍କଠୁ ୪୦୭୧କୋଟି ଟଙ୍କା ଋଣ କରିଛନ୍ତି । ଭାରତୀୟ ସାଧାରଣ ବୀମା ନିଗମ(ଜିଆଇସି)ରୁ ଆଣିଥିବା ଅଧିକ ସୁଧଯୁକ୍ତ ଋଣକୁ ମଧ୍ୟ ଚଳିତ ଆର୍ଥିକ ବର୍ଷରେ ପରିଶୋଧ କରିଛନ୍ତି ।
ରାଜ୍ୟ ସରକାରଙ୍କ ଏହି ବ୍ୟବସ୍ଥିତ ଋଣ ପରିଚାଳନା ଯୋଗୁ ୨୦୨୦-୨୧ ଆର୍ଥିକ ବର୍ଷରେ ରାଜ୍ୟର ଋଣବୋଝ ମୋଟ ଜିଏସଡିପି(ରାଜ୍ୟ ସାମଗ୍ରିକ ଘରୋଇ ଉତ୍ପାଦ)ର ୧୯.୫ % ରହିଥିଲା । ଯାହାକି ୨୦୨୧-୨୨ରେ ୧୫.୨% ଓ ୨୦୨୨-୨୩ରେ ୧୨.୬୭ ପ୍ରତିଶତ(ମୋଟ ରାଜ୍ୟ ଜିଡିପିର)କୁ ହ୍ରାସ ପାଇଛି । ଚଳିତ ଆର୍ଥିକ ବର୍ଷ ଶେଷ ସୁଦ୍ଧା ରାଜ୍ୟର ଋଣବୋଝ ୯୭ହଜାର ୩୭କୋଟି ଟଙ୍କା ମଧ୍ୟରେ ସୀମିତ ରହିବ ଏବଂ ୨୦୨୪ ମାର୍ଚ୍ଚ ଶେଷ ସୁଦ୍ଧା ଏହା ୧,୧୨,୮୮୧.୬୨ଲକ୍ଷ କୋଟି ଟଙ୍କାକୁ ବୃଦ୍ଧି ପାଇବାର ଆକଳନ ହୋଇଛି । ତେବେ ସରକାର ଖୋଲା ବଜାରରୁ ଆଣିଥିବା ଋଣ ପରିମାଣକୁ ହ୍ରାସ ଉପରେ ଗୁରୁତ୍ୱ ଦେଉଥିବା ଜଣାପଡ଼ିଛି ।
ସୂଚନାଯୋଗ୍ୟ, ୨୦୨୨-୨୩ ଆର୍ଥିକ ବର୍ଷ ଶେଷ ସୁଦ୍ଧା ରାଜ୍ୟର ମୋଝ ଋଣବୋଝର ୨୭% ଖୋଲା ବଜାରରୁ ଆସିଥିବାବେଳେ ଜିପିଏଫରୁ ୨୬%, ଏନଏସଏସଏଫରୁ ୭%, ଭାରତ ସରକାରଙ୍କଠୁ ୨୧ ପ୍ରତିଶତ, ନାବାର୍ଡ ଓ ଅନ୍ୟାନ୍ୟଙ୍କଠୁ ୧୯% %ଋଣ ଆସିଥିବା ଜଣାପଡ଼ିଛି ।