ଭୁବନେଶ୍ୱର(ଓଡ଼ିଶା ରିପୋର୍ଟର): ଆୟ ବହିର୍ଭୁତ ସଂପତ୍ତି ଠୁଳକୁ ଠାବ କରିବା ଓ ଏହା ବିରୋଧରେ କାର୍ଯ୍ୟାନୁଷ୍ଠାନ ନେବାରେ ଓଡ଼ିଶାର ଭିଜିଲାନ୍ସ ଏକ ନମ୍ବର। ୨୦୨୧ ଏନ୍ସିଆରବି ତଥ୍ୟରୁ ଏହା ଜଣାପଡ଼ିଛି। ଦେଶର ମୋଟ ୩୯୮ଟି ମାମଲା ମଧ୍ୟରୁ ଓଡ଼ିଶା ଭିଜିଲାନ୍ସ ୯୨ଟି ମାମଲା ରୁଜୁ କରିଛି। ଯାହାକି ସାରା ଦେଶର ମାମଲାର ୨୩ ପ୍ରତିଶତ।
ସେହିପରି ଦଣ୍ଡବିଧାନ ହାର ରହିଛି ୪୨.୫ ପ୍ରତିଶତ। ଭିଜିଲାନ୍ସ ତରଫରୁ ଚାଲିଥିବା ଦୁର୍ନୀତି ବିରୋଧୀ ଲଢ଼େଇ ଅଭିଯାନରେ ୨୦୨୧ରେ ୧୨ ଜଣ ସରକାରୀ କର୍ମଚାରୀଙ୍କ ଚାକିରି ଯାଇଛି। ଆୟ ବହିର୍ଭୁତ ସଂପତ୍ତି ଠୁଳ ଅଭିଯୋଗରେ ଦୋଷୀ ସାବ୍ୟସ୍ତ ହେବା ପରେ ସେମାନଙ୍କୁ ଚାକିରିରୁ ବହିଷ୍କାର କରାଯାଇଛି।
ଗତବର୍ଷ ୩୭ଟି ଭିଜିଲାନ୍ସ ମାମଲାର ବିଚାର ଶେଷ ହୋଇଛି ଓ ୪୬ ଜଣ ଦୋଷୀସାବ୍ୟସ୍ତ ହୋଇଛନ୍ତି। କିନ୍ତୁ ଅନ୍ୟ ୫୦ଟି ମାମଲାରେ ୬୬ ଜଣ ନିର୍ଦ୍ଦୋଷରେ ଖଲାସ ହୋଇଛନ୍ତି। ସେହିପରି ଗତବର୍ଷ ସରକାରୀ ବାବୁଙ୍କ ବିରୋଧରେ ମଧ୍ୟ ୭୫ଟି ଅପରାଧ ମାମଲା ରୁଜୁ କରିଛି ଭିଜିଲାନ୍ସ ଏହି ମାମଲା କ୍ଷେତ୍ରରେ ତାମିଲନାଡୁ ପଛକୁ ଦ୍ୱିତୀୟ ସ୍ଥାନରେ ରହିଛି ଓଡ଼ିଶା।
ଏ ବାବଦରେ, ୨୦୨୨ରେ ମଧ୍ୟ ଏହି ଅଭିଯାନ ଜାରି ରହିବ ଓ ଦୁର୍ନୀତିଗ୍ରସ୍ତ ସରକାରୀ ଅଧିକାରୀଙ୍କ ବିରୋଧରେ କଡ଼ା ପଦକ୍ଷେପ ନିଆଯିବ ବୋଲି ଓଡ଼ିଶା ଭିଜିଲାନ୍ସ ନିର୍ଦ୍ଦେଶାଳୟ ପକ୍ଷରୁ କୁହାଯାଇଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
