ଆସନ୍ତା ମେ’ ପହିଲାରୁ ରାଜ୍ୟରେ ଓବିସି ସର୍ଭେ ଆରମ୍ଭ ହେବାକୁ ଯାଉଥିବାବେଳେ ଆଜି ରାଜ୍ୟ କ୍ୟାବିନେଟ ଓବିସି ଆୟୋଗ ଅଧିନିୟମ-୧୯୯୩ରେ ସଂଶୋଧନକୁ କାର୍ଯ୍ୟକାରୀ କରିବା ନିମନ୍ତେ ଅଧ୍ୟାଦେଶକୁ ଅନୁମୋଦନ କରିଛନ୍ତି। ଗତ ବିଧାନସଭା ଅଧିବେଶନରେ ଏହି ବିଲକୁ ଗୃହୀତ ନକରାଇ ରାଜ୍ୟ ସରକାର ଫେରାଇ ଆଣିଥିଲେ। ଏହାସହିତ କଟକ ସହରର ରିଂ-ରୋଡର ଖାନନଗରଠୁ ଲିଙ୍କ ରୋଡ୍ ମଧ୍ୟରେ ରାସ୍ତାକୁ ୬ ଲେନ୍ ବିଶିଷ୍ଟ ଓ ୨୦୩୩ ମସିହା ପର୍ଯ୍ୟନ୍ତ ଭାରତୀୟ ହକି ଦଳର ପ୍ରାୟୋଜକ ଭାବେ ଓଡ଼ିଶା ଖଣି ନିଗମ ରହିବ ବୋଲି ଆଜି କ୍ୟାବିନେଟ୍ ମଞ୍ଜୁରୀ ଦେଇଛନ୍ତି ।
ଆଜି ସନ୍ଧ୍ୟାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ଅନୁଷ୍ଠିତ କ୍ୟାବିନେଟ୍ ବୈଠକ ସମ୍ପର୍କରେ ରାଜ୍ୟ ସରକାରଙ୍କ ପକ୍ଷରୁ ମିଳିଥିବା ସୂଚନା ଅନୁସାରେ ମୋଟ ୧୫ଟି ପ୍ରସ୍ତାବକୁ ଅନୁମୋଦନ ମିଳିଛି । ରାଜ୍ୟ ସରକାର ଅଧ୍ୟାଦେଶ ମାଧ୍ୟମରେ ଓବିସି ଆୟୋଗ ଅଧିନିୟମ-୧୯୯୩ର ସଂଶୋନକୁ କାର୍ଯ୍ୟକାରୀ ପାଇଁ ନିଷ୍ପତ୍ତି ନେଇଛନ୍ତି । ରାଜ୍ୟ କ୍ୟାବିନେଟ୍ ଆଜି ଏ ସଂକ୍ରାନ୍ତ ଅଧ୍ୟାଦେଶକୁ ମଞ୍ଜୁରୀ ପ୍ରଦାନ କରିଛନ୍ତି । ରାଜ୍ୟର ୨୨ଟି ଜାତି ଓ ସମ୍ପ୍ରଦାୟକୁ ଭାରତ ସରକାର ବିଭିନ୍ନ ବିଜ୍ଞପ୍ତି ମାଧ୍ୟମରେ ଓଡ଼ିଶା ପାଇଁ ଓବିସି ତାଲିକାଭୁକ୍ତ କରିଛନ୍ତି । ମାତ୍ର ସେମାନେ ଏପର୍ଯ୍ୟନ୍ତ ଓଡ଼ିଶା ସରକାରଙ୍କ ଏସଇବିସି ତାଲିକାଭୁକ୍ତ ହୋଇନାହାନ୍ତି । ତେଣୁ ସେମାନଙ୍କୁ ଏହି ଏସଇବିସି ତାଲିକାଭୁକ୍ତ କରିବା ନିମନ୍ତେ ଓଡ଼ିଶା ପଛୁଆ ବର୍ଗ ଆୟୋଗ ଅଧିନିୟମ,୧୯୯୩ର ଧାରା -୯ର ଉପଧାରା-୩କୁ ଅନ୍ତର୍ଭୁକ୍ତ କରିବା ସଂକ୍ରାନ୍ତ ଅଧ୍ୟାଦେଶକୁ କ୍ୟାବିନେଟ୍ ମଞ୍ଜୁରୀ ଦେଇଛନ୍ତି ।
ସେହିପରି ଓଡ଼ିଶାରେ ୨ଥର ବିଶ୍ୱକପ୍ ହକି ପୁରୁଷ ପ୍ରତିଯୋଗିତା ଆୟୋଜନ କରିଥିବା ଓଡ଼ିଶା ଖଣି ନିଗମ ୨୦୩୩ ମସିହା ପର୍ଯ୍ୟନ୍ତ ଭାରତୀୟ ଜାତୀୟ ହକି ଟିମଗୁଡ଼ିକର ପ୍ରାୟୋଜକ ରହିବେ । ୨୦୧୮ ମସିହାରେ ଓଡ଼ିଶା ଉଭୟ ଜାତୀୟ ପୁରୁଷ ଓ ମହିଳା ହକି ଟିମର ପ୍ରାୟୋଜକ ରହିଛି । ୨୦୨୩ ମସିହାରେ ଏହି ପ୍ରାୟୋଜକ ଅବଧି ଶେଷ ହେଉଥିଲା । ଏହି ପ୍ରାୟୋଜକ ହେବା ନିମନ୍ତେ ଓଡ଼ିଶା ଖଣି ନିଗମ(ଓଏମସି) ପକ୍ଷରୁ ରାଜ୍ୟ ସରକାରଙ୍କ ଅନୁମତି ଲୋଡ଼ାଯାଇଥିଲା । ଯାହାକୁ ରାଜ୍ୟ କ୍ୟାବିନେଟ୍ ଆଜି ମଞ୍ଜୁରୀ ଦେଇଛନ୍ତି । ୨୦୨୩ ଫେବୃୟାରୀ ୧ରୁ ୨୦୩୩ ଜାନୁୟାରୀ ୩୧ ପର୍ଯ୍ୟନ୍ତ ଭାରତୀୟ ହକି ଟିମ(ଉଭୟ ପୁରୁଷ ଓ ମହିଳା)ର ପ୍ରାୟୋଜକ ଭାବେ ଓଏମସି ୪୩୪.୧୨କୋଟି ଟଙ୍କା(ଟିକସକୁ ବାଦ୍ ଦେଇ) ପ୍ରଦାନ କରିବ ।
ସେହିପରି କଟକ ସହରର ରିଂରୋଡର ଖାନନଗରରୁ ଲିଙ୍କରୋଡ୍ ପର୍ଯ୍ୟନ୍ତ ରାସ୍ତାକୁ ୬ଲେନ୍ ବିଶିଷ୍ଟ କରିବା ପାଇଁ ମୋଟ ୧୨୧.୬୫କୋଟି ଟଙ୍କାର ଟେଣ୍ଡରକୁ ଆଜି କ୍ୟାବିନେଟ୍ ଅନୁମୋଦନ କରିଛନ୍ତି । ଆରକେଡି କନଷ୍ଟ୍ରକ୍ସନ ପ୍ରାଃ ଏହି ଟେଣ୍ଡର ନେଇଛି ଓ ୨୪ମାସ ମଧ୍ୟରେ କାର୍ଯ୍ୟ ଶେଷ ଲକ୍ଷ୍ୟ ରଖାଯାଇଛି । ଖାନନଗର ଓ ଲିଙ୍କ ରୋଡ୍ ମଧ୍ୟରେ ଯାତାୟତ ସୁବିଧା ସହ ଟ୍ରାଫିକ ସମସ୍ୟାର ସମାଧାନ ପାଇଁ ଏହି ପଦକ୍ଷେପ ନିଆଯାଇଛି । ନୂଆ ଅତ୍ୟାଧୁନିକ ବସଷ୍ଟାଣ୍ଡ ରିଂରୋଡ କଡ଼ରେ ହେଉଥିବାରୁ ଏହାକୁ ସଂଯୋଗ ନିମନ୍ତେ ଏହି ୬ଲେନ୍ ବିଶିଷ୍ଟ ରାସ୍ତା ନିର୍ମାଣ କରାଯାଉଥିବା ଜଣାପଡ଼ିଛି ।
ସେହିପରି ବିଜୁ ସେତୁ ଯୋଜନାରେ ଆଉ ୮୬୬ଟି ସେତୁ ନିର୍ମାଣ ପ୍ରସ୍ତାବକୁ କ୍ୟାବିନେଟ୍ ମଞ୍ଜୁର କରିଛନ୍ତି । ଏହାସହିତ ଇ-ଯାନ କ୍ରୟ ଉପରେ ରିହାତି ବୃଦ୍ଧି ପ୍ରସ୍ତାବକୁ କ୍ୟାବିନେଟ ଅନୁମୋଦନ କରିଛନ୍ତି ଫଳରେ ଇ-ଯାନ କ୍ରୟ ଓ ପଞ୍ଜିକରଣ ପାଇଁ ଦିଆଯାଉଥିବା ପ୍ରୋତ୍ସାହନ ରିହାତି ହାରକୁ ବୃଦ୍ଧି ନିମନ୍ତେ ନିଷ୍ପତ୍ତି ହୋଇଛି । ଅନ୍ୟ ରାଜ୍ୟଗୁଡ଼ିକର ସର୍ବୋତ୍ତମ ବ୍ୟବସ୍ଥାକୁ ଅନୁସରଣ କରି ଏହି ରିହାତି ହାରକୁ ରାଜ୍ୟ ସରକାର ବୃଦ୍ଧି କରିଛନ୍ତି । ୨୦୨୫ ମସିହା ସୁଦ୍ଧା ରାଜ୍ୟରେ ଶତକଡ଼ା ୨୦ ପ୍ରତିଶତ ଇଲେକ୍ଟ୍ରିକ ଯାନ ପଞ୍ଜିକରଣ ଲକ୍ଷ୍ୟରେ ରାଜ୍ୟ ସରକାର ବୈଦ୍ୟୁତିକ ଯାନ ନୀତି-୨୦୨୧କୁ ଗତ ୨୦୨୧ ସେପ୍ଟେମ୍ବର ମାସରୁ ଲାଗୁ କରିଥିଲେ। ଏହି ନୀତି ୨୦୨୧ ସେପ୍ଟେମ୍ବର ୧ରୁ ରାଜ୍ୟରେ ଲାଗୁ ହେଉଛି । ଏବେ ରିହାତି ହାର ବୃଦ୍ଧି ପାଇବା ଯୋଗୁ ବୈଦ୍ୟୁତିକ ଯାନ କ୍ରୟ ବୃଦ୍ଧି ହେବ ବୋଲି ସରକାର ଆଶା ରଖିଛନ୍ତି।