ଭିଜିଲାନ୍ସ ପଞ୍ଝାରେ ଜିଆରଏସ୍, ଟୁଇନ ସିଟିରେ ରହିଛି ୫୯ଟି ପ୍ଲଟ

ଭୁବନେଶ୍ୱର(ଓଡ଼ିଶା ରିପୋର୍ଟର): ଗୋଟିଏ କି ଦୁଇଟି ନୁହେଁ, ଜିଆରଏସ୍(ଗ୍ରାମ ରୋଜକାର ସେବକ)ଙ୍କ ନାମରେ ରହିଛି ୫୯ଟି ପ୍ଲଟ। ତାହାପୁଣି ଟୁଇନ ସିଟିରେ। ଏହି ଜିଆରଏସ୍ ହେଲେ ଭୁବନେଶ୍ୱର କଳାରାହାଙ୍ଗ ପଞ୍ଚାୟତର ବାବୁଲି ପଢ଼ିହାରୀ। ଆୟ ବହିର୍ଭୁତ ସଂପତ୍ତି ଠୁଳ ଅଭିଯୋଗରେ ତାଙ୍କର ଘରେ ଓ ଅଫିସରେ ଆଜି ଭିଜିଲାନ୍ସ ଚଢ଼ଉ କରିଥିଲା। ଏକକାଳୀନ ୬ଟି ଜାଗାରେ ହୋଇଥିବା ଚଢ଼ଉରେ ତାଙ୍କ ନାମରେ ରହିଥିବା ୫୯ଟି ପ୍ଲଟ ମିଳିଛି। ଏଥିମଧ୍ୟରୁ ଭୁବନେଶ୍ୱରରେ ଅଛି ୫୮ଟି ଓ ଗୋଟିଏ ପ୍ଲଟ କଟକ ବେଲଗଛିଆରେ ରହିଛି।

ଏଥିସହିତ ରଘୁନାଥପୁରରେ ଗୋଟିଏ ୩ ମହଲା କୋଠା, ଦାଢ଼ାରେ ଏକ ଘର ଅଛି। ୩ ମହଲା କୋଠାର ଦାମ୍ ପାଖାପାଖି ୧.୨୪ କୋଟି ଟଙ୍କା ହେବ। ଆଶୀର୍ବାଦ ପ୍ଲାଜାରେ ତାଙ୍କର ଗୋଟିଏ ଫ୍ଲାଟ ମଧ୍ୟ ରହିଛି। ଆଖି ଟେରା ହୋଇଯିବା ଭଳି ସଂପତ୍ତି ଦେଖି ଭିଜିଲାନ୍ସ ଅଫିସରମାନେ ତଦନ୍ତ ଜାରି ରଖିଛନ୍ତି। ବ୍ୟାଙ୍କ ଡିପୋଜିଟ, ବୀମା ଓ ଅନ୍ୟ ଧନ ସଂପତ୍ତି ଖୋଜୁଛି ଭିଜିଲାନ୍ସ। ଆକଳନ ଶେଷ ହୋଇ ନ ଥିବାରୁ ଆହୁରି ସମ୍ପତ୍ତି ମିଳିବ ବୋଲି ଅନୁମାନ କରାଯାଇଛି। ଏହି ଚଢ଼ାଉରେ ଭିଜିଲାନ୍ସର ୧୦ ଇନ୍ସପେକ୍ଟର, ୩ ଡିଏସପି ଓ ଅନ୍ୟ କର୍ମଚାରୀ ନିୟୋଜିତ ହୋଇଛନ୍ତି। ଜିଆରଏସଙ୍କୁ ତାଙ୍କ ବିଳାସପୂର୍ଣ୍ଣ ବାସଭବନରେ ବସାଇ ଭିଜିଲାନ୍ସ ଅଧିକାରୀମାନେ ପଚରାଉଚରା କରୁଛନ୍ତି। ଭୋର ୪ଟାରୁ ଏହି ଚଢ଼ଉ ହୋଇଥିଲା। ସରକାରୀ କାର୍ଯ୍ୟରେ ଟଙ୍କା ହେରଫେର ଓ ଆୟବହିର୍ଭୁତ ସମ୍ପତ୍ତି ଠୁଳ ନେଇ ଅଭିଯୋଗ ହୋଇଥିଲା। ଭିଜିଲାନ୍ସ ପଞ୍ଝାରେ ପଡ଼ିଥିବା ଏହି ତଳିଆ ସରକାରୀ କର୍ମଚାରୀ କିପରି କୋଟିପତି ହେଲେ ତାହାକୁ ନେଇ ଏବେ ଚର୍ଚ୍ଚା ଦେଖାଦେଇଛି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।