ରାଜ୍ୟର ସବୁ ଜିଲ୍ଲାରେ ହେବ ଓଜେଇଇ ପରୀକ୍ଷା କେନ୍ଦ୍ର, ବଢ଼ିଲା ଆବେଦନ ଅବଧି

ଭୁବନେଶ୍ୱର(ଓଡ଼ିଶା ରିପୋର୍ଟର): ଚଳିତବର୍ଷ ରାଜ୍ୟର ସମସ୍ତ ଜିଲ୍ଲାରେ ଓଜେଇଇ ପରୀକ୍ଷା କେନ୍ଦ୍ର ହେବ। ଏହାସହିତ ଓଜେଇଇ ଆବେଦନ ଅବଧି ତାରିଖକୁ ଜୁଲାଇ ୩୦ତାରିଖ ପର୍ଯ୍ୟନ୍ତ ବୃଦ୍ଧି କରାଯାଇଛି ଓ ଫି’ ସହ ଅଗଷ୍ଟ ୨ତାରିଖ ପର୍ଯ୍ୟନ୍ତ ବଢ଼ାଇ ଦିଆଯାଇଛି।

ମିଳିଥିବା ସୂଚନା ଅନୁସାରେ, ଆଜି ଓଜେଇଇ କର୍ତ୍ତୃପକ୍ଷ ରାଜ୍ୟର ଆଉ ୯ଟି ସ୍ଥାନ ଓ ରାଜ୍ୟ ବାହାରର ୩ଟି ସ୍ଥାନକୁ ଅନଲାଇନ୍ ପରୀକ୍ଷା କେନ୍ଦ୍ର ଭାବେ ସାମିଲ କରିଛନ୍ତି। ରାଜ୍ୟ ବାହାରେ ପାଟନା, ରାଂଚି ଓ କୋଲକାତାରେ ପରୀକ୍ଷା କେନ୍ଦ୍ର ହେବ। ରାଜ୍ୟ ଭିତରେ ଯେଉଁ ୯ଟି ସ୍ଥାନକୁ ପରୀକ୍ଷା କେନ୍ଦ୍ର ଭାବେ ସାମିଲ କରାଯାଇଛି ସେଗୁଡ଼ିକ ହେଲା, କେନ୍ଦ୍ରାପଡ଼ା, ପୁରୀ, ସୋନପୁର, ନୂଆପଡ଼ା, ବୌଦ, ଦେବଗଡ଼, ଭବାନୀପାଟଣା, ନବରଙ୍ଗପୁର ଓ ମାଲକାନଗିରି। ସେହିପରି ଓଜେଇଇ ପରୀକ୍ଷା-୨୦୨୧ ନିମନ୍ତେ ଅନଲାଇନ୍ ଆବେଦନ (ବି-ଟେକକୁ ଛାଡ଼ି) ଅବଧିକୁ ଜୁଲାଇ ୩୦ତାରିଖ ପର୍ଯ୍ୟନ୍ତ ବଢ଼ାଇ ଦିଆଯାଇଛି। ଯେଉଁ ପରୀକ୍ଷାର୍ଥୀମାନେ ନିଜର ଆବେଦନପତ୍ର ସଫଳତାର ସହ ଦାଖଲ କରିସାରିଛନ୍ତି ସେମାନେ ଓଜେଇଇ ପୋର୍ଟାଲକୁ ଯାଇ ଆଇଡି ଓ ପାସୱାର୍ଡ ଦେଇ ଚାହିଁଲେ ଆବଶ୍ୟକ ସଂଶୋଧନ କରିପାରିବେ। ଯଦି ସେମାନେ ଚାହିଁବେ ନିଜର ପସନ୍ଦର ପରୀକ୍ଷା କେନ୍ଦ୍ର ମଧ୍ୟ ବଦଳାଇ ପାରିବେ ବୋଲି ଓଜେଇଇ କର୍ତ୍ତୃପକ୍ଷଙ୍କ ପକ୍ଷରୁ ଜାରି ନୋଟିସରେ ଉଲ୍ଲେଖ ରହିଛି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।