ସାପ୍ତାହିକ ହାଟକୁ ପଶି ଆସିଲା ଦନ୍ତା, ତା’ପରେ…

ବାରିପଦା (ଓଡ଼ିଶା ରିପୋର୍ଟର): ହାଟ ଭିତରେ ଜଣେ ବ୍ୟକ୍ତିଙ୍କୁ ଦଳି ମାରିଦେଲା ଦନ୍ତା। ଏପରି ଘଟଣା ଘଟିଛି ମୟୂରଭଞ୍ଜ ଜିଲ୍ଲାର ବେତନଟୀ ରେଞ୍ଜର ବୈଶିଙ୍ଗା ଥାନା ଅନ୍ତର୍ଗତ ଆମ୍ବଗଡ଼ିଆ ଗାଁରେ। ମୃତ ବ୍ୟକ୍ତି ଜଣଙ୍କ ହେଲେ ଆମ୍ବଗଡ଼ିଆ ଗାଁର ରେପା ସିଂ। ସେ ରାଜମିସ୍ତ୍ରୀ ଭାବେ କାମ କରୁଥିଲେ।

ଗତକାଲି ଆମ୍ବଗଡ଼ିଆ ଗାଁରେ ସାପ୍ତାହିକ ହାଟ ଚାଲିଥିବା ବେଳେ ହଠାତ୍ ହାଟ ଭିତରକୁ ପଶି ଆସିଥିଲା ଏକ ଦନ୍ତାହାତୀ। ହାଟରେ ଦନ୍ତା ହାତୀକୁ ଦେଖି ଲୋକେ ଭୟଭୀତ ହୋଇ ଯାଇଥିଲେ।  ନିଜ ଜୀବନ ବଞ୍ଚାଇବାକୁ ଲୋକମାନେ ହାଟ ପଡ଼ିଆ ଛାଡ଼ି ପଳାଇ ଯାଇଥିଲେ।  ହେଲେ ରେପା ସିଂ ହାତୀ ହାବୁଡ଼ରେ ପଡ଼ି ଯାଇଥିଲେ। ସେ ନିଜ ଜୀବନକୁ ବଞ୍ଚାଇବାକୁ ଯାଇ ଏକ ମୋଟର ସାଇକେଲ ପାଖରେ ଲୁଚି ଯାଇଥିଲେ। ତେବେ ହଠାତ୍‌ ମୋଟର ସାଇକେଲଟି ତାଙ୍କ ଉପରେ ପଡ଼ିଯାଇଥିଲା। ରେପା ସେଠାରୁ ବାହାରି ପାରି ନଥିଲେ। ପରେ ହାତୀଟି ଆସି ତା’ ଗୋଡ଼ରେ ମୋଟର ସାଇକେଲକୁ ଚାପି ଦେଇଥିଲା। ଫଳରେ ମୋଟର ସାଇକେଲ ତଳେ ଚାପି ହୋଇ ରେପାଙ୍କର ମୃତ୍ୟୁ ଘଟିଥିଲା।

 

 

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।