ଭୁବନେଶ୍ୱର(ଓଡ଼ିଶା ରିପୋର୍ଟର): ‘କରୋନା’ ଯୋଗୁ ଫିକା ପଡ଼ିଲା ‘ପଖାଳ ଦିବସ’। ସଂକ୍ରମଣ ଭୟରେ ହୋଟେଲରେ ‘ପଖାଳ ଦିବସ’ ଆୟୋଜନ ହେଉ ନଥିବା ବେଳେ ଲୋକଙ୍କଠାରେ ବି ପୂର୍ବ ବର୍ଷ ଭଳି ଉତ୍ସାହ ଦେଖିବାକୁ ମିଳିନି।
ପାରମ୍ପରିକ ଓଡ଼ିଆ ଖାଦ୍ୟ ପଖାଳର ପ୍ରସାର ଲାଗି କିଛି ବର୍ଷ ହେଲା ପଖାଳ ଦିବସ ପାଳନ ହେଉଛି। ତେବେ କରୋନା ସଂକ୍ରମଣ ଯୋଗୁ ଚଳିତ ବର୍ଷ ପଖାଳ ଦିବସ ପ୍ରଭାବିତ ହୋଇଛି। ପଖାଳ ଦିସବ ନିମନ୍ତେ ବିଭିନ୍ନ ସ୍ଥାନରେ ହେଉଥିବା ଆୟୋଜନ ମଧ୍ୟ ବନ୍ଦ ରହିଛି।
ବିଶେଷ କରି ରାଜଧାନୀର ଷ୍ଟାର ହୋଟେଲଠୁ ଆରମ୍ଭ କରି ଓ ରେଷ୍ଟୁରାଣ୍ଟ ତଥା ସାଧାରଣ ହୋଟେଲମାନଙ୍କରେ ପ୍ରତିବର୍ଷ ପଖାଳ ଦିବସ ନିମନ୍ତେ ହୋଇଥାଏ ସ୍ୱତନ୍ତ୍ର ଆୟୋଜନ। ଲୋକଙ୍କ ମଧ୍ୟରେ ପୂର୍ବରୁ ଏଥିନିମନ୍ତେ ଦେଖାଯାଉଥିବା ଉତ୍ସାହ କିନ୍ତୁ ଏ ବର୍ଷ ଦେଖିବାକୁ ମିଳିନାହିଁ। ସବୁଠି ପଖାଳ ଦିବସ କାର୍ଯ୍ୟକ୍ରମ ବାତିଲ ହୋଇଛି।
ହେଲେ ପୁରୀ ଜିଲ୍ଲା ଡେଲାଙ୍ଗ ମାଛପଡ଼ାର ପଖାଳ ନାନୀଙ୍କ ଘରେ ପଖାଳ ଦିବସ ପାଳିତ ହୋଇଛି। ପଖାଳ ଦିବସରେ ପଖାଳ ନାନୀ ଭାବେ ପରିଚିତ ଶୁଭଲକ୍ଷ୍ମୀଙ୍କ ହାତରୁ ପଖାଳ ଖାଇବା ପାଇଁ ସାହିପଡିଶା ଲୋକ ଭିଡ଼ ଜମାଇଛନ୍ତି।