ଲକ୍‌ଡାଉନ୍‌ ସତ୍ତ୍ୱେ ୪ ଲକ୍ଷ ଟଙ୍କାର ଗୁଟ୍‌ଖା ଜବତ

ଉମରକୋଟ(କାର୍ତ୍ତିକ ମଲ୍ଲିକ): ନବରଙ୍ଗପୁର ଜିଲ୍ଲା ଉମରକୋଟ ସହରର ଏକ ଦୋକାନ  ଓ ଗୋଦାମ ଉପରେ ଚଢ଼ଉ କରି ପୁଲିସ୍‌ ବିପୁଳ ପରିମାଣର ଗୁଟଖା ଜବତ କରିଛି। ଜବତ ହୋଇଥିବା ଗୁଟଖାର ବଜାର ମୂଲ୍ୟ ପ୍ରାୟ ୪ ଲକ୍ଷ ଟଙ୍କା ହେବ ବୋଲି ଜଣାପଡ଼ିଛି।

ଗତକାଲି ନବରଙ୍ଗପୁର ଏସ୍‌ପି ନିତିନ କୁସଲକରଙ୍କ ନିର୍ଦ୍ଦେଶ କ୍ରମେ ଡିଏସପି ଗୋବିନ୍ଦ ଚନ୍ଦ୍ର ବୁରୁଦା ଏବଂ ପ୍ରତ୍ୟୁସ୍ ମହାପାତ୍ରଙ୍କ ନେତୃତ୍ୱରେ ଏକ ଟିମ୍‌ ଉମରକୋଟ ସହରର ଜଣେ ବ୍ୟବସାୟୀଙ୍କ ଦୋକାନ ଓ ତାଙ୍କ ଗୋଦାମ ଉପରେ ଚଢ଼ଉ କରିଥିଲା।  ସେଠାରୁ ବିପୁଳ ପରିମାଣର ଗୁଟ୍‌ଖା ଜବତ କରି ପୁଲିସ୍‌ ଦୋକାନ ମାଲିକଙ୍କୁ ଅଟକ ରଖିଥିଲା। ତେବେ ଦୋକାନ ମାଲିକ ୮ ଲକ୍ଷ, ୨୭ ହଜାର ୨୦୦ ଟଙ୍କା ଜରିମାନା ଦେବା ପରେ ତାଙ୍କୁ ଛାଡ଼ି ଦିଆଯାଇଥିବା ଉମରକୋଟ ଥାନା ଆଇଆଇସି ଉମେଶ କୁମାର ସାହୁ ସୁଚନା ଦେଇଛନ୍ତି।

ଲକ୍‌ଡାଉନ୍‌ ଯୋଗୁ ସମସ୍ତ ପାନ ଓ ଗୁଟ୍‌ଖା ଦୋକାନ ବନ୍ଦ ରହିଛି। ଏଭଳି ପରିସ୍ଥିତିରେ ଏତେ ପରିମାଣର ଗୁଟ୍‌ଖା ଗୋଟିଏ ଦୋକାନରୁ ଜବତ ହେବା ଘଟଣା ସହରରେ ଚହଳ ସୃଷ୍ଟି କରିଛି। ନବରଙ୍ଗପୁର ଏସ୍‌ପିଙ୍କ ଏଭଳି ପଦକ୍ଷେପକୁ ଅଞ୍ଚଳବାସୀ ସ୍ୱାଗତ କରିଛନ୍ତି।