ଭୁବନେଶ୍ୱର(ଓଡ଼ିଶା ରିପୋର୍ଟର): ଦୁଇ ଦିନରେ ରାଜ୍ୟର ବିଭିନ୍ନ ମେଡ଼ିକାଲ୍ରୁ ଧରାଗଲେଣି ୩୦ ଦଲାଲ। ଏଥିରେ ଭୁବନେଶ୍ୱରରୁ ୪, ସମ୍ବଲପୁର ଭିମ୍ସାରରୁ ୫, ବଲାଙ୍ଗିରରୁ ୫, ଭଦ୍ରକରୁ ୪, ମୟୂରଭଞ୍ଜରୁ ୩, ରାଉରକେଲାରୁ ୪, ବାଲେଶ୍ୱରରୁ ୩ ଓ ନବରଙ୍ଗପୁରରୁ ୨ ଦଲାଲ ଅଛନ୍ତି। ଦଲାଲମୁକ୍ତ ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ଦ୍ଦେଶ ପରେ ଜିଲ୍ଲାପାଳ ଓ ଏସ୍ପିମାନେ ଏପରି ଏହି ଚଢଉ କରିଛନ୍ତି।
ସମ୍ୱଲପୁର ବୁର୍ଲା ଭିଏସ୍ଏସ୍ ମେଡିକାଲ କଲେଜ ଓ ହସ୍ପିଟାଲରୁ ୫ ଜଣ ଦଲାଲ ଗିରଫ ହୋଇଛନ୍ତି। ଗିରଫ ଦଲାଲଙ୍କ ଭିତରୁ ଜଣଙ୍କ ଘର ସମ୍ବଲପୁର ସହରରେ ହୋଇଥିବା ବେଳେ ଅନ୍ୟ ୪ ଜଣଙ୍କ ଘର ବୁର୍ଲାରେ। ଏଠାକୁ ଆସୁଥିବା ରୋଗୀଙ୍କୁ ଭୁଆଁ ବୁଲାଇ ଏମାନେ ଘରୋଇ ନର୍ସିଂହୋମକୁ ପଠାଉଥିବା ନେଇ ସୂଚନା ମିଳିଛି।
ଏପଟେ ବଲାଙ୍ଗିର ଭୀମଭୋଇ ମେଡିକାଲ କଲେଜ ଓ ହସ୍ପିଟାଲରୁ ଧରାପଡିଛନ୍ତି ୫ ଦଲାଲ। ଏମାନଙ୍କୁ ଧରିବା ପାଇଁ ସାଧା ପୋଷାକରେ ହସ୍ପିଟାଲ ପରିସରରେ ଜଗି ରହିଥିଲେ ପୁଲିସ। ସରକାରୀ ଡାକ୍ତରଖାନାରୁ ଘରୋଇ ନର୍ସିଂ ହୋମ୍ ଓ ଘରୋଇ କ୍ଳିନିକକୁ କିଏ ରୋଗୀଙ୍କୁ ଡାକି ନେଉଛି? କିଭଳି ଢଙ୍ଗରେ ନିଆଯାଉଛି? ତାହା ଉପରେ ତୀକ୍ଷ୍ଣ ନଜର ରଖିଛି ପୁଲିସ। ଏହା ସତ୍ତ୍ୱେ ଦଲାଲମାନେ ସେମାନଙ୍କ କାୟା ବିସ୍ତାର କରୁଥିଲେ। ଆଉଟ୍ଡୋର ଟିକେଟ୍ ନେଇ ନିଜକୁ ରୋଗୀ ବୋଲି କହି ଚାଲି ଯାଉଥିବା ବେଳେ ପୁଲିସ ହାତରେ ଧରାପଡ଼ିଥିଲେ ଦଲାଲ। ଏହି ଚଢଉରେ ଜିଲ୍ଲାପାଳ ଓ ଏସ୍ପି ସାମିଲ ଥିଲେ। ଏଥିରେ ନର୍ସିଂହୋମ କିମ୍ବା ଆଉ କାହାର ସଂପୃକ୍ତି ଥିଲେ କଡା କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି ପୁଲିସ ଅଧିକାରୀ।
ଏପଟେ କ୍ୟାପିଟାଲ ହସ୍ପିଟାଲରୁ ଧରାପଡିଥିବା ୪ ଦଲାଲଙ୍କ ମଧ୍ୟରୁ ୩ ଜଣ ମେଡିସିନ୍ ରିପ୍ରେଜେଣ୍ଟିଭ(ଏମ୍ଆର୍) ଅଛନ୍ତି। ଆଗକୁ ଏମ୍ଆରଙ୍କ ପ୍ରବେଶ ଉପରେ ମଧ୍ୟ ନିଷେଧାଦେଶ ଜାରି କରିଛନ୍ତି ହସ୍ପିଟାଲ ନିର୍ଦ୍ଦେଶକ। ଯଦି ଡାକ୍ତରଙ୍କ ଲିଙ୍କ ବାହାରିଲେ ମଧ୍ୟ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି କ୍ୟାପିଟାଲ୍ ହସ୍ପିଟାଲ୍ ନିର୍ଦ୍ଦେଶକ ଅଶୋକ ପଟ୍ଟନାୟକ କର୍ତ୍ତୃପକ୍ଷ।
ଅପରପଟେ ଏହି ଅଭିଯାନକୁ ଆଗକୁ କଡାକଡି କରାଯିବ ବୋଲି କହିଛନ୍ତି ପୁଲିସ କମିଶନର ସୁଂଧାଶୁ ଷଡ଼ଙ୍ଗୀ।
ବିଭିନ୍ନ ହସ୍ପିଟାଲରେ ଚଢ଼ଉ ଜାରି ରହିବ: ଡିଜିପି
ସରକାରୀ ହସ୍ପିଟାଲରେ ଦଲାଲଙ୍କୁ ଧରିବାପାଇଁ ସ୍ପେଶାଲ ଡ୍ରାଇଭ ସବୁଦିନ ଜାରି ରହିବ ବୋଲି ଡିଜିପି ବିଜୟ କୁମାର ଶର୍ମା କହିଛନ୍ତି। ସ୍ୱଚ୍ଛତା ଆଣିବା ଦିଗରେ ସବୁ ଜିଲ୍ଲାର ଏସ୍ପିଙ୍କୁ ରିପୋର୍ଟ ଦାଖଲ କରିବାକୁ କୁହାଯାଇଛି। ଏହାସହ ଦଲାଲଙ୍କ ନର୍ସିଂ ହୋମ, ଡାଇଗ୍ନୋଷ୍ଟିକ ସେଣ୍ଟର ସହ ଲିଙ୍କର ଖୋଳତାଡ କରାଯାଉଛି। ପ୍ରମାଣ ମିଳିଲେ କାର୍ଯ୍ୟାନୁଷ୍ଠାନ ନିଆଯିବ ବୋଲି ଡିଜିପି କହିଛନ୍ତି। ଗତ ଦୁଇଦିନ ମଧ୍ୟରେ ୮ ଜିଲ୍ଲାରେ ୩୦ଜଣ ଦଲାଲ ଗିରଫ ହୋଇଛନ୍ତି। ଦଲାଲମାନେ ଗରିବ ରୋଗୀ ଓ ତାଙ୍କ ସହାୟକଙ୍କଠାରୁ ଅର୍ଥ ହଡପ୍ କରୁଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
