ଭୁବନେଶ୍ୱର(ଓଡ଼ିଶା ରିପୋର୍ଟର): ବିଧାୟକ ପ୍ରଦୀପ ପାଣିଗ୍ରାହୀଙ୍କ ଘର କ୍ୟାମ୍ପସ ଆଗରେ ପୁଲିସ । ଭୁବନେଶ୍ୱର ସରକାରୀ ବାସଭବନ ପରିସରରେ ପୁଲିସ ମୁତୟନ ହୋଇଛନ୍ତି । ବିଜେଡିରୁ ବହିଷ୍କୃତ ହେବା ପରେ ବିଧାୟକଙ୍କ ଘର ଆଗରେ ପୁଲିସ ପହରା ଦେଇଛନ୍ତି ।
ଏହାକୁ ନେଇ ପ୍ରତିକ୍ରିୟା ପ୍ରକାଶ କରିଛନ୍ତି ବିଧାୟକ ପ୍ରଦୀପ ପାଣିଗ୍ରାହୀ । ସେ କହିଛନ୍ତି, ଏବେ ଯାଏଁ ମୋତେ ସୁରକ୍ଷା ମିଳୁନଥିଲା । ଦଳରୁ ବହିଷ୍କାର ହେବା ପରେ ଘର ଆଗରେ ପୁଲିସ ଆସି ମୁତୟନ ହୋଇଛନ୍ତି । ସେଥିପାଇଁ ମୁ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଉଛି । କାର୍ତ୍ତିକ ପାଣ୍ଡିଆନଙ୍କ ଘରେ ଯେଉଁଭଳି ଫୋର୍ସ ମୁତୟନ ହୋଇ ରହୁଛନ୍ତି, ସେହିଭଳି ମୋ ଘରେ ମଧ୍ୟ ସବୁବେଳେ ଫୋର୍ସ ମୁତୟନ କରିଦିଅନ୍ତୁ ବୋଲି ସେ ମୁଖ୍ୟମନ୍ତ୍ରୀଙ୍କୁ ଅନୁରୋଧ କରିଛନ୍ତି ।
ସେ ଆହୁରି କହିଛନ୍ତି, ମୋ ଉପରେ ଚାରିଆଡୁ ଅଭିଯୋଗ ଆସିଲାଣି । ଏଥିପାଇଁ ମୋ ଜୀବନ ପ୍ରତି ବିପଦ ରହିଛି । ମୁଖ୍ୟମନ୍ତ୍ରୀ ହିସାବରେ ଜଣେ ବିଧାୟକଙ୍କୁ ସୁରକ୍ଷା ଦେବା ପାଇଁ ସେ ଯେଉଁ ନିଷ୍ପତ୍ତି ନେଇଛନ୍ତି, ସେଥିପାଇଁ ତାଙ୍କୁ ମୁଁ ଧନ୍ୟବାଦ ଦେଉଛି ବୋଲି ନବୀନଙ୍କୁ ଇଙ୍ଗିତ କରି କହିଛନ୍ତି ।